1 Samiyɛli 30
30
Amaleki kaanu la Dauda la saa tiɲa koe
1A tele saba luŋɛ, Dauda donta Sikilagi, ale nun a la sɔɔrenu. Anu ka a taran, Amaleki kaanu bata boe anu bata ma nun, Juda duge bolo ɲinma mafanna, anun Sikilagi mafanna. Anu ka Sikilagi saa tiɲa, ka a bintan. 2Musenu anun mɔgɔ tɔɛnu minnu bɛ be ɲɔ, anu ka anu bita, kabɔɔ dendeŋɛnu ma, han kayibanu. Anu ma mɔgɔ yo faga, fɔ anu to ka anu sɔ kila tɔ, ka anu doni. 3Dauda nun a la mɔgɛnu to keta anu la wo saa ma, anu ka a taran aa saa bata bintan. Anu la musenu ba, anu la den kayireŋɛnu ba, anu la den musereŋɛnu ba, anu bɛ bata bita nun. 4Wo butɔ, Dauda nun a la jama minnu be a kɔma, anu dita han anu sɛnbɛ banta dire la. 5Anu bata Dauda la musu fila tugun doni anu fɛ: Ahinoyamu Jisirewɛli kaa, anun Abigayili, Nabali la furuɲa muse, Karimɛli kaa.
6Dauda lakɛtɛnta koola, bayi jama be a fɔla wo wagate, aa anu ni a mabun kurenu la, bɛ juse bata maɲaku a ma anu la den kayireŋɛnu nun den musereŋɛnu la ko la. Kɔnɔ Dauda ka limaniya jigan, a ka a hakkile sɔ Alatala ma, a la Ala. 7A ka a fɔ Ahimelɛki la den kayireŋɛ Abiyatari sarika lakelá ye, a ko: «Ala sago lɔn koe feŋɛnu nati.» Abiyatari ka wo nati Dauda ye. 8Dauda ka Alatala maɲininka, a ko: «Ka n tagata kɛ boenmalanu kɔma, n si anu take ba?» Alatala ka a jaabi, a ko: «Taga anu kɔma, i si anu take le yati, i mɛn si wo mɔgɛnu bɛ nati le.»
Dauda la Amaleki boenmalanu nɔ koe
9-10Dauda nun a la kayi mɔgɔ kɛmɛ wɔɔrɛ tagata, anu keta Besori kɔɛɛ woyi dula. A la mɔgɔ kɛmɛ fila minnu be jɔnfɔnden, wonu sɔta ɲɔ le: anu ma nɔ tanbila Besori kɔɛɛ woyi dula la, bayi anu bata kori kɔfu. Dauda nun wo mɔgɔ kɛmɛ naani tɔɛ kan ka anu la kila jokki.
11Anu ka kamareŋɛ do taran saren kila da la, Misira kaa le mu a la. Dauda la mɔgɛnu ka a nati a ye. Anu ka dɔmɛ nun je dii a ma, 12anu ka toori labalareŋɛ dii a ma, anun rɛsɛn labalareŋɛ mɔndɔ fila. A to banta a daɲinila, a ka a yɛtɛ talɔn, bayi a bata tele saba bɔɔ nun, a ma a daɲini, a ma ji min. 13Dauda ka a maɲininka, a ko: «Ɲɔmɔ le tɛn mu i la, mina kaa le mu i la?» A ka a jaabi: «Misira kaa le mu n na, Amaleki kaa do le la joŋɛ mu n na. A tele saba le ka, bɔɔla n marige ka n boloka, bayi n bele kendeyaren nun. 14Mɔle le tagata boe nun Kereti kaanu la duge ma tele bɔɛ bolo ɲinma mafanna, anun Juda duge ma, anun Kalebi duge tele bɔɛ bolo ɲinma tugun mafanna. Mɔ mɛn ka ta sa Sikilagi saa la.» 15Dauda ka a maɲininka, a ko: «I si nɔ n donila kɛ boenmalanu dula ba?» A ka a jaabi, a ko: «I kali Ala la ba ka i te n faga, ka i mɛn te n don n marige bolo. Wo tuma, nde tugun si i doni le kɛ boenmalanu dula.»
