Kiilanu 6
6
Kayi wɔrɔwila minnu be kiilanu dɛmanna
1Wo tɛmuɛnu tɔ, Isa la talibenu kɔnte to be kunmasala, minnu be Girɛki kuma fɔla anu tɔ, wonu ka anu fan madi doenu ma minnu be Hebure kuma fɔla, bayi lun go lun, harige tini be fatanna wagate min tɔ, fasaa si ma le furuɲa musenu la minnu be Girɛki kuma fɔla. 2Wo butɔ, kiila tan nun fila ka talibi jama labɛndeŋɛ kele, anu ka a fɔ wonu ye: «A ma bɛn mɔle ni Ala la kuma lake koe to ɲɔ, mɔ ni harige fatan. 3Wolo mu, mɔ nɛɛnɛdɔndɛnu, wo ni kaye magankutu ɲinma wɔrɔwila masubɛ wo tɛma, hakkilima mu minnu la, Hakkili saniyandeŋɛ barikɛ be minnu tɔ. Mɔ ni wonu sɔ fatari dula. 4Mɔle tugun ni mɔ tɛ kiti Ala mataraŋɛ la, anun Ala la kuma lake koe la.»
5Wo kuma ka jama bɛ hɛnɛ, wo butɔ anu ka Etiyɛn masubɛ, kaye min na dɛnkɛnɛya kolo, Hakkili saniyandeŋɛ barikɛ be a tɔ, ale nun Filipu, nun Pirokori, anun Nikanori, nun Timon, nun Paramena, nun Nikola Antiyoki kaa min donta Yahudenu la diina tɔ nun. 6Anu ka wonu dantɛgɛ kiilanu ye. Wonu ka Ala mataran anu ye, anu ka anu bole sa anu kuŋɛ ma.
7Ala la kuma tota yiriwala, talibenu kɔnte tota kunmasala a banba la Darisalamu. Sarika lakela jama banba tugun sɔnta dɛnkɛnɛya kila la ko ma.
Etiyɛn bita koe
8Ala ka Etiyɛn kan kɔ nɛɛma nun sɛnbɛ banba la, wo butɔ, a tota kabanako nun laamute banbanu mala jama tɛma. 9Kɔnɔ Yahudenu minnu be bɔɔren Sirɛni nun Alɛsandiri saanu tɔ anun minnu be bɔɔren Silisi nun Asi duge tɔ, minnu be madɛnna kawandi ma boŋɛ tɔ, min tɔgɔ hɔrɔya mɔgɛnu la kawandi ma boŋɛ, wonu donu wulita, anu ka Etiyɛn nasɔnkɔ. 10A to be kumala hakkilimaya butɔ nun Hakkili saniyandeŋɛ barikɛ tɔ, anu ma nɔ sɔtɔ a ma. 11Wo butɔ, anu ka kaye donu sunɛ anu ni a janfa, ka a fɔla: «Mɔ bata a kulɛ mɔɛ a be tana kumanu fɔla Musa nun Ala kunma.» 12Wo butɔ, anu ka jama nun kayibanu, anun sariya karamɔgɛnu tugun bu tadon, wo kɔma anu tagata giripɛ a ma, anu ka a doni Yahude kuntigenu la mamadɛŋɛ dula. 13Anu mɛn ka seede foniyantenu tugun kele ɲɔ, wonu ko: «Kɛ kaye bele sɔnna bɔɔla tana kuma fɔ koe la Ala batu bon saniyandeŋɛ nun Taureta Musa kunma. 14Mɔ ka a mɔɛ le yati a fɔla aa ale Isa Nasarɛti kaa si naa kɛ dula tiɲa, Musa tugun ka mɔ lakaran naamuŋɛ minnu la, aa a ni wonu mafalin.» 15Wo tɛmuɛ, min bɛ be sigiren Yahude kuntigenu la mamadɛŋɛ tɔ, wonu ka anu ɲa banban Etiyɛn ma: a ɲakɔtɔ tota anu ye iko maleka ɲakɔtɔ.
Currently Selected:
Kiilanu 6: MOG
Highlight
Share
Copy
Want to have your highlights saved across all your devices? Sign up or sign in
