Jean 7
7
1Go né té nèn Jésus ndja Galilée té, mbata nè ndiki ta ndja Judée té ang, mbata Juifdjé sange deo ta tòlè.
2Bana ndò ke bo lo Juifdjé, ndò ke bo ke nda né kei kam dé ngosiba mbä.
3Tokou ban ngaköèdjé pa arè, Ï nèn ao loou té ke Judée, baa ta kare ndjè kao goi tédjé ase ko koula loi ke i ao da.
4Mbata doou kada da né loou kiyèè té ang, tokou nè ndiki dooudjé toï ta geré. Tokou i da nédjé nèn, etéh daka ke kem dooudjé té toï.
5Mbata ngaköèdjé ndja wo mèdè té sa ang.
6Tokou ban Jésus pa aredè, Ndò lom nai dé ang bai, a ndò losè to ke ndò toï.
7Nange nèn ase mbetésè ang, a nè mbetem, mbata ma mpa tar nadji la, mbata koula la to madjang.
8Sésè abidjé ndò ke bo té nèn. Ma mao ndò ke bo té nèn loshénè ang, mbata ndò lom nai asang bai.
9Gè té nè mpa né nèn naredè, nè nai Galilée té.
10Tokou ngaköèdjé ao ndò ke bo té nèn mbä, gè té goukou nè nao to, a ke kem dooudjé té ang, mbata nè ndiki ta kare dooudjé toï woè ang.
11Juifdjé sangè ndò té ke bo, dèdè mpana, Nè néh da wa?
12Dooudjé maitar nya horodè té mbata la. Maredjé pana, Nè nto doou ke madji, maredjé pana, Ban ang, nè neré dooudjé nya.
13Doou kada pa tar la nò dooudjé té ang, mbata dèdè disi ke bel lo Juifdjé.
14Tokou ndò ke bo oso Jésus ao mè tòkou kei Allah té, nao ntòdjou tar.
15Tokou ban mè Juifdjé isa, dèdè mpana, Deo di a doou nèn geré ta toura maketourou, mbata nè nao kei tòdjou maketourou té ndò kada ang wa?
16Tokou ban Jésus tél pa aredè, pana, Tar ke mam ntòdjousè to ngäm ang, a to ngä nè ke noulam.
17Tokou doou kada ndiki ta da né tokou Allah ndiki, nè na geré tar nèn tokou to ngä Allah, aséh tokou ma mpa tar ke mem té ndja.
18Nè ke mpa tar ke mèa té ndja, nè nsange piti la ndja, a nè ke nsange piti lo nè ke noulè, nè nto doou ke tokoro, nè ke gatang to mèa té ngadji ang.
19Moïse aresè tar ndedji leo ang wa? Ke doou losè kada ngem tar ndedji ang. Mbata di a esangidjé deo ta tòlem wa?
20Dooudjé ke baya baya tél tar, I éh ke ndii ke madjang, doou di a sange deo ta tòli wa?
21Jésus tél pa aredè, Mam nda koula kada mbä, tokou ban mèsè toï isa.
22Moïse aresè tar koudja ta mote leo, mbata lo ngä Moïse ang, a to ngä ndjè gel koudjousè. Sésè oudjaidjé ta mote doou ndò sabbat té.
23Tokou doou are doudja ta motè ndò sabbat té ta ngem tar ndedji lo Moïse, ongou ösè dom té mbata mam nda rò mare doou dé madji ndò sabbat té wa?
24Egangidjé saria tokou kemsè wo ang, a egangidjé saria gaté gaté.
25Tokou ban maredjé horo ndjè ke Jérusalem té pana, Yèn to doou ke dèdè nsange deo ta tòlè ang wa?
26Woidjé, nao mpa tar no dooudjé té ke bel ang, a dèdè mpa sa tar kada ang. Mbaidjé lodjè geré tokoro nè nto Christ ndja wa?
