Zang Shonang Yeesɔ 25

Bulu nɛɛ zang daa nɛɛ ruu ɓiɓɛ ka bii Kayisa

1Ɓɔɔ bɛ̀ɛ́ diki Fesitu daa taati tɔ ka tipi kaɓa, yupaa nɛɛ Kayisariya daa ka Urushalima. 2Zang bang bang zang ɓɔɔ ri dɔɔ vuu ka Gãa Laa, nɛɛ rɛɛ zang bang bang zang Yahudi, ri atɛ ruu Bulu ka bii ɓiɓɛ. Ri gaa Fesitu nɛɛ, 3wu palɛ ri tɔ̃ɔ jong, wu kɔɔ zang nɛɛ zang atɛ Bulu ka Urushalima. Ka ruu ɓɔɔ, ri tɔ̀ng zɔɔ tɔ nɛɛ tɔɔ ri naa nyɔ wu vɔrɔ kaa gbalang ɓɛɛ. 4Fesitu kasɛ ri nyaa tɔɔ, “Zang mã Bulu ka sãa ka Kayisariya, n ti daa kaa doo nɔngkɔ. 5Zang bang bang manɛ ɓɔɔ ri dṹng m, ri daa nɛɛ n ka Kayisariya ri daa kɔɔyi, nɛɛ pálɛ̀ vuu shi kpang ɓɔɔ kagn ɓɛɛ.”

6Fesitu nwang nɛɛ ri diki daa mantaati kɔ́ kopi katɔ, a daa Kayisariya kati. Nɔng naa gãntɛ tɔ, a nwang ka yeti nɔng ɓɔɔ zang jɛ̃ɛ ruu kagn ɓɛɛ, a kɔɔyi nɛɛ, zang atɛ wu Bulu. 7Zang atɛ Bulu tɔ, a zang Yahudi ɓɔɔ ri a nɛɛ Urushalima ri kiiri wu nyaa ka teteng. A ri gaa tɔɔsung ruu shi kpang dɔɔli kɔɔrɔnang ka yuu ɓiɓɛ, ɓɔɔ tĩng nyaa tãanang kpang ɓɛɛ. Zang ɓɔɔ ti kagn gbete ka teteng ɓarɛ ɓɔɔ tùsú zang nɛɛ ruu keɓe niizang kɔ nwani ɓɛɛ kpang. 8Bulu ta yuu ɓiɓɛ, a kɔɔyi tɔɔ, “N palɛ vuu shi kpang ɓɔɔ kagn ɓɔɔ ta nyaa dannang zang Yahudi kpang, wu ti ɓɔɔ lasɛ Gãa Laa kpang, n pàlɛ̀ wu kpanti Rooma vuu shi kpang, kpang.”

9Fesitu kasɛ nɛɛ zang Yahudi ri kasɛ ruu ɓiɓɛ ka ruu nɔngkɔ, hɛ̃ɛ Bulu tɔɔ, “Mɔɔ kasɛ katɔ mɔɔ daa Urushalima, zang daa jɛ̃ɛ mɔɔ ruu ka yuu vuu kɔ zang kɔɔrɔ ka yuu ɓaaɓɛ ka tĩng mɛɛ ɓɛɛ ya?”

10Bulu kasɛ wu nyaa tɔɔ, “N shii ka tĩng rɛɛ zang ruu jɛ̃ɛnang Kayisa kɔ, wee ɓi nɔng ɓɔɔ zang nɛɛ jɛ̃ɛ m ruu kagn kɔ nwani. Mɔɔ zi tɔ n pàlɛ̀ rɛɛ zang Yahudi vuu shi kpang ɓɔɔ kagn kpang. 11Naa n ta nyaa dannang, kɔ́ n palɛ vuu ɓɔɔ daa naa ɓɔɔ zang nyɔ m vɔrɔ tɔ, n tɔ́ɔ kpàng nɛɛ n yuu vɔrɔ kpang. Nyaavaa kɔ ri ɓaa m nɛɛ niizang kpang, n zi zang ɓɔɔ a ri n kpang. N kasɛ nɛɛ zang daa nɛɛ ruu mɛɛ ka tĩng Kayisa.”

12Fesitu rang yee tɔ nɛɛ zang ɓɔɔ wu tãa nyaa ɓarɛ katɔ ɓɛɛ ka gbongkarɛ, a naa kasɛ nyaa tɔɔ, “Mɔɔ nɛɛ Kayisa wu daa jɛ̃ɛ mɔɔ ruu, mɔɔ daa kaa bii Kayisa kɔ.”

