Kiilanu 5

Ananiya nun Safira la ko

1Kaye do be ɲɔ nun min tɔgɔ Ananiya, anun a la muse Safira, anu ka anu la duge do san. 2Anu fila bɛnta a ma anu ni do bɔɔ dugu sɔŋɛ la, ka a dogon. Wo kɔma, Ananiya tagata a tɔɛ fɛ, a ka a sa kiilanu kɛn kɔtɔ. 3Wo butɔ, Piyɛri ka a fɔ a ye, a ko: «Ananiya, Sentanɛ donta i tɔ fenna han i ka foniya fɔ Ala Hakkili saniyandeŋɛ ye, do bɔɔ koe la dugu sɔŋɛ la? 4A ma san wagate min tɔ, i tɛŋɛ ma a la nun ba? A sandeŋɛ kɔma, a sɔŋɛ bele i sagoe tɔ ba? Kɛ mira donta i tɔ fenna? I ma foniya fɔ mɔgɛnu ye, i ka a fɔ Ala yɛtɛ le ye.» 5Ananiya to ka wo kumanu mɔɛ, a boeta, a nɛ bɔɔta. Minnu bɛ ka wo koe mɔɛ, wonu kilanta koola. 6Awa, kamareŋɛ donu wulita, anu tagata a kasange, anu ka a doni a baadɛdula.

7Fayida wagati saba latanbireŋɛ kɔma, Ananiya la muse tugun donta ɲɔ. A ma a lɔn koe min mata. 8Piyɛri ka a maɲininka, a ko: «Wo ka duge san kɛ bere le la ba? Wo fɔ n ɲɛ.» A ka a fɔ: «Iyon, mɔ ka a san wo bere le la.» 9Piyɛri ka a fɔ a ye, a ko: «Wo bɛnta fenna Marige Hakkili saniyandeŋɛ mafɛlɛ koe la? Awa, minnu ka i la kaye fagareŋɛ mandi, ande le be bonda tɔ ka. Anu be ile tugun donila le.» 10Muse boeta Piyɛri kɛn kɔtɔ kisanna, a nɛ bɔɔta. Kamareŋɛnu donta, anu ka wo tugun fagareŋɛ taran, anu ka a labɔɔ, anu tagata a baadɛ a la kaye kɛnna. 11Dɛnkɛnɛyabaganu bɛ labɛndeŋɛ anun minnu bɛ ka wo koe mɔɛ, anu bɛ kilanta koola.

Laamutenu nun kabanakoenu

12Laamute nun kabanako siyama be mala kiilanu bolo mɔgɛnu ɲala. Dɛnkɛnɛyabaganu bɛ be madɛnden hanigi dɔndɔ la Sulemani la Ala batu boŋɛ ɲinbe kɔtɔ. 13Mɔgɔ tɔɛnu ma suusɛ basanna anu fɛ, kɔnɔ anu bɛ be anu matɔgɔla koola. 14Minnu be dɛnkɛnɛyaren Marige ma, jama banba tota sala anu kunma, muse nun kaye. 15Wo tɛmuɛ, mɔgɛnu be bandibaganu labɔɔla bara tɔ, anu be anu sala benbenu tɔ, anun waatanu tɔ, alako Piyɛri tini be tanbila wagate min tɔ, hali a niiniŋɛ ni sɔ donu kan kunma. 16Jama tota bɔɔla Darisalamu lamiliŋɛ tugun tɔ, anu ni bandibaganu nati, anun jinna koroŋɛ be minnu tɔɔrɔla, wo butɔ wonu bɛ kendeyata.

Kiilanu makankan koe

17Wo butɔ, sarika lakela kuntige nun minnu be a kɔma, minnu be tabɛnden Sadusinu ma, bɛsɛnkɔnnɛya tota anu tɔ koola, anu wulita, 18anu ka kiilanu bita, anu ka anu sa geele tɔ jama ɲala. 19Kɔnɔ sue tɔ, Marige la maleka ka geele bonda laka, a ka anu labɔɔ. A ka a fɔ anu ye, a ko: 20«Wo taga, wo ni sɔ Ala batu bon banba tɔ, wo ni Ala la kibare bɛ lake jama ma, anu si kisi ki min na.» 21Anu la wo mɔɛreŋɛ, ɲɔ to kɛnɛta, anu donta Ala batu bon banba tɔ, anu ka kawande fɔlɔ mala.

