1 Samiyɛli 31
31
Sayulu nun Yonatan la faga
1Filisiti kaanu ka Isirayila kɛlɛ. Isirayila mɔgɛnu borita Filisiti kaanu la, anu siyama fagata Giliboya kɔnkɛ kunma. 2Filisiti kaanu ka Sayulu nun a la den kayireŋɛnu lakɛtɛrɛn. Anu ka Yonatan faga, anun Abinadabi, anun Malikisuwa, Sayulu la deŋɛnu.
3Wo kɔma, Filisiti kaanu ka kɛlɛ sɛnbɛ ɲamatelen Sayulu ma. Ndaka fililanu ka Sayulu yen. Sayulu sɛrɛnta koola kilaŋɛ la. 4Wo butɔ, a ka a fɔ a la kɛlɛ mafeŋɛnu mayadɛlá ye, a ko: «I la faŋɛ futin a laa tɔ, i ni n sɔgɔ, alako kɛ bilakorenu kana na anu ni n ɲagankata ka n faga mamayoe tɔ.» Kɔnɔ a la kɛlɛ mafeŋɛnu mayadɛlá ma sɔn, a kilanta a mala. Sayulu ka faŋɛ jigan, a ka a lasɔ, a ka a yɛtɛ laboe faŋɛ suŋɛ ma sɛnbɛ la. 5A la kɛlɛ mafɛŋɛ mayadɛlá to bata a yen Sayulu bata faga, ale tugun ka a yɛtɛ laboe a la faŋɛ suŋɛ ma, ale tugun fagata. 6Sayulu fagata ɲɔgɔnna le, ale nun a la den kayiren sabanu anun a la kɛlɛ mafeŋɛ mayadɛlá, anun a kɛnnasɔlanu bɛ wo lun dɔndɛ.
7Isirayila mɔgɛ minnu be nun fole kɔkɔma, anun Yurudɛn kɔɛɛ kɔkɔma, wonu naata lɔn sɔtɔ a ma, ka a fɔla Isirayila sɔɔrenu be borila, aa Sayulu nun a la den kayireŋɛnu tugun bata faga. Wo butɔ, anu ka anu la saanu aɲɛ, anu borita. Filisiti kaanu tagata sigi wo saanu tɔ.
8Wo tabantaka, Filisiti kaanu tagata mɔgɔ fagareŋɛnu la fondonu jigandula, anu nata Sayulu nun a la den kayiren saba furenu yen, minnu boeta nun Giliboya kɔnkɛ tɔ. 9Anu ka Sayulu kuŋɛ kuntu, anu ka a la kɛlɛ mafeŋɛnu tugun jigan. Anu ka kiilanu kii Filisiti duge bɛ tɔ, anu ni kɛ kibare fɔ jama bɛ ye, anu mɛn ni a fɔ anu la kuyenu batu boŋɛnu tɔ. 10Anu ka Sayulu la kɛlɛ mafeŋɛnu ladon anu la kuye Asitoroti la boŋɛ butɔ, anu ka a fure yongi Beti-San saa tatta birike la.
11Yabesi, min be Galadi duge tɔ, ɲɔ saa mɔgɛnu to ka a mɔɛ ka a fɔla Filisiti kaanu be koe min maren Sayulu la, 12kayi karindeŋɛnu bɛ wulita, anu tagamanta le su muru, anu tagata Sayulu fure jigan Beti-San tatta birike ma, anun a la den kayiren saba furenu. Anu nata Yabesi, anu ka anu bintan. 13Anu ka anu kolenu jigan, anu ka wonu mandi tamarisi lɔgɛ do kɔtɔ Yabesi. Anu naata sun han tele wɔrɔwila.
Currently Selected:
1 Samiyɛli 31: MOG
Highlight
Share
Copy
Want to have your highlights saved across all your devices? Sign up or sign in
