Psalmyn 39
39
PSAL. 39.
Dixi, Custodiam.
1Dooyrt mee, Goym tastey jeh my raaidyn:
nagh jean-ym peccah lesh my hengey.
2Smaght-ym my veeall myr lesh streean:
choud as ta’n vee-chrauee ayns my hilley.
3Chumm mee my hengey, as cha loayr mee veg:
va mee my-host, dy-jarroo, veih goan mie; agh va shoh pian as trimshey dou.
4Va my chree cheh cheu-sthie jee’m; as choud va mee myr shoh ayns smooinaghtyn dowin, ren yn aile greesaghey:
as ec y jerrey loayr mee lesh my hengey.
5Hiarn, cur toiggal dou jeh my yerrey, as earroo my laghyn:
dy vod shickyrys ’ve aym caid t’aym dy ve bio.
6Cur-my-ner, t’ow uss er n’yannoo my laghyn myr liurid reaish:
as cha vel my eash agh myr red gyn veg dy ve soyllit hoods; as dy-firrinagh ta dy-chooilley ghooinney bio ooilley-cooidjagh fardail.
7Son ta dooinney gimmeeaght ayns scadoo fardalagh, as dy voïrey eh hene ayns fardail:
t’eh stoyral seose berchys, as cha vel fys echey quoi yiow soylley jeu.
8As nish, Hiarn, cre ta my hreishteil?
ta my hreishteil dy-jarroo ayn-yds.
9Livrey mee veih ooilley my loghtyn:
as ny lhig dou ’ve son craid da’n vooinjer vee-chrauee.
10Va mee my-host, as cha doshil mee my veeal:
son dty yannoo’s ve.
11Scugh dty cherraghey voym:
ta mee dy-jarroo ceaut fo errey hrome dty laue.
12Tra t’ow uss ayns dty chorree smaghtaghey dooinney son peccah, t’ow coyrt er yn aalid echey goll mow, myr dy beagh eh garmad eeit lesh lhemeen:
cha vel dy-chooilley ghooinney er-y-fa shen agh fardail.
13Eaisht rish my phadjer, O Hiarn, as lesh dty chleayshyn cur geill da my accan:
ny bee uss dty-host ec my yheïr;
14Son ta mish my yoarree mârts, as my hroailtagh:
myr va ooilley m’ayraghyn.
15O ymmyrk lhiam son tammylt beg, dy voddym my niart y gheddyn reesht:
roish my vaag-ym yn seihll shoh, as nagh bee’m arragh er my akin.
Currently Selected:
Psalmyn 39: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