Sarika lakela kuntige nun minnu be a kɔma, anu ka Yahude kuntigenu nun bani Isirayila kayiba bɛ kele mamadɛŋɛ tɔ. Anu ka kɔsɔbilenu kii geele tɔ, kiilanu jigandula. 22Kɔnɔ anu to keta ɲɔ, anu ma anu taran ɲɔ. Wo butɔ, anu saagita, anu ka dantɛgɛ sa, 23anu ko: «Mɔ bata geele bondanu taran balanden a ɲinma la, geele kantalanu be sɔren bondanu tɔ. Kɔnɔ mɔ to ka anu laka, mɔ ma mɔgɔ yo taran a butɔ.» 24Ala batu bon banba kɔsɔbile kuntige, anun sarika lakela kuntigenu la wo kumanu mɔɛreŋɛ, anu kɔntɔfilita kiilanu la ko la, fen min be tanbiren. 25Wo butɔ, mɔgɔ do tugun tagata a fɔ anu ye: «Wo ka kaye minnu sa geele tɔ, anu be sɔren Ala batu bon banba tɔ le ka, anu be jama kawandila.»

26Awa, kɔsɔbilenu anun anu la kuŋɛ tagata kiilanu kɔma. Kɔnɔ anu ma nɔɛ laboe anu ma, bayi anu be kilanden jama kana naala anu mabunna kurenu la. 27Anu to ka kiilanu doni anu ka anu sɔ Yahude kuntigenu la mamadɛŋɛ tɔ. Sarika lakela kuntigi banba ka anu maɲininka, a ko: 28«Mɔ ma wo latɔn de ba a bɛlɛma la, ka a fɔla wo kana kawande ma kɛ kaye tɔgɛ la? Kɔnɔ wo a fɛlɛ, wo bata wo la kawande malansan Darisalamu bɛ tɔ. Wo butɔ, a sɔgɔ be wo la wo ni kɛ kaye faga koe kiti mɔle le la.» 29Piyɛri nun kiila doenu ka anu jaabi, anu ko: «Fɔ mɔ ni Ala le la kuma bita tanbi mɔgɛnu tɛŋɛ la. 30Wo mɔ benbanu la Ala ka Isa lawuli, wo ka min banban lɔgɛ tɔ, ka a nɛ bɔɔ. 31Wo kɔma, a ka ale layɛlɛ saŋɛ tɔ a bolo ɲinma tɔ, a ni ma mansa nun malakisila la, alako bani Isirayila mɔgɛnu ni nɔ tuubɛla, anu junube ni kafari. 32Mɔ mu wo koenu seede la. Ala bata Hakkili saniyandeŋɛ min dii a la kuma bitalanu ma, wo Hakkile saniyandeŋɛ tugun mu kɛ koenu seede la.»

33Yahude kuntigenu to ka wo mɔɛ, anu juse yɛlɛta koola. Kiilanu faga sɔgɛ ka anu bita. 34Wo tɛmuɛ, Farisi kayiba do be ɲɔ, a tɔgɔ Gamaliyɛli. Sariya karamɔgɔ banba le mu a la, jama bɛ be a biliyaren. A wulita Yahude kuntigenu tɛma, a ka yamɔre sa anu ni kiilanu labɔɔ betunna. 35A mɛn ka a fɔ kuntigenu ye, a ko: «Wole bani Isirayila kaanu, wo mɛnni koola wo be min mala kɛ mɔgɛnu la. 36Wo ka a lɔn wagate do tanbireŋɛ, kaye do be min tɔgɔ Tedasi, a wulita a ka a yɛtɛ matɔgɔ kamarenbaya la. Kaye minnu be a kɔma, a si mɔgɔ kɛmɛ naani ɲɔgɔn bɔɔ. Anu ka a faga: min bɛ si a la kuma bita, anu malansanta, anu la ko mata fufafu la. 37Wo to tanbita, Judasi Galile kaa wulita tɔgɔ sɛbɛ tɛmuɛ, a ka mɔgɔ siyama lamurutɛ. Ale tugun fagata: min bɛ si a la kuma bita, anu malansanta. 38Awa, n ni tɔɲa fɔ wo ye kɔtɛ: wo kana fenfen ma kɛ mɔgɛnu la, wo bɔɔ anu kɔma. Ka kɛ natá wale be fatanden mɔgɛnu le la, a si to fu. 39Kɔnɔ ka a be fatanden Ala le la, wo te nɔ anu la ko kunnatiɲala. Ka wo ma wo nun Ala yati be kɛlɛla go!»

Anu bɛnta wo ma. 40Wo butɔ, anu ka kiilanu kele anu ka anu botege, anu mɛn ka anu latɔn kuma koe la Isa tɔgɛ la bitugun. Wo kɔma, anu ka anu boloka.

41Kiilanu to bɔɔta Yahude kuntigenu la mamadɛŋɛ tɔ, anu juse diyata anu ye, bayi Ala ka ande le masubɛ, anu ni tɔɔrɔ Isa tɔgɛ la ko la. 42Lun go lun, anu be Ala batu bon banba tɔ, anu mɛn be tagala mɔgɛnu bata, anu ma kawande ma dan, anu ni kɛnɛ Isa la kibaru ɲinma lakela ka a fɔla Ala la mɔgɔ masubɛreŋɛ le mu a la.

Currently Selected:

Kiilanu 5: MOG

Highlight

Copy