Luki 1
1
Kuma lake koe Teyofili ma
1Teyofili ɲinma,
N bata a fɛlɛ, koenu minnu kamalita nun mɔ bata, mɔgɔ siyama bata kata wonu sɛbɛ koe la. 2Wo koe bɛ mata minnu ɲala, bɔɔla a fɔlɔ wagate, wonu mata wo kiila lakelanu la, anu ka a bɛ lake mɔ ma. Anu ka a lake ki min na, a sɛbɛlanu ka a sɛbɛ ɲɔgɔnna le. 3Wolo mu, nde tugun bata a hanige n ni wo koe bɛ masoe a ɲinma la, bɔɔla a fɔlɔ wagate. Wo kɔma n ni a sɛbɛ a sɛbɛ ɲa ma dɔndɔ dɔndɔ, n ni a lasanba i ma, 4alako i ka karaŋɛ min sɔtɔ, i ni a lɔn a beeyareŋɛ la wo mu tɔɲa yati le la.
Yaya malasuwɛla la ko
5Herodu be Juda duge mansaya tɔ wagate min tɔ nun, sarika lakelá do be ɲɔ min tɔgɔ Jakariyawa. A be Abiya la sarika lakela kuruŋɛ le tɔ. A la muse tɔgɔ Elisabɛti, a be bɔɔren Harona bɔnsɛ le tɔ#1:5 Harona mu sarika lakela banba fɔlɔfɔlɛ le la.. 6Anu fila bɛ mu mɔgɔ telendeŋɛ le la Ala ye. Anu be sɔren Marige Alatala la yamɔrenu kɔma anun a la sunnanu. Fenfen bele anu la. 7Den bele anu bolo, bayi Elisabɛti mu den sɔtɔbale le la, kɔtɛ anu fila bɛ bata kɔtɔya han.
8Lun do, sarika lake koe keta Jakariyawa la sarika lake kuruŋɛ ma, ka a fɔla anu ni taga sarika lakedula Ala ma. 9Anu ka tonbola ma sarika lakela la naamuɛ kɛɲa ma, tonbola ka Jakariyawa yen, a ni don Marige Alatala la hɔrɔma dingira butɔ, a ni sorayi bintan. 10A be sorayi bintanna wagate min tɔ, wo ka a taran jama banba be Ala mataranna bara tɔ. 11Wo tɛmuɛ le, Marige Alatala la maleka do nata a yɛtɛ labɔɔ Jakariyawa ma. Wo maleka be sɔren sorayi bintandula bolo ɲinma tɔ. 12Jakariyawa to ka a yen, a marakunta, a kilanta. 13Kɔnɔ maleka ka a fɔ a ye: «Jakariyawa, i kana kilan! I ka mamataraŋɛ min ma, Ala bata a jigan i ye. I la muse Elisabɛti si naa den kayireŋɛ sɔtɔ i ye, i ni a tɔgɔ sa Yaya. 14A si ma i ye sɛɛwa la, anun ɲagaliŋɛ. Mɔgɔ siyama si sɛɛwa a sɔtɔ koe la, 15bayi a si ma le mɔgɔ banba la, Marige Alatala ye. A te beere mɔɔli yo min. Yannun a nɛɛnɛ be a sɔtɔla wagate min tɔ, Ala Hakkili saniyandeŋɛ si to deŋɛ fɛ. 16A si bani Isirayila kaa siyama lasaagi le anu Marige Alatala ma. 17A si tagaman Marige Alatala ɲa tɔ, a ni wali hakkili saniyandeŋɛ barikɛ tɔ, iko annabi Eliya walita ki min na. Wo butɔ, a ni baabanu juse firifiri anu la deŋɛnu ma, a ni mɔgɔ murutɛreŋɛnu yɛlɛman ka anu si mɔgɔ telendeŋɛnu hakkile sɔtɔ, a ni mɔgɛnu tabɛn alako anu ni Marige Alatala mabita.»
18Jakariyawa ka maleka maɲininka, a ko: «N si laa wo la kama le? Nde bata kɔtɔya han, n na muse tugun bata simaya banba sɔtɔ.» 19Maleka ka a jaabi, a ko: «Jibirila le mu nde la, min be sɔla Ala kɛnna wagati bɛ. A be n kiiren de i ma, n ni kuma i ye, n ni na kɛ kibaru ɲinma lake i ma. 20I hakkile to, n ka kuma min fɔ i ye, i ma laa wo la. Wolo be i mala bobe la, i te nɔ kumala han n na kuma tini ban nakamalila lun min na. Iyon, wo lun tini ke n na kuma si lakamali.»
21Kɛ koe be tanbila wagate min tɔ, jama be Jakariyawa kɔnɔnden bara tɔ. Anu be kɔntɔfiliren a la mɛla hɔrɔma dingira butɔ. 22A to bɔɔta bara tɔ, a ma nɔ kuma fɔla anu ye. A tota koenu mamisalila anu ye, bayi a be boboren. Wo butɔ, anu ka a lɔn Ala bata ko do yita a la hɔrɔma dingira butɔ. 23Jakariyawa la wali wagate kamalita wagate min tɔ, a tagata a bata.
