1 Samiyɛli 29
29
Filisiti sɔɔri kuŋɛnu la Dauda lasaage
1Filisiti kaanu ka anu la sɔɔrenu bɛ madɛn Afɛki. Isirayila sɔɔrenu kan be daakaren kɔɔ kuŋɛ le tɔ min be Jisirewɛli. 2Filisiti kuntigenu be tagamanna, anun anu la sɔɔrenu la mɔgɔ kɛmɛ kɛmɛ kɛɲa ma, anun anu mɔgɔ wulu dɔndɔ dɔndɔ kɛɲa ma. Dauda kan nun a la sɔɔrenu be tagamanna anu bɛ kɔma, anu nun mansa Akisi. 3Filisiti kaanu la sɔɔri kuŋɛnu ka Akisi maɲininka: «Bɔ, kɛ Heburenu kan be fen ɲinila yan?» Akisi ka wo sɔɔri kuŋɛnu jaabi, a ko: «Bɔ, Dauda ma kɛ la ba, min be maren Sayulu la walilá la nun, Isirayila la mansa? A bɔɔta Sayulu kɔma a nata to n kɔma, wo bata kari siyama bɔɔ. Bɔɔla a donta n bata han bi, n ma fenfen koron yen a la.»
4Filisiti sɔɔri kuŋɛnu dumɛnta Akisi ma, anu ka a fɔ a ye: «Kɛ kaye nun a la sɔɔrenu jigan yan, a ni saagi i be ka min donden a bolo, a kana mɔ jokki kɛlɛ tɔ. A kana nala a ɲamatelenna mɔ ma kɛlɛ tɔ. Bɔ kɛ kaye si nɔ fen de ɲan mala min si a marige Sayulu hɛnɛ? Fɔ a ni mɔ la mɔgɛ donu kuŋɛ le doni a fɛ. 5Ká, musenu bele kɛ Dauda le matɔgɔla nun anu to be dɔŋɛ dɔnna? Anu be a fɔla, aa Sayulu ka mɔgɔ wulu wulu le botege, kɔnɔ aa Dauda kan ka mɔgɔ wulu tan tan le botege.»
6Akisi ka Dauda kele, a ka a fɔ a ye, a ko: «N bata n kali Alatala la: i telenta. Min di n ɲɛ nun, ile nun n na sɔɔrenu ni taga kɛlɛ tɔ, wo mɛn bɛ ni saagi ɲɔgɔn na sɔɔrenu la daaka tɔ, bayi n bele ko koron yo yenden i la bɔɔla i nata n bata han bi. Kɔnɔ, i ma di kuntigenu kan ye. 7Awa, saagi jususa butɔ, i kana nala ko do mala yan kɔtɛ min ma di Filisiti kuntigenu ye.» 8Dauda ka a fɔ Akisi ye, a ko: «Bɔ, n be fen de maren? I be fen de yenden nde i la walilá la min bele diyaren i ye bɔɔla n nata i bata han bi min be a mala nde te taga mansa jaguenu kɛlɛdula?»
9Akisi ka Dauda jaabi, a ko: «N ka a lɔn, bayi i di n ɲɛ iko Ala la maleka. Kɔnɔ Filisiti sɔɔri kuŋɛnu ko aa i te mɔ jokki kɛlɛ tɔ. 10Wo butɔ, i ni wuli sinan saguma jonna, ile nun i marige la sɔɔrenu minnu nata i fɛ yan. Banta tini fɔlɔ makɛnɛla tun, wo ni bɔɔ yan.» 11Dauda nun a la sɔɔrenu bɔɔta saguma jonna, anu saagita Filisiti duge tɔ. Filisiti sɔɔrenu kan yɛlɛta Jisirewɛli.
Currently Selected:
1 Samiyɛli 29: MOG
Highlight
Share
Copy
Want to have your highlights saved across all your devices? Sign up or sign in