Bulu ka tĩng Agiripa nɛɛ Banike

13Diki naa bee tɔ tɔkɔlɔng, a kpanti Agiripa nɛɛ Banike ri a ka Kayisariya nɛɛ ri naa jee Fesitu nyaa, ɓɔɔ wu à ka tipi kaɓa ɓɛɛ. 14Diki ɓarɛ bee tɔ ka Kayisariya tɔkɔlɔng, a Fesitu kɔɔ kpanti ruu Bulu kati tɔɔ, “Yɔɔ ɓɔɔ kagn Filiku yaa wu ka sãa. 15Ɓɔɔ n daa ka Urushalima, a rɛɛ zang bang bang zang ɓɔɔ ri dɔɔ vuu ka Gãa Laa nɛɛ zang bang bang zang Yahudi ri kɔɔrɔ ruu shi kpang ka yuu ɓiɓɛ. Ri tɔɔ n nyɔ wu vɔrɔ. 16A n kɔɔ ri nɛɛ zang Rooma ri palɛ ɓarɛ nɔngkɔ kpang. Ri a zang, zang ɓɔɔ zang ɓaa wu nyaavaa wu waati nɔngkɔ kpang. Ri átɛ̀ ri ɓarɛ gbongkarɛ nɔng gbete nɛɛ zang ɓɔɔ ri ɓaa wu nyaavaa ɓɛɛ. Tɔ̀ɔ, zang yàa wu gbalang wu kɔɔ ruu ka yuu vuu ɓɔɔ zang ɓaa wu nyaavaa kagn ɓɛɛ.

17“A ri naa arɛ ka nihn ka nyaa zɔɔ. N suukãng kpang, ɓɔɔ nɔng gãntɛ, n nwang ka nɔng ruu jɛ̃ɛnang, a n tɔɔ zang atɛ yɔɔ bìí. 18Ɓɔɔ zang ɓɔɔ ri ɓaa wu nyaavaa ri shii paa, ri kɔɔ vuu shi kpang ɓɔɔ wu palɛ, ɓɔɔ n shing danggn, n tɔɔ naa ri kɔɔ ɓɛɛ kpang, 19ri kɔɔrɔ ruu ɓarɛ ka yuu nyaa ɓɔɔ ri laa nɛɛ wu ka gbalang Laa ɓarɛ ɓɔɔ ri dũng ɓɛɛ. Ɓɔɔ ti ka yuu yɔɔ ɓɔɔgn zang ɓaa wu nɛɛ Yeesɔ ɓɔɔ vɔ tɔ, a Bulu kɔɔyi tɔɔ, ɓi doo ningkãari ɓɛɛ. 20N zi naa ɓɔɔ n kãa dĩiri ruu keɓe kpang. Ka ruu nɔngkɔ, n hɛ̃ɛ Bulu n tɔɔ wu kasɛ tɔ wu daa ka Urushalima, zang daa jɛ̃ɛ wu ruu ka nɔngkɔ ka yuu rɛɛ vuu kɔ zang kɔɔrɔ ɓɛɛ ya? 21Bulu gaa m nɛɛ zang mã wu ka sãa, Kayisa wu daa tãa ruu ɓiɓɛ. A n kɔɔ zang nɛɛ zang mã wu ka sãa ka nɔngkɔ. N naa dɔ̃ wu ditɔ ka bii Kayisa.”

22Agiripa kɔɔ Fesitu tɔɔ, “N kasɛ n tãa yɔɔ bii nɛɛ shoo mɛɛ.”

Fesitu kasɛ wu nyaa tɔɔ, “Ɓuru mɔɔ tãa wu ditɔ.”

23Nɔng naa gãntɛ tɔ, a Agiripa nɛɛ Banike ri a nɛɛ zang ka knti ɓarɛ zingkãng zingkãng. Rɛɛ zang bang sɔɔja, nɛɛ zang bang bang gari ri daa nɛɛ ri ka yeti gãa ɓɔɔ zang kpalɛ yuu kagn ɓɛɛ. A Fesitu kɔɔ zang nɛɛ ri atɛ Bulu ta. 24Fesitu kɔɔyi tɔɔ, “Kpanti Agiripa nɛɛ zang ɓɔɔ nɔɔ nɛɛ ruu ka nihn nandon, nɔɔ zi yɔɔ keɓe ɓɔɔ zang Yahudi nandon ɓàa wu nyaavaa ka bii mɛɛ ka nihn nɛɛ Urushalima. Ri goo nyaa ka lapa nɛɛ daa naa ɓɔɔ zang yaa yɔɔ keɓe ningkãari kpàng.

25“N zi vuu ɓɔɔ wu ti palɛ, ɓɔɔ daa naa ɓɔɔ zang nyɔ wu vɔrɔ m kpang. Wee wukɔ ti gaa m nɛɛ nyaa ɓiɓɛ, nɛɛ zang dɔ̃sɔ ruu ɓiɓɛ ka bii Agɔsitu ɓee, n ti kasɛ tɔ n dɔ̃ wu ka bii ɓiɓɛ. 26N ti zi ruu ɓɔɔ waasɛ̃ ɓɔɔ naa n bee Kayisa ka yuu ɓiɓɛ kpang. Ka ruu nɔngkɔ, n atɛ wu ka tĩng manɛ. N atɛ wu ka tĩng ɓaaɓɛ kɔ gbɛ̃̀tì gbɛ̃̀tì, kpanti Agiripa. Mɔɔ nɛɛ kãa dĩiri ruu bìí tɔ, tɔɔ n walɛ vuu ɓɔɔ n bee ɓɛɛ kati. 27Ka ruu ɓɔɔ, n zì naa ɓɔɔ n dɔ̃̌ zang, zang ɓɔɔ zang mã ka sãa, n zì vuu shi kpang ɓɔɔ zang kɔɔyi nɛɛ wu palɛ, ɓɔɔ n bee zang ka yuu ɓiɓɛ kpang, kpang ɓɛɛ.”

Currently Selected:

Zang Shonang Yeesɔ 25: mzmNT

Highlight

Copy