Yunusa 4
4
Yunusa la dumɛŋɛ, Ala la kinikinɛ
1Kɔnɔ Yunusa bele ɲagalinden wo koe la feu, kɔnɔ feu, a mɔnɛta han! 2A ka Alatala mataran, a ko: «Ah! Alatala, n ka a lɔn de i mu Ala hinnɛnte le la, i mu kinikininte le la, i te dumɛn teriya la, i la kanunteya sɛnbɛ kolo, i mɛn si i la nata masara ɲagankata ma koe la. N to be n na jamanɛ tɔ nun, n ka wolo fɔ. Wolo ka a ma n borita teriya la tagala Taarisi. 3Alatala, n bata i táran, n faga kɔtɛ, bayi faga fisa n ɲɛ yannun n ni to baluren.» 4Alatala ka Yunusa jaabi, a ko: «Hali tɔɲa le i be dumɛnden de?»
5Yunusa bɔɔta saa tɔ ka taga sigi saa tele yɛlɛ tɔ. A ka leele sɔ ɲɔ, a sigita a niiniŋɛ kɔtɔ, a ni a fɛlɛ fen min be naala tanbila saa tɔ. 6Alatala nata lɔgɛ lafɛtɛn a fisa toila Yunusa ko, alako a ni niiniŋɛ dii Yunusa kuŋɛ ma ka jusu makasa bɔɔ a ma. Wo lɔgɛ la ko ka Yunusa sɛɛwa koola. 7Kɔnɔ wo tabantaka, ɲɔ la kɛnɛreŋɛ Ala ka tunbe lasanba, a naata don lɔgɛ tɔ, lɔgɛ balata.
8Wo kɔma, tele to bandita, Ala ka fɔɲɔ bandireŋɛ lasanba ka bɔɔ tele yɛlɛ. Tele nata sɔ Yunusa kuŋɛ ma sɛnbɛ la han a todula mafuta a ma. A ka faga hanige a fan ye. Wo kɔma a ka a fɔ, a ko: «N fagareŋɛ fisa n balureŋɛ ko.» 9Ala ka Yunusa maɲininka, a ko: «Tɔɲa le i be dumɛnden de kɛ lɔgɛ faga koe la?» Yunusa ka a jaabi, a ko: «Iyon, tɔɲa be n bolo n ni dumɛn kɛ lɔgɛ la ko la han n ni faga.»
10Wo kɔma, Alatala ka a fɔ a ye, a ko: «Ile be kinikiniren kɛ lɔgɛ ma. I ma fenfen ma a la ko tɔ, ile le ma a lakoloya. A fɛtɛnta suu dɔndɔ le, a fagata suu dɔndɔ. 11Kɔnɔ, Niniwu saa banba mɔgɛnu kan, anu kɔnte fisa siyala mɔgɔ wulu kɛmɛ wulu mugan ko, anun kolofeŋɛ siyama. Anu ma bolo ɲinma nun bolo mara tɛtɛgɛbɔɛ lɔn. Kaa, i bele diren de nde ni kinikini wo mɔgɛnu nun kolofeŋɛnu ma ba?»
Currently Selected:
Yunusa 4: MOG
Highlight
Share
Copy
Want to have your highlights saved across all your devices? Sign up or sign in
