Kiilanu 4

Kiila fila bita koe

1Piyɛri nun Yaya to be kumala jama ye, sarika lakelanu anun Ala batu bon banba kɔsɔbile kuntige nun Sadusinu nata anu digii ma. 2Anu be mɔnɛren han, bayi Piyɛri nun Yaya be mɔgɛnu kawandila, anu ko mɔgɔ fagareŋɛnu si naa tawuli le Isa la ko sabu la. 3Wo butɔ, anu ka Piyɛri nun Yaya bita, anu ka anu sa geele tɔ han wo tabantaka, bayi wo ka a taran sue ɲan bata don. 4Adun, minnu ka wo kawande mɔɛ, anu siyama dɛnkɛnɛyata han anu kɔnte ka mɔgɔ wulu loolu ɲɔgɔn bɔɔ.

5Wo tabantaka, Yahudenu la kuntigenu, anun kayibanu, anun sariya karamɔgɛnu madɛnta Darisalamu, 6anun Hanasi sarika lakela kuntigi banba, anun Kayifa, anun Yaya nun Alɛsandiri, anun minnu bɛ mu sarika lakela kuntige bareŋɛ la. 7Anu ka Piyɛri nun Yaya sɔ anu tɛma anu ka anu maɲininka, anu ko: «Wole, wo ka kɛ kaye lakendeya sɛnbɛ miniman na? Wo ka kɛ ma tɔgɔ miniman na?»

8Wo butɔ, Piyɛri ka a fɔ Hakkili Saniyandeŋɛ barikɛ tɔ, a ko anu ma: 9«Wole bani Isirayila kuntigenu anun kayibanu, wo be mɔ maɲininkala bi ko ɲinma la ko la, mɔ ka min ma kɛ namata ye, a kendeyata ki min na. 10Wo butɔ, wole nun bani Isirayila kaanu bɛ ni a lɔn, kɛ kaye min be sɔren yan wo ɲala, a kendeyata Isa Nasarɛti kaa, Ala la mɔgɔ masubɛreŋɛ tɔgɛ le sabu la. Wole ka Isa min banban lɔgɛ tɔ, Ala kan ka a lawuli fagabaganu tɛma. 11Kitabue be Isa le la ko fɔren, a ko:

Wole bon sɔlanu bata kure min aɲɛ,

wolo be maren boŋɛ fondoma sigi kure la. # 4:11 Jabura, sora 118, haaya 22 fɛlɛ.

Awa, wo kure mu Isa le la. 12Mɔgɛ te kisi dodo fɛ fɔ ale, iyon tɔgɔ do yo bele dunuya Ala be min diiren mɔgɛnu ma. Fɔ wo mɔ ni kisi ale le la ko sabu la tekku!»

13Kuntigenu to be Piyɛri nun Yaya la limaniya yenden, a mɛn anu ka lɔn sɔtɔ a ma wonu mu karanbale mɔgɔ tun de la, anu be kaabɛren. Wo kɔma, anu ka a talɔn, wonu nun Isa le tota ɲɔgɔn na. 14Anu to be kaye kendeyareŋɛ yenden sɔren anu kɛnna, anu ma nɔ anu jaabila fenfen na. 15Wo butɔ, anu ka Piyɛri nun Yaya nun wo kaye yamɔri, anu ni bɔɔ Yahude kuntigenu la mamadɛŋɛ tɔ. Wo kɔma, kuntigenu tota hakkile diila ɲɔgɔn ma, 16anu ko: «Mɔ si fen ma kɛ mɔgɛnu la? Darisalamu kaanu bɛ bata a lɔn, kabanako makɛnɛreŋɛ le be maren anu la ko sabu la. Mɔle tugun te nɔ wo sɔsɔre mala. 17Kɔnɔ mɔ bɛnta le mɔ ni anu ladan ka anu makilan, anu kana kuma mɔgɔ yo ye bitugun ale Isa tɔgɛ la, alako kɛ koe mɛn kana to malansanna jamanɛ butɔ.»