24Wo kɔma a la muse Elisabɛti ka bue jigan. Kari loolu a ma bɔɔ a bata. 25A ko: «Nde le mu ka, den sɔtɔbaliya maluya min be n na mɔgɛnu ɲala, Marige Alatala bata kinikini n ma a ni wo maluya bɔɔ n ma.»
Maleka la kereŋɛ Mariyama bata
26Elisabɛti bue to ka kari wɔɔrɔ bɔɔ, Ala ka maleka Jibirila kii saa do tɔ Galile duge tɔ, saa min tɔgɔ Nasarɛti. 27A tagata den musereŋɛ do bata ɲɔ, min tɔgɔ Mariyama. Wo Mariyama ma kayi koe fɔlɛ ma betunna. Wo ka a taran, kaye do be a futula min tɔgɔ Yusufu. Wo Yusufu mu mansa Dauda bɔnsɛ le la. 28Maleka donta Mariyama bata, a ka a fɔ: «I mama, ile min bata Marige Alatala la hinnɛnteya sɔtɔ, Marige be i ye.» 29Wo kɔntɔre ka Mariyama mafu koola, a ka a fan maɲininka kɛ kɔntɔre be fen min fɔren. 30Maleka ka a fɔ a ye, a ko: «Mariyama i kana kilan! Ala bata hinnɛ i la. 31I hakkile to, i si naa bue jigan i ni den kayireŋɛ sɔtɔ. I si a tɔgɔ sa Isa. 32A tɔnɛ si naa koloya han. Anu si naa a fɔ a ma: ‹Ala min mayɛlɛta, a la den kayireŋɛ›. Marige Alatala si a benba mansa Dauda la mansaya dii a ma. 33A si naa ma mansa la, Yaguba bɔnsɛ kunma kudai, a la mansaya te ban feu.» 34Mariyama ka maleka maɲininka, a ko: «N to ma sa kayi kɔma betunna, wo si nɔ mala kama le?» 35Maleka ka a jaabi, a ko: «Ala Hakkili saniyandeŋɛ si naa jigi i ma. Ala min mayɛlɛta, a sɛnbɛ si butin i kunma iko niiniŋɛ. Wolo mu i be den saniyandeŋɛ min sɔtɔla, a si fɔ wo ma ‹Ala la den kayireŋɛ›. 36A fɛlɛ i bareŋɛ Elisabɛti, anu be a fɔla a ma nun den sɔtɔ bale, ale tugun bata bue jigan den kayireŋɛ la a la mamakɔtɔya butɔ. A kari wɔɔrɔɲɔgɛ le ka. 37I ni a lɔn fenfen bele Ala te nɔ min mala.» 38Mariyama ka a jaabi: «Marige la jon muse le ka. I la kuma be ki min na, Ala mu a mala n ɲɛ ɲɔgɔn na.» Wo kɔma, maleka bɔɔta Mariyama kɛnna, a tagata.
Mariyama la taga Elisabɛti bata
39Mariyama wulita wo wagate tɔ, a teriyata tagala saa do tɔ Juda duge tɔ, kɔnkɛnu tɔ. 40A keta ɲɔ, a donta Jakariyawa la boŋɛ tɔ, a ka Elisabɛti kɔntɔn. 41Bɔɔla Elisabɛti ka Mariyama kɔntɔri kulɛ mɔɛ, a la deŋɛ ka a lamaga a bue tɔ. Wo tɛmuɛ, Hakkili saniyandeŋɛ jigita Elisabɛti ma. 42A belebeleta a kulɛ mayɛlɛreŋɛ la, a ko:
«Ala bata hɛra ma i ye ka tanbi muse bɛ la.
Deŋɛ min be i bue tɔ, hɛra be wo tugun ye.
43N Marige nɛɛnɛ bata na n kɔntɔndula: fen de be a maren Ala be kɛ biliya diiren n ma? 44I ma a yen, bɔɔla n ka i kɔntɔri kulɛ mɔɛ, deŋɛ sɛɛwata, a ka a lamaga n bue tɔ. 45Hɛra be i ye, bayi i bata laa a la, Marige Alatala si a la kuma lakamali le.»
Mariyama la Ala tantue
46Mariyama ko:
«N si Marige matɔgɔ le n juse tɔ.
47N be sɛɛwaren n nɛ tɔ Ala la ko la, n na malakisila,
48bayi a bata hinnɛ nde la,
a la jon muse fan majigireŋɛ.
Bi kɔma, bɔnsɔ yo bɔnsɔ si naa a fɔ nde ma kudai, musu sɛɛwareŋɛ,
49bayi Ala sɛnbɛ tige bata ko banbanu ma n ɲɛ.
A tɔgɛ saniyanta.
50Mɔgɛnu minnu be kilanden a la,
a si hinnɛ le wonu la kudai.
51Ala si a sɛnbɛ yita a bole la:
Fan nakoloya be minnu juse tɔ, a si anu malansan.
