Jean 8
8
1A Jésus ao do err Olivier té.
2Ke sindò ntél tokou kei Allah té, ke dooudjé toï dé rè té, ke nè nisi ntòdjoudè tar.
3Ndjè da maketourou ndedjidjé ke Pharisiendjé dwaa mare dènè kada ke to loou to madjang, ndé sa darè narr horo dooudjé té.
4Dèdè mpa dare Jésus, Ndjè tòdjou tar, djwaa mare dènè nèn do loou to madjang té.
5Mè maketourou tar ndedji té lodjè, Moïse pa aredjè ta tila doou ke ban ke err, i a pana di sa wa?
6Dèdè mpa tar nèn ta nèè, baa ta kinga tar ke ta kounè dè. Jésus oula dè nange, da maketourou ke ngaodja.
7Gè té ke dèdè ndoudjè gar baya baya, nòrou dè mpa naredè, Mare doou losè kada ke éh ke né ke madjang ngadji ang, arè ndé ke mare err nila né dènè nèn dongor.
8Nè ntél noula dè nange nda maketourou ke ngaodja bai.
9Tokou dèdè do tar nèn mbä, mare bouka ao dongor, ke maredjé ao kada kada toï, Jésus ke kadèba a nai ke dènè nèn ke arr loou té nou.
10Jésus òrou dè, nè mpa ke dènè, Dènè, dèdè déh da wa? Doou kada gange saria dòi té ang wa?
11Nè mpana, Doou kada ang, Mbaibé Seigneur. Jésus pana, Ma to, mam ngange saria dòi té ang, ao, eda né ke madjang ang nga.
12Tokou ban Jésus pa aredè bai, pana, Mam nto lokarè ke nange nèn, doou ke dé gom té na ndja londoul té ang, nè na kéh lokarè té ke tébe.
13Tokou ban Pharisiendjé pa sa, I ao epa tar nadji loi ndja, tar nadji loi to tokou tokoro ang.
14Jésus tél pa aredè, Tokou ma ndja mpa tar nadji lom, tar nadji lom to tokou tokoro, mbata mam ngeré loou ke mï kendé, ke mam ngeré loou ke mao kendé, a sésè egeridjé loou ke ma mï kendé ke loou ke mao kendé ang.
15Sésè egangidjé saria deo da rò té, mam ngange saria do doou té kada ang.
16A tokou mam ngange saria, saria lom to gaté gaté, mbata ma méh ke kadam ang, ma méh ke Bòi Allah ke oulam.
17Maketourou tar ndedji losè pa to, tar nadji lo dooudjé ke yéh djo to tokou tokoro.
18Mam nto nè ke mpa tar nadji lom ndja, ke Bòi Allah ke oulam pa tar nadji lom.
19Tokou ban dèdè mpa darè, Bòidjè éh da wa? Jésus tél pana, Sésè egeremdjé ang, ke sésè egeridjé Bòi ang to, tokou egeremdjé, a geridjé Bòi to.
20Jésus pa tar nèn kei ngem narè té, tokou nè nao ntòdjou tar dooudjé mè tokou kei Allah té, a doou kada wèè ang, mbata ndò la nai dé ang bai.
21Tokou ban Jésus pa aredè bai, Ma mao ngäm, a sésè esangemdjé, a kwoeidjé ke madjang losè. Loou ke ma mao kendé, sésè asidjé téh té ang.
22Tokou ban Juifdjé pana, Nata tòl rè ndja wa, mbata nè mpana, Loou ke ma mao kendé, sésè asidjé téh té ang?
23Nè mpa naredè, Sésè etoidjé yéh ke kòè té, mam nto yéh ke tarr, sésè etoidjé yéh ke nange nèn, mam nto yéh ke nange nèn ang.
24Tokou ban ma mpa maresè, a kwoeidjé ke madjang losè, tokou bo woidjé mèsè té ang ke mam nto nè, a kwoeidjé ke madjang losè.
25Tokou ban dèdè mpa darè, I to doou di wa? Jésus pa aredè, Mam nto nè ke mpa maresè leo dongor ndja.
26Ma méh ke tar nya ta pa ta gange né saria dòsè té, mbata nè ke noulam nè nto tokoro, mbata tar ke ma mo tè té leo, ma mpa tarè mare dooudjé ke nange nèn.
27Nao mpa tar lo Bòi Allah naredè, dèdè ngerè ang.
28Tokou ban Jésus pana, Tokou etoidjé Ngon lo doou tarr mbä, tokou ban ndè té nou, sésè a geridjé to ma ndja, mam nda né ke mem ang, a ma mpa tar tokou Bòi Allah pa arem leo.
29Nè ke noulam néh sem, nïyam ke kadam ang, mbata mam nda né ke arè koukou ke ndò toï.
30Tokou Jésus ao pa tar nèn, dooudjé baya baya wo mèdè té sa.