18Wo kɔma, anu ka Piyɛri nun Yaya kele, anu kɔnkɔnta anu ma a bɛlɛma la, ka a fɔla anu kana Isa la ko fɔ, anu kana mɔgɔ yo kawandi a tɔgɛ la bitugun. 19Kɔnɔ Piyɛri nun Yaya ka anu jaabi, anu ko: «A bɛnta Ala ye mɔ ni sɔ wole le kɔma ba, ka Ala? Wole ká a fɛlɛ. 20Mɔle kan ka koe minnu yen, mɔ ka anu mɔɛ, a fɛrɛ bele fɔ mɔ ni wonu fɔ tekku.» 21Kuntigenu ma anu tɔɔrɔ fɛrɛ yo sɔtɔ, jama la ko la, bayi mɔgɛ bɛ be Ala matɔgɔla wo ko mareŋɛ sabu la. Wo butɔ, anu mɛn ka anu makilan, jɔ anu ka anu boloka. 22Kɛ kaye min nakendeya mata kabanakoe la, wo ka a taran, a la simaya bata tanbi san bi naani la.

Dɛnkɛnɛyabaganu la Ala mataraŋɛ

23Piyɛri nun Yaya bolokata wagate min tɔ, anu tagata anu kafuɲɔgɛnu dula, anu ka a ɲamakaran anu ye, sarika lakela kuntigenu anun kayibanu ka min bɛ fɔ anu ye. 24Anu to ka wo mɔɛ, anu bɛ ka anu kulɛ labɔɔ Ala mataraŋɛ la hanige dɔndɔ la, anu ko: «Batu mansa, ile min ka saŋɛ nun duge da, anun ba nun anu butɔ feŋɛ bɛ la. 25Mɔ benba Dauda i la jondeŋɛ kumata i Hakkili saniyandeŋɛ sabu la, a ka a fɔ:

‹Seenu be mɔnɛren fenna?

Bɔnsɛnu be janfa fufafue makitiren fenna?

26 Dunuya mansanu bata wuli kɛlɛ ma koe la,

kuntigenu bata bɛn Marige Ala anun a la mɔgɔ masubɛreŋɛ kunma.› # 4:26 Jabura, sora 2, haaya 1-2 fɛlɛ.

27Iyon, Herodu nun Pɔnsu Pilati, anun sii gbɛtɛ mɔgɛnu, anun bani Isirayila bɔnsɛnu yati bata bɛn kɛ saa tɔ, i la jonden saniyandeŋɛ Isa kunma, i ka min masubɛ. 28Anu ka kɛ koe bɛ ma i sagoe nun i la yamɔre butɔ iko i ka a sa ki min na bɔɔla bima. 29Marige, i ni i hakkile to a ma kɔtɛ anu ka mɔ makilan ki min na. I ni i la jondeŋɛnu kɔ limaniya banba la i la kuma fɔ koe la. 30Wo butɔ, i ni i sɛnbɛ yita mɔgɛ lakendeya koe la, i ni misalenu nun kabanakoenu ma i la jonden saniyandeŋɛ Isa tɔgɛ la.»

31Anu to ka Ala mataraŋɛ ban, anu be madɛnden dula min tɔ, ɲɔ sɛrɛnta. Hakkili saniyandeŋɛ ka sɛnbɛ dii anu bɛ ma, anu fɔlɔta Ala la kuma fɔla limaniya la.

Bolofeŋɛnu fatan koe

32Awa, mɔgɛnu minnu mata dɛnkɛnɛyabaga la, anu bɛ natá dɔndɔ, anu bɛ hanigi dɔndɔ. Hali dɔndɔ bele a fɔla anu tɛma, aa a bolofeŋɛ ni ma a dɔrɔn tɛŋɛ la: fɔ a bɛ ni ma jama bɛ tɛŋɛ la. 33Kiilanu tota seedeɲɔgɔya bɔɔla sɛnbɛ banba la Marige Isa lawuli koe la. Nɛɛma banba tota anu bɛ ye. 34Fondobɔnɔ yo bele anu tɛma, bayi dugenu ka wo ma boŋɛnu be minnu bolo, wonu be anu mayitala, anu ni a sɔŋɛ nafule nati, 35ka a sa kiilanu kɛn kɔtɔ. Wonu be a fatanna a bɛ hajue bere ma.

36Wo ka a taran, Lewi bɔnsɛ kaye do be, min sɔtɔta Sipiri sure tɔ, a tɔgɔ Yusufu. Kiilanu ka a tɔgɔ sa Baranabasi, wo kɔtɔ be a fɔren de «Malasiilá». 37Duge do be a bolo, a ka wo san, a nata a sɔŋɛ nafule fɛ, a ka a sa kiilanu kɛn kɔtɔ.

Currently Selected:

Kiilanu 4: MOG

Highlight

Copy