1 Samiyɛli 27

Dauda la ma koe boribaga la Filisiti duge tɔ

1Dauda ka a fɔ a yɛtɛ ma, a ko: «Sayulu si naa n faga le kɔtɛ. Fɛrɛ yo bele n bolo bitugun, fɔ n ni n kun bɔɔ Sayulu bolo n ni taga dogon Filisiti kaanu bata. Wolo si a ma Sayulu si saagi n ɲini koe kɔma Isirayila duge bɛ tɔ. Wo wagate, n bata n kun bɔɔ a bolo.» 2Wo butɔ, Dauda nun a la mɔgɔ kɛmɛ wɔɔrɛ wulita, anu ka anu kun sɔ Filisiti duge la, Mayɔki la deŋɛ Akisi bata, Gati saa mansa. 3Dauda naata sabati Akisi bata Gati, ale nun a la wo mɔgɔ kɛmɛ wɔɔrɛ, a bɛ nun a la denbaya; Dauda tugun nun a la musu fila, Ahinoyamu Jisirewɛli kaa, nun Abigayili, Nabali la furuɲa muse, wo Karimɛli kaa. 4Anu tagata a fɔ Sayulu ye, aa Dauda bata bori a tagata Gati. Sayulu to ka wo mɔɛ, a bɔɔta a ɲini koe kɔma.

5Dauda ka a fɔ Akisi ye, a ko: «Mansa, ka a tagata i hɛnɛ, i ni saa lanma dɔndɔ don n bolo, i la joŋɛ, n ni taga to ɲɔ. A ma bɛn n ni to i kɛnna i la mansa saa tɔ yan.» 6Wo lun dɔndɛ le, Akisi ka Sikilagi saa don a bolo. Wolo be a maren Sikilagi mata Juda mansanu tɛŋɛ la han bi. 7Dauda ka san dɔndɔ kari naani le ma Filisiti kaanu bata.

8Wagati yo wagati, Dauda nun a la mɔgɛnu si kɛnɛ yɛlɛla le nun anu ni taga boe Gesuri kaanu ma, anun Girisi kaanu nun Amaleki kaanu ma, bayi wonu be sabatiren nun bɔɔla bima ɲɔ duge tɔ, duge min be Suuru janfue nun Misira duge tɛma. 9Ka Dauda wulita mɔgɛnu kɛlɛ koe la kan do kan, a si wo dula mɔgɛnu bɛ faga le. A te musenu nun kayenu to baluren. A ni anu la saakanu nun baanu bita, a ni anu la ningenu, sofalenu nun ɲɔgɔmɛnu tugun bita. A mɛn ni anu la kutanu tugun jigan. Wo kɔma, a ni saagi Akisi bata. 10Ka Akisi ka a maɲininka: «Wo tagata boe dugu miniman de ma bi?», Dauda ni a fɔ: «Juda bolo ɲinma saa do ma», ka wo ma a ni a fɔ: «Yerameyɛli kaanu la saa do ma bolo ɲinma mafanna», ka wo ma a ni a fɔ: «Keni kaanu la saa do ma bolo ɲinma mafanna.» 11Dauda be boela saa minnu ma, a bele ɲɔ mɔgɔ yo tola nun a nɛɛ la, a mata kaye la, a mata muse la. A ma anu mɔgɔ yo nati a fɛ saagi koe la Gati, bayi a ka a fɔ le nun: «N bele diren anu ni mɔ waliɲa ɲamakaran, anu ni a fɔ: ‹Dauda be kɛ nun kɛ-lɛ maren.›» Awa, Dauda be walila ɲɔgɔnna le nun a be sabatiren Filisiti kaanu la duge tɔ wagate min bɛ tɔ. 12Akisi laata Dauda la, a ni kɛnɛ a fɔla: «A bata a yɛtɛ lasɛɛya Isirayila ye, a la jama. Wo butɔ a ni to yan, a ni ma n na walilá la kudai.»

Currently Selected:

1 Samiyɛli 27: MOG

Highlight

Copy