52A si mansanu lajigi anu la mansa tintiŋɛ tɔ,
a si fan majigilanu la ko mayɛlɛ.
53A si kɔnkɔtɔɛnu lawasa ko ɲinmanu la,
a si nafulu tigenu lataga anu bolo tɛsɛŋɛ la.
54A si a la joŋɛ bani Isirayila jama dɛman.
A si a la kinikinɛ talɔn,
55a ka min ma mɔ benba Iburahima nun a bɔnsɛ ye kudai,
iko a ka lahire jigan anu ye ki min na nun.»
56Awa, Mariyama tota Elisabɛti fɛ ɲɔ, fayida kari saba, wo kɔma a saagita a bata.
Yaya sɔtɔ tɛmuɛ
57Elisabɛti kana wagate to keta, a kanata den kayireŋɛ la. 58A sigiɲɔgɛnu, anun a bareŋɛnu ka a mɔɛ, ka a fɔla Marige Alatala bata kinikini a ma, a ka ko banba ma a ye. Anu bɛ be sɛɛwaren a fɛ. 59A tele sagin luŋɛ anu nata bɔɔbɛ sunnadula, anu dita a tɔgɔ sala a baaba Jakariyawa la, 60kɔnɔ a nɛɛnɛ ka anu jaabi, a ko: «Ade de! A tɔgɛ be sala le Yaya.» 61Anu ka a fɔ a ye: «Mɔgɔ yo bele i bareŋɛnu tɛma min tɔgɔ Yaya.» 62Anu ka koenu mamisali a baaba ye, alako anu ni a lɔn ale be diren a tɔgɛ ni sa ki min na. 63A ka wala makele, a ka sɛbɛre ma a tɔ, a ko: «A tɔgɛ be sala le Yaya.» Anu bɛ kaabɛta. 64A da lakata kisanna, a nɛŋɛ lafulenta. A bakkuta kumala, a ka Ala tantu. 65Saa fɛfɛ mɔgɛnu bɛ kilanta. Wo kumanu mafɔta Juda duge kɔnkɛ dula bɛ tɔ. 66Wo lamɔɛlá bɛ ka wo mandi anu juse tɔ, anu be a fɔla aa kɛ dendeŋɛ si nɔ mala fen min na, bayi Marige Alatala bole yati be a kɔtɔ.
Jakariyawa la Ala tantue
67Wo tɛmuɛ, Ala Hakkili saniyandeŋɛ jigita Yaya baaba Jakariyawa ma, a ka waluwe kuma fɔ, a ko:
68«Tantue be Marige Alatala ye, bani Isirayila mɔgɛnu la Ala,
bayi a bata hinnɛ a la jama la, a ni anu kunka.
69A bata malakisila sɛnbɛma labɔɔ kɛnɛ tɔ wo mɔ ye, min be mala mansa la,
a la jondeŋɛ Dauda bɔnsɛ tɔ.
70Ala bata wo ma iko a ka a fɔ ki min na nabiyonmɛ saniyandeŋɛnu sabu la,
ka bɔɔ hau:
71Wo malakisilá si wo mɔ lakisi mɔ jaguenu ma,
a ni mɔ bɔɔ mɔ kɔnnɛlanu bɛ bolo.
72Wo butɔ, a hinnɛta wo mɔ benbanu la,
a ka a la lahiri saniyandeŋɛ la ko talɔn.
73A ka a kali wo mɔ benba Iburahima ye,
a si min dii wo mɔ ma:
74A ni wo mɔ bosi mɔ jaguenu bolo,
a ni wo mɔ lakisi kilaŋɛ ma, alako wo mɔ ni a batu,
75saniyaŋɛ tɔ, anun teleŋɛ la.
Mɔ ni tagaman Ala ɲala ɲɔgɔnna, han wo mɔ la simaya ni ban.
76Awa, ile n na denden deŋɛ, a si fɔ i ma,
Ala min mayɛlɛta, wo la nabiyonmɛ.
I si tagaman Marige ɲatɔ, i ni kila tabɛn a ye,
77I ni a la jama lalɔn, a si naa anu lakisi.
A si anu la junubenu kafari,
78bayi mɔ la Ala mu kinikininte banba le la.
Wo butɔ le, a si kɛnɛ labɔɔ wo mɔ ye bɔɔla saŋɛ tɔ,
iko tele to be bɔɔla,
79alako wo mɔle minnu be dibe tɔ,
saya dibe be wo mɔle minnu mabutinden,
a ni wo mɔ lakɛnɛ,
alako a ni wo mɔ kɛŋɛ latelen jususa kila tɔ.»
Yaya la koloya ɲa
80Awa, wo dendeŋɛ be koloyala, a be sɛnbɛ sɔtɔla hakkile la. A tagata to janfue butɔ han a ka a fan nabɔɔ bani Isirayila mɔgɛnu ma lun min na.
Currently Selected:
Luki 1: MOG
Highlight
Share
Copy
Want to have your highlights saved across all your devices? Sign up or sign in
