Matthieu 19
19
1Tokou Jésus eo ta pa tar nèn, nè nï Galilée té nè nao nange té ke Judée, toura man Jourdain té.
2Dooudjé tokou baya baya ao gè té, ke nè nòrou rò too lodè nou.
3Pharisiendjé dé rè té, ndoudjè ta nèè mpana, Tar ndedji are dingao ta touba dènè la mbata tar dang dang wa?
4Nè ntél tar mpana, Sésè etouraidjé maketourou ang wa, ke nè ke ndadè dongor kèté, ndadè to dingao ke dènè?
5Nè mpana, Mbata yèn dingao a kïya bèdjè ke këndjè ta mbòna ke dènè la, ke dèdè djokem da dé to da rò ke kadaba?
6Tokou ban dèdè déh djo marè ang nga, a dèdè déh to da rò ke kadaba. Tokou ban né ke Allah mbona mba, ïya are doou kai ang.
7Dèdè mpa darè, Bana mba di baa Moïse pa ta kare nda maketourou ta touba dènè, ke ta kare nè nao wa?
8Nè mpa naredè, Mbata mèsè ke ngeng Moïse ïya deo aresè ta touba dènè losè, a ke ndô té ke dongor kèté to tokou ban ang.
9Ma mpa maresè, doou ke touba dènè la tokou to tar to loou to madjang ang, ke nè ntaa mare dènè, nè nda kaiya, ke doou ke taa dènè ke ntoubè mba, nè nda kaiya.
10Ndjè kao gè tédjé pa arè, Tokou tar lo doou to tokou ban ke dènè la, to madji ta taa dènè ang.
11A nè mpa naredè, Dooudjé toï ase ta geré gel tar nèn ang, sè dèdè ndja ke daredè.
12Mbata mare dooudjé ke ndjè kòrou gemdè éh tén, dèdè ke déh tokou ban ndò koudjoudè té, mare ndjè kòrou gemdè éh tén ke dooudjé dadè to ndjè kòrou gemdè, ke mare ndjè kòrou gemdè éh tén ke dèdè ndja nda ta dé to ndjè kòrou gem mbata tar béh kö ke dara. Nè ke nase ta taa yéh nèn, ase kare nè ntèè.
13Bana dèdè ndé rè té ke ngandjé, ta kare Jésus ila dja dòdè té ke ta doudjou Allah. Ndjè kao gè tédjé ndangedè.
14A Jésus pana, Aridjé ngandjé dé ròm té, òkidjé deo lodè ang, mbata béh kö ke dara to mbata dèdè ke nto tokou ngandjé.
15Nè nila dja dòdè té, nè nï nao loou té ke dang.
16Wo, doou kada dé rè té pana, Ndjè tòdjou tar, ma mase ta da né ke madji di baa ta kinga tébe ke ke ndò ke ndò wa?
17Jésus pa arè, Mbata di a edoudjoum mbata né ke to madji wa? Kada éh ke to madji. Tokou i ndiki ta kéh ke tébe, ngem tar ndedji.
18Nè mpa nare Jésus, Tar ndedji di wa? Jésus pana, Ase kare i tòl doou ang, Ase kare i da kaiya ang, Ase kare i boukou ang, Ase kare i pa tar nadji ngem ang.
19Ebel bòidjè ke köindjè, ke, Ase kare i ndiki doou ke ndjè nin kei mari tokou i ndiki ròi ndja.
20Basä nèn pa arè, Mam ngem tar nèn toï, di a nai sem wa?
21Jésus pa arè, Tokou i ndiki ta to gaté gaté, ao elabe ndoko né kinga loi, are narè dangetédjé, ke i a kisi ke né kinga ke dara, edé ao gom té.
22Tokou basä wo tar nèn, nè nao ke ongou mbata nè néh ke né kinga nya.
23Jésus pa are ndjè kao gè tédjé, Tokoro ma mpa maresè, to ngeng nya mbata doou ke éh ke né kinga ta téh mè béh kö té ke dara.
24Ma mpa maresè mare bai, téh lo doou ke ndjè né kinga mè béh kö té lo Allah to ngeng wota ndai lo djambal deo libi té.
25Tokou ndjè kao gè tédjé wo tar nèn, mèdè ounda dò biä nya, dèdè mpana, Bana na a kase kinga kadji wa?
26Jésus aadè pa aredè, Né nèn ase da lo dooudjé ang, a Allah ase ta da né toï.
27Tokou ban Pierre tél tar pana, Wo, djèdjè djïya né toï mbä ta kao goi té. Bana djèdjè dja kinga di wa?
28Jésus pa aredè, Tokoro ma mpa maresè, ndò ke Ngon lo doou a kisi dò ngèndé gange saria ndokoo té la, ke nange té ke siki, sésè ke abidjé gom té a kisidjé dò ngèndé gange saria té dòkou gérè djo tò, ta gange saria lo gel dooudjé dòkou gérè djo lo Israël.
29Dooudjé kada kada toï ke ïya kei lodè, aséh ngaködè ke dingao, aséh ngaködè ke dènè, aséh bòdèdè, aséh ködèdè, aséh ngandjé, aséh nange mbata rim ndja, da kinga gar dòdòkou ke da kinga tébe ke ke ndò ke ndò.
30A maredjé baya ke to ndjè ke dongor da to ndjè ke goukou, ke dèdè ke goukou da to ndjè ke dongor.
Currently Selected:
Matthieu 19: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