27Djèdjè ngeré loou ke doou nèn ï kendé, a tokou Christ téh, doou kada a geré loou ke nï kendé ang.
28Tokou ban Jésus mpa ke tarr mè tokou kei Allah té, tokou nao ntòdjoudè tar. Nè mpana, Egeremdjé, a egeridjé loou ke mï kendé wa? Mam ndé ke mem ndja ang, nè ke noulam nè nto tokoro, a sésè egerèdjé ang.
29Mam ngerè, mbata mï béh la, ke nè noulam mbä.
30Tokou ban dèdè nsange deo ta kwèè, a doou kada wèè ang, mbata ndò la nai asang bai.
31A dooudjé baya baya ke horo dooudjé té, do mèdè té sa. Dèdè mpana, Tokou Christ a téh, nè na da né mori wota yéh ke doou nèn da wa?
32Pharisiendjé wo dooudjé baya baya ke ao maina tar horodè té mbata la. Tokou ndjè kòrdjé ke Pharisiendjé oula mare padjadjé ta kwèè.
33Tokou ban Jésus pana, Ma ma nai kesè ngadjiba, gè té ma mao rò nè té ke noulam.
34Sésè a sangemdjé, a kingamdjé ang. Loou té ke méh kendé, sésè asidjé téh ang.
35Tokou ban Juifdjé pa horodè té ndja, Doou nèn a kao ke da wa baa dja kase ta kingè ang wa? Nè na kao rò Juifdjé té ke särèna horo Grecdjé té, ke ta tòdjou tar Grecdjé wa?
36Tar ke nè mpa to di wa, Sésè a sangemdjé, a kingamdjé ang, ke, Loou ke méh kendé, sésè asidjé téh ang?
37Ndò ke goukou, tòkou ndò ke bo, Jésus arr mpa ke tarr, pana, Tokou doou ke kounda man öè, arè ndé rom té naih.
38Doou ke wo mèa té sem, man tébe a téh mèa té to ngamamoula, tokou maketourou lo Allah pa.
39Nè mpa tar lo Ndil ndja, ke dèdè ke do mèdè té sa data tèè gè té, mbata Ndil ndja nai dé ang bai, mbata Jésus nai taa piti ang bai.
40Tokou ban, gè té ke dèdè do tar nèn, maredjé horo dooudjé té ke baya baya pana, Tokoro nè nto prophète nèn ndja.
41Mare dooudjé pana, Doou nèn to Christ. Mare dooudjé pana, Yèn to di wa, Christ a téh Galilée té wa?
42Maketourou lo Allah pana Christ to doou ke gel David té ang wa, ke nè nï Bethléhem té, béh ke David éh kendé leo?
43Tokou ban tar tina ï horo dooudjé té ke baya baya mbata la.
44Maredjé horodè té ndiki ta kwèè, a doou kada wèè ang.
45Tokou ban padjadjé tél ao rò tòkou ndjè kòrdjé ke Pharisiendjé té, dèdè mpa dare padjadjén, Mbata di a edèidjé sa ang wa?
46Padjadjén lé pana, Ndò kada doou pa tar ban ang.
47Tokou ban Pharisiendjé tél tar, Nè neresè tò wa?
48Mare mbaidjé, aséh Pharisiendjé, do mèdè té sa wa?
49Dooudjé baya baya nèn ke geré tar ndedji ang, né tadji to dodè té.
50Nicodème, nè ke ndé rò Jésus té dongor, nè nto mare doou lodè kada, nè mpa naredè,
51Tar ndedji lodjè gange saria do doou té, tokou do tar la dongor ang, ke gel né ke nè nda wa?
52Dèdè ntél mpa darè, I to doou ke Galilée té tò wa? Esange, wo, mbata prophète kada ï Galilée té ang.
53Bana dèdè kada kada dao kei lodè.
Currently Selected:
Jean 7: KL1960
Highlight
Share
Copy
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here: