1 Samiyɛli 28
28
Filisiti kaanu la anu tabɛn koe tagala Isirayila kɛlɛdula
1Wo wagate, Filisiti kaanu bata anu la sɔɔrenu bɛ madɛn, taga koe la Isirayila kaanu kɛlɛdula. Akisi ka a fɔ Dauda ye, a ko: «Kɔnɔ i ni a lɔn, ka a fɔla ile nun i la jama be tola n mafanna le tagala kɛlɛ tɔ.» 2Dauda ka Akisi jaabi, a ko: «Awa, i la walilá be min mala, i si a yen!» Akisi ka a fɔ Dauda ye: «Wo butɔ, n si i sɔ le i ni ma n kantalá la kudai.»
Sayulu nun musu ɲana lakumalá min be Endori
3Samiyɛli dun bata faga nun, Isirayila kaanu bɛ ka a la faga koe suunɛ ma, anu ka a baadɛ Rama, a la saa tɔ. Kɔnɔ, Sayulu dun bata ɲana lakuma koe nun fɛrili ma koe bɛ ladan Isirayila duge bɛ tɔ.
4Filisiti kaanu bata na madɛn, anu ka daaka sɔ Sunemi saa mafanna. Sayulu nun Isirayila kɛlɛ malanu bɛ tugun nata daaka Giliboya mafanna. 5Sayulu to ka Filisiti jama la siya yen, a juse bɔɔta koola, a kilanta koola, a tota sɛrɛnna. 6Sayulu ka Alatala maɲininka, kɔnɔ Alatala ma a jaabi kiboe tɔ, a ma a jaabi a sago lɔn feŋɛ la min tɔgɔ Urimu, ka wo ma nabiyonmɛ do kulɛ la. 7Sayulu ka a la walilanu kii, a ko: «Wo taga muse do ɲini, min si ɲana lakuma, n ni taga a maɲininka.» A la walilanu ka a fɔ a ye, anu ko: «Muse do be Endori min kusan ɲana lakumala.» 8Sayulu to ka wo mɔɛ, a ka a masara alako mɔgɛnu kana a talɔn, a tagata a nun mɔgɔ fila. Anu donta wo muse bata sue tɔ. Sayulu ka a fɔ a ye, a ko: «Fɛrile ma n ɲɛ, i ni ɲana do lawuli, i ni a maɲininka n ɲɛ. Kɔnɔ ka n ka min tɔgɛ fɔ i ye, i be wolo lawulila de.» 9Muse ka kuma jigan, a ko: «Kɔnɔ i ka a lɔn Sayulu be min maren, a ka ɲana lakumalanu bɛ sɔntɔ kɛ duge tɔ ki min na, anun fɛrili malá bɛ. Fenna nɔn i be jule yɛlɛla n ɲɛ? I be diren n fagala le ba?» 10Sayulu ka a jaabi, a ka a kali Alatala la, a ko: «N ni a fɔ i ye Alatala ɲala: fenfen koron te i masɔtɔ kɛ koe tɔ.» 11Muse ka a maɲininka: «I be diren n ni ɲɔmɔ le lawuli?» A ka a jaabi, a ko: «Samiyɛli lawuli n ɲɛ.»
12Muse to ka Samiyɛli yen, a ka sɔnkɔ belebele layɛlɛ, a nata na a fɔ Sayulu ye: «I be n majuguyala fenna? Ile le yati mu Sayulu la!» 13Mansa Sayulu ka a fɔ a ye: «Hali i ma kilan! I be fen de yenden?» Muse ka a fɔ Sayulu ye, a ko: «N ka daale do le yen, iko beele, min be yɛlɛla duge kɔtɔ.» 14A ka a maɲininka, a ko: «A lahala be kama le?» Muse ka a jaabi, a ko: «Kikala le, burumuse be lajigiren a ma.» Sayulu ka a lɔn kisanna, ka a fɔla Samiyɛli le mu. A ka a majigi han a ka a tindɛ sɔ duge tɔ.
15Samiyɛli ka a fɔ Sayulu ye: «I be n na suleŋɛ tiɲala n ma fenna, ka n nawuli?» Sayulu ka a jaabi, a ko: «N be kɔntɔfile banba le butɔ. Filisiti kaanu bata na n kɛlɛdula, Ala bata a matuntun n na, n bata Ala maɲininka, a bele n jaabiren nabiyonmɛnu sabu la, a bele n jaabiren kiboe tɔ. N be i keleren wolo la, alako i ni kila sa n kɛn kɔtɔ, n bɛnta min mala.»
16Samiyɛli ka a fɔ a ye, a ko: «Ka Alatala bata a matuntun i la, a bata ma i kɛlɛɲɔgɛ la, awa i be nde maɲininkala fenna? 17Alatala bata a ma iko a ka a fɔ i ye ki min na n na kuma sabu la. A bata mansaya fara i ma, a ka a bɔɔ i bolo, a ka a don mɔgɔ do bolo, min mu Dauda la. 18Alatala ka min fɔ i ye, i ma i tolomasɔ wo la: a to ka a fɔ i ye i ni a la dumɛŋɛ dusu Amaleki kaanu ma, i ma a ma. Wolo be a maren Alatala be kɛ maren i la bi. 19Adun, Alatala ɲan si ile nun Isirayila sa le Filisiti kaanu sagoe tɔ. Sinan, ile nun i la den kayireŋɛnu bɛ si to le n kɛnna yan. Alatala ɲan si Isirayila kɛlɛlanu bɛ sa le Filisiti kaanu sagoe tɔ.»
20Sayulu to ka wo mɔɛ, a boeta duge tɔ kisanna a la kayanya bɛ la. Samiyɛli la wo kumanu ka a ma a kilanta koola. Do tota bɔɔla a sɛnbɛ la, bayi a bele dɔmɔ yo dɔmɔren nun su muru tele muru. 21Muse nata Sayulu kɛnna. A to ka a yen Sayulu be mafuren koola, a ka a fɔ a ye, a ko: «N diɲata n nɛɛ le ma n sɔta i la kumanu kɔma. 22Awa, ile tugun ni i tolomasɔ i la jon muse la, a to n ni dɔmɛ do dii i ma, alako i ni nɔ sɛnbɛ sɔtɔla saagi koe la.» 23Kɔnɔ, Sayulu ma sɔn, a ko: «N te dɔmɔ dɔmɔ.» A la walilanu nun wo muse ka a madiya, alako a ni dɔmɛ dɔmɔ. A sɔnta, a wulita duge tɔ, a sigita benbe tɔ. 24Wo ka a taran, tuuradeŋɛ kɛndeŋɛ dɔndɔ be wo muse bolo a la fɔgɛ tɔ. A wulita kisanna, a tagata a kannatɛgɛ. A ka farin munge jigan, a ka a lamulan, a ka dɛgɛ lɛbini bɔnɛ ɲiɲa. 25A ka a dii Sayulu nun a la walilanu ma, anu ka anu daɲini, anu wulita, anu tagata wo sue tɔ kisanna.
Currently Selected:
1 Samiyɛli 28: MOG
Highlight
Share
Copy
Want to have your highlights saved across all your devices? Sign up or sign in
