Psalmyn 40
40
PSAL. 40.
Expectans expectavi.
1Ren mee farkiaght dy-surransagh er y Chiarn:
as deaisht eh rhym, as cheayll eh my eam.
2Hug eh lesh mee neesht magh ass y lhag atchimagh, magh ass y lhaagh as y chray:
as hoie eh my chassyn er y chregg, as ren eh my immeeaght y oardrail.
3As t’eh er choyrt arrane noa ayns my veeall:
dy-jarroo, toyrt-booise gys y Jee ain.
4Nee ymmodee fakin shoh, as aggle y ghoaill:
as ver ad nyn dreishteil ayns y Chiarn.
5Bannit ta’n dooinney ta er hoiaghey e hreishteil ayns y Chiarn:
as nagh vel er hyndaa gys y vooinjer voyrnagh, as gys nyn lheid as ta goll mygeayrt lesh breagyn.
6O Hiarn my Yee, smooar ta ny obbraghyn yindyssagh t’ow uss er n’yannoo, myr ta neesht dty smooinaghtyn hooinyn:
as foast cha vel y dooinney shen oddys yn earroo oc y hoiaghey royd dy-kiart.
7Dy jinninsh goaill orrym dy hoilshaghey ad, as dy loayrt jeu:
veagh ad ny smoo na ta mee fondagh dy hoiaghey magh.
8Toyrtys casherick as bee-oural cha baïlts:
agh my chleayshyn t’ow er vosley.
9Chebballyn-losht, as oural son peccah cha vel oo er hirrey:
eisht dooyrt mish, Jeeagh, ta mee cheet.
10Ayns corp y lioar te er ny scrieu jee’ms, dy lhisins dt’aigney ’chooilleeney, O my Yee:
ta mee booiagh y yannoo eh; dy-jarroo ta’n leigh ayds er cheu-sthie dy my chree.
11Ta mee er hoilshaghey dty chairys ayns y chaglym mooar:
cur-my-ner, cha gum-ym my veillyn, O Hiarn, as shen ta fys ayd er.
12Cha vel mee er cheiltyn dty chairys cheu-sthie jeh my chree:
ta my haggloo er ny ve jeh dty ynrickys, as jeh dty haualtys.
13Cha vel mee er vreayll ergooyl dty vyghin as firrinys:
veih’n chaglym mooar.
14Ny tayrn dty vyghin ersooyl voym, O Hiarn:
lhig da dty chenjallys-ghraihagh as dty irriney dy-kinjagh mish y choadey.
15Son ta seaghyn er-skyn-earroo er jeet mygeayrt-y-moom; ta my pheccaghyn er ghoaill lheid y ghreme orrym, nagh vel mee abyl jeeaghyn seose:
sfeer eh, t’ad ny smoo ayns earroo na renaigyn my ching, as ta my chree dy m’ailleil.
16O Hiarn, lhig da ve dty aigney dy my livrey:
jean siyr, O Hiarn, dy chooney lhiam.
17Lhig dauesyn ve er nyn ghoyrt gys nearey, as er nyn gastey cooidjagh, ta shirrey lurg m’annym dy stroie eh:
lhig daue v’er nyn imman gour nyn drommey dy-scammyltagh, ta wooishal olk dou.
18Lhig daue ve treigit, as er nyn gooilleeney lesh nearey:
ta gra rhym, Fie ort, fie ort.
19Lhig dauesyn ooilley ta dy dty hirrey, ve gennal as boggoil ayn-yds:
as lhig dauesyn ta graihagh er dty haualtys, dy-kinjagh gra, Dy row moylley gys y Chiarn.
20Er my hon’s, ta mee boght as ymmyrchagh:
agh ta’n Chiarn kiarail er my hon.
21Uss my er-coonee as my er-kionnee:
ny lhig shiaghey foddey, O my Yee.
Currently Selected:
Psalmyn 40: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