16Awa, wo Misira kaa ka anu doni Amaleki kaanu dula, anu ka a taran, anu be labolokaren duge dula bɛ ma, anu be anu daɲinila, anu be beere minna, anu be murade sɔren feŋɛnu bɛ la ko la, anu be minnu bosiren Filisiti nun Juda dugenu tɔ. 17Dauda ka anu kɛlɛ, kabɔɔ ɲɔlakɛnɛ fɛ han wo lun tabantaka wura la. Hali mɔgɔ dɔndɔ ma a kun bɔɔ wo boenmalanu ɲaama, fɔ kamaren mɔgɔ kɛmɛ naani minnu yɛlɛta ɲɔgɔmɛnu kunma, anu borita. 18Amaleki kaanu ka fondo minnu jigan nun, Dauda ka a bɛ masɔtɔ mɛn. A mɛn ka a la musu fila bɔɔ anu bolo. 19Dauda ka a la mɔgɛnu bɛ taran ɲɔ: dendeŋɛnu ba, kayibanu ba, den kayireŋɛnu ba, anun den musereŋɛnu. Amaleki kaanu ka feŋɛ min bɛ jigan nun, fenfen ma bɔɔ a la. Dauda ka a bɛ talasaagi. 20Dauda ka Amaleki kaanu la saakanu, baanu anun ningenu tugun jigan. Minnu be wo kolofeŋɛnu donila, anu be sɔren wo wɔɔrɛ ɲatɔ, anu tota kɛ-lɛ fɔla: «Dauda la kɛlɛ tɔnɛ le ka!»
Kɛlɛ tɔnɛ fatan koe
21Dauda saagita wo kayi mɔgɔ kɛmɛ filanu dula, minnu korita nun kɔfu kɛ boenmalanu jokki koe la, anu ka minnu to kɔma Besori kɔɛɛ woyi dula. Anu nata Dauda labɛndula anun mɔgɛ minnu be a jokkiren nun. Dauda ka a madon anu la, a ka anu maɲininka, ka tana bele anu ma. 22Minnu tagata Dauda kɔma, donu be anu ɲaama minnu maɲin, mɔgɔ sondon koroŋɛnu le mu anu la. Wonu bɛ ka anu kulɛ labɔɔ, anu ko: «Minnu ma taga mɔ kɔma, anu te kɛlɛ tɔnɛ fenfen sɔtɔ, fɔ anu la deŋɛnu nun anu la musenu. Anu ni wonu jigan anu ni taga.» 23Kɔnɔ Dauda ka a fɔ, a ko: «Wo kana a ma ɲɔgɔnna, n nɛɛnɛdɔndɛnu! Alatala le be kɛ diiren wo mɔ ma, bayi a bata wo mɔ latanga, a mɛn nata kɛ boenmalanu sa wo mɔ sagoe tɔ. 24Ɲɔmɔ si wo kulɛ bita kɛ koe butɔ? Minnu tagata kɛlɛ tɔ, anun minnu be sigiren miraŋɛnu kɛnna, do kana fisaya do ko fatare dula, anu ni a fatan alako bɛ ni a sɔtɔ.» 25Dauda ka yamɔri sa ɲɔgɔnna le, a naata na ma sariya la Isirayila duge bɛ tɔ, han bi wolo be tagamanna ɲɔ.
Dauda la Juda kayibanu sanba koe
26Anu to saagita Sikilagi saa tɔ, Dauda ka kɛlɛ tɔnɛ do lasanba Juda duge kayibanu ma, minnu be maren a kanunteŋɛnu la. A ka kɛ kuma le sa a kunma, a ko: «Wo sanba le ka mɔ be min sɔtɔren kɛlɛ tɔ Alatala jaguenu bolo.» 27A ka a lasanbala ɲɔgɔnna le Betɛli kaanu ma, Ramoti-Nɛgɛbu kaanu nun Yatiri kaanu ma. 28A mɛn ka a lasanba Aroyɛri, a ka a lasanba Sifumɔti anun Esitemowa, 29a ka a lasanba Rakali kaanu ma, anun mɔgɛnu ma minnu be Yerameyɛli bɔnsɛnu la saanu tɔ, anun Keni kaanu, 30anun Horoma kaanu, Bori-Asan anun Ataki kaanu ma, 31anun Heburɔn kaanu ma, anun saanu bɛ, Dauda nun a la mɔgɛnu ka anu kɛŋɛ sɔ ka minnu bɛ tɔ nun.
Currently Selected:
1 Samiyɛli 30: MOG
Highlight
Share
Copy
Want to have your highlights saved across all your devices? Sign up or sign in