31Tokou ban nè mpa nare Juifdjé ke wo mèdè té sa, Tokou sésè isidjé mè tar té lom, sésè etoidjé ndjè kao gom tédjé ke tokoro.
32Ke sésè a geridjé tar ke tokoro, ke tar ke tokoro a kòrousè.
33Dèdè ntél tar darè, Djèdjè nto dooudjé ke gel Abraham té, djèdjè nai djèdjè nda bere lo doou kada ngadji ang bai. I pa di wa, Tar ke tokoro a kòrousè?
34Jésus tél tar aredè, Tokoro, tokoro, ma mpa maresè, doou ke da né ke madjang to bere lo né ke madjang.
35Bere isi mè kei té ndò toï ang, ngon koudjou isi kendé ke ndò toï.
36Tokou ban, tokou Ngon ndja òrousè, sésè a kisidjé to bere ang nga.
37Mam ngeré sésè etoidjé dooudjé ke gel Abraham té, a sésè esangidjé deo ta tòlem, mbata tar lom inga loou mèsè té ang.
38Ma mpa tar né ke mo rò Bòi té mbä, sésè edaidjé né ke sésè woidjé ta bòsésè té tò.
Dèdè ntél mpa darè, Bòdjèdjè to Abraham. Jésus pa aredè,
39Tokou sésè etoidjé ngandjé lo Abraham, sésè a daidjé koula lo Abraham.
40Loshénè sésè esangidjé deo ta tòlem, doou ke pa tar ke tokoro aresè mbä, ke ma mo ta Allah té. Abraham da tokou ban ang.
41Sésè edaidjé koula lo bòsésè. Dèdè mpa darè, Djèdjè nto ngankaiyadjé ang, djèdjè nto ngandjé lo Bòdjèdjè Allah kadaba.
42Jésus pa aredè, Tokou Allah to Bòsésè, a ndikimdjé, mbata ma mï rò Allah té. Mam ndé loou té nèn mbä, mbata mam ndé ke mem ba ang, a nè a noulam.
43Mbata di a sésè egeridjé tar lom ang wa? To mbata sésè asidjé ko tar lom ang.
44Sésè etoidjé ngä bòsésè Satan, a edaidjé boo lo bòsésè. Nè nto ndjè toï doou leo dongor, nè nisi ke tar ke tokoro ang, mbata tar ke tokoro to mèa té ngadji ang. Tokou nere ngem nè mpa tar la ndja, mbata nè nto ndjè ngem ke bo ngem.
45A mbata ma mpa tar ke tokoro, sésè woidjé tar lom ang.
46Doou di losè a ndangem mbata né ke madjang wa? Tokou ma mpa tar ke tokoro, mbata di a woidjé mèsè té sem ang wa?
47Doou ke to ngä Allah a ko tar lo Allah, mbata tar nèn sésè woidjé ang, mbata sésè etoidjé ngä Allah ang.
48Juifdjé tél pa arè, Djèdjè mpa gaté gaté ang wa, tokou djèdjè mpana i to Samaritain, ke i éh ke ndii ke madjang?
49Jésus tél pana, Ma méh ke ndii ke madjang ang, mam nwal Bòi, a sésè ewalemdjé ang.
50Mam nsange piti lom ndja ang, doou kada éh ke ao sange ke nè na gange saria.
51Tokoro, tokoro, ma mpa maresè, tokou doou ngem tar lom, nè na ko yo ngadji ang.
52Juifdjé pa arè, Loshénè djèdjè ngeré i éh ke ndii ke madjang. Abraham ke prophètedjé doei leo, a i pana, Tokou doou ngem tar lom, ndjè a naa yo ndò kada ang.
53I boui wota bòdjèdjè Abraham ke woei leo wa? Ke prophètedjé ke woei leo. I pana i ndja to doou di wa?
54Jésus tél pana, Tokou mam nda piti lom ndja, piti lom a to né ke dòro ba. Bòi a arem piti, nè ke sésè epaidjéna nè a nto Allah losè.
55A sésè egerèdjé ang, mam ngerè. Tokou bo ma mpana mam ngerè ang, ma ma to ndjè kere ngem deo kadaba kesè, mam ngerè, ke mam ngem tar la.
56Abraham bòsésè rè nèlè nya mbata nè nase ta ko ndò lom, nè no leo, ke rè nèlè nya.
57Tokou ban Juifdjé pa arè, Bal loi nai ase dômi ang bai, a eda to di a wo Abraham mbä wa?
58Jésus pa aredè, Tokoro, tokoro, ma mpa maresè, dongor baa Abraham to, mam nto.
59Tokou ban dèdè ndë err ta tilè nè, a Jésus iyaa rè, ke nè ntéh ke daka tòkou kei Allah té.
Currently Selected:
Jean 8: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here: