ಮಾರ್ಕ 4

ದೇವಡ ರಾಜ್ಯತ್‍ರ ವಿಷಯತ್ ಕಥೇರ ರೂಪ

(ಮತ್ತಾಯ 13.1–34; ಲೂಕ 8.4–18)

1ಯೇಸು ಗಲಿಲಾಯ ಕೆರೆರ ಬರಿಲ್ ಪುನಃ ಉಪದೇಶ ಕೊಡ್‍ಪಕ್ ಸುರು ಮಾಡ್‍ಚಿ. ದುಂಬ ಜನ ಕೂಡಿಬಂದಗುಂಡ್ ಯೇಸು ಪೋಯಿತ್ ಅಲ್ಲಿ ಇಂಜ ಒರು ದೋಣಿಲ್ ಅಳ್‌ತಂಡತ್. ಜನಡ ಕೂಟ ಕೆರೆರ ಬರಿಲ್ ನಿಂದಂಡಿಂಜತ್. 2ದುಂಬ ವಿಷಯತ್‍ನ ಅಯಿಂಗಕ್ ಕಥೇರ ರೂಪತ್‌ಲ್ ಎಣ್ಣಿ ಕೊಡ್‍ತಂಡಿಂಜತ್. 3ಇಲ್ಲಿ ಕ್‍ೕಳಿ, ಒರ್ ಮನುಷ್ಯ ಕುರುನ ಬಿತ್ತ್‌ವಕ್ ಪೊರಟ್ ಪೋಚಿ. 4ಅಂವೊ ಆ ಕುರುನ ಬಿತ್ತ್‌ವಕ್ ಚಾಡ್‌ವಕ ಚೆನ್ನ ಕುರು ನಡ್‍ಪ ಬಟ್ಟೇಲ್ ಬುದ್ದತ್; ಆ ಕುರುನ ಪಕ್ಷಿಯ ಬಂದಿತ್ ತಿಂದತ್. 5ಚೆನ್ನ ಕುರು ಮಣ್ಣ್ ಇಲ್ಲತ ಕಲ್ಲ್ ಕಲ್ಲಾಯಿತ್ಂಜ ನೆಲತ್‌ಲ್ ಬುದ್ದತ್. ಅಲ್ಲಿ ಮಣ್ಣ್ ಆಳ ಇಲ್ಲತಗುಂಡ್ ಬುದ್ದ ಕುರು ಅಕ್ಕನ್ನೆ ಮೊಳಕೆ ಬಾತ್. 6ಆಚೇಂಗಿ ಬೆದ್ ಬಪ್ಪಕ ಮೊಳೆಕೆ ಒಣಂಗಿ ಪೋಚಿ. ಎನ್ನಂಗೆಣ್ಣ್‌ಚೇಂಗಿ ಆ ಗಿಡತ್‌ರ ಬೇರ್ ಆಳವಾಯಿತ್ ಪೋಯಿತ್ಂಜಿಲೆ. 7ಚೆನ್ನ ಕುರು ಮುಳ್ಳ್ ಪೊದೆಲ್ ಬುದ್ದತ್. ಅಲ್ಲಿ ಅದ್ ಬೊಳ್ಂದತ್, ಆಚೇಂಗಿ ಮುಳ್ಳ್ ಗಿಡ ಬೊಳ್ಂದಿತ್ ಅದ್‍ನ ನೆರ್‌ಕಿತ್ ಫಲ ಕೊಡ್‍ಪಕ್ ಬುಟ್ಟಿತ್‌ಲ್ಲೆ. 8ಚೆನ್ನ ಕುರು ಚಾಯಿ ಮಣ್ಣ್‌ರ ನೆಲತ್‌ಲ್ ಬುದ್ದತ್. ಅದ್ ಮೊಳಕೆ ಬಾತ್, ಚಾಯಿತೆ ಬೊಳ್ಂದತ್, ಚಾಯಿತೆ ಫಲ ಕೊಡ್‍ತತ್. ಚೆನ್ನ ನುಪ್ಪದ್, ಚೆನ್ನ ಅರ್‌ವದ್, ಚೆನ್ನ ನೂರಾಯಿತ್ ಫಲ ಕೊಡ್‍ತತ್. 9ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.

ಕಥೇರ ರೂಪತ್‍ರ ಉದ್ದೇಶ

(ಮತ್ತಾಯ 13.10–17; ಲೂಕ 8.9,10)

10ಯೇಸು ಒಬ್ಬನ್ನೇ ಇಪ್ಪಕಾಪಕ ಚೆನ್ನ ಜನ ಅಂವೊಂಡ ಪನ್ನೆರಂಡ್ ಶಿಷ್ಯಂಗಡ ಕೂಡೆ ಬಂತ್ ನೀನ್ ಎಣ್ಣ್‌ನ ಕಥೇರ ರೂಪತ್‍ರ ಅರ್ಥತ್‍ನ ನಂಗಕ್ ಎಣ್ಣಿತಾಂದ್ ಕ್‍ೕಟತ್. 11ದೇವಡ ರಾಜ್ಯತ್‍ರ ಗುಟ್ಟ್ ನಿಂಗಕ್ ಗೊತ್ತಾಪನೆಕೆ ಮಾಡಿತುಂಡ್. ಆಚೇಂಗಿ ಪರಲೋಕಕ್ ಪೊರಮೆವುಳ್ಳ ಜನ ಇದ್‍ನೆಲ್ಲಾ ಕಥೇರ ರೂಪತ್‌ಲ್ ಕ್‍ೕಪ.

12ಅಯಿಂಗ ನೋಟುವ, ಆಚೇಂಗಿ ಒಂದು ಕಾಂಬುಲೆ,

ಅಯಿಂಗ ಕ್‍ೕಪ, ಆಚೇಂಗಿ ಒಂದು ಅರ್ಥ ಆಪುಲೆ,

ಅನ್ನನೆ ಅರ್ಥ ಆಚೇಂಗಿ ಅಯಿಂಗ ದೇವಡ ಪಕ್ಕ ಬಂತ್, ಅಯಿಂಗಡ ಪಾಪಕ್ ಮನ್ನಿಪ್ ಕ್‍ಟ್ಟುವ.#4.12 ಯೆಶಾಯ 6.9,10

ಯೇಸು ಕಥೇರ ರೂಪತ್‍ನ ವಿವರಿಚಿಡುವದ್

(ಮತ್ತಾಯ 13.18–23; ಲೂಕ 8.11–15)

13ಪಿಂಞ ಯೇಸು ಅಯಿಂಗಳ ನೋಟಿತ್, ಈ ಕಥೇರ ರೂಪ ನಿಂಗಕ್ ಅರ್ಥ ಆಯಿತಿಲ್ಲೆಯಾ ಅನ್ನನೆ ಆಚೇಂಗಿ ನಿಂಗಕ್ ಬೋರೆ ಕಥೇರ ರೂಪ ಎನ್ನನೆ ಅರ್ಥ ಆಪ ಎಣ್ಣಿಯಂಡ್ ಕ್‍ೕಟತ್. 14ಕುರುನ ಬಿತ್ತ್‌ವಯಿಂಗ ದೇವಡ ವಾಕ್ಯತ್‍ನ ಬಿತ್ತುವ. 15ಚೆನ್ನ ಜನ ಬಟ್ಟೇಲ್ ಬುದ್ದ ಕುರುರನೆಕೆ, ದೇವಡ ವಾಕ್ಯತ್‍ನ ಕ್‍ೕಪ ಆಚೇಂಗಿ ಸೈತಾನ ಬಂದಿತ್ ಅದ್‍ನ ಎಡ್‌ತ್‌ರ್‌ವ. 16ಚೆನ್ನ ಜನ ಕಲ್ಲ್ ನೆಲಕ್ ಬುದ್ದ ಕುರುರನೆಕೆ. ಅಯಿಂಗ ದೇವಡ ವಾಕ್ಯತ್‍ನ ಕುಶೀಲ್ ಬೆರಿಯ ಸ್ವೀಕಾರ ಮಾಡ್‌ವ, 17ಆಚೇಂಗಿ ಅದ್ ಅಯಿಂಗಡ ಒಳ್‍ಲ್ ಆಳವಾಯಿತ್ ಬೇರ್ ಇಲ್ಲತಗುಂಡ್, ಚೆನ್ನ ಕಾಲ ಮಾತ್ರ ಇಪ್ಪ. ದೇವಡ ವಾಕ್ಯತ್‍ರಗುಂಡ್ ಕಷ್ಟ, ಹಿಂಸೆ ಬಾತೇಂಗಿ ಅಯಿಂಗ ಅದ್‍ನ ಬುಟ್ಟ್‌ರ್‌ವ. 18ಚೆನ್ನ ಜನ ಎನ್ನನೆ ಇಪ್ಪ ಎಣ್ಣ್‌ಚೇಂಗಿ ಮುಳ್ಳ್‌ರ ಪೊದೆಕ್ ಕುರು ಬುದ್ದನೆಕೆ. ಅಯಿಂಗ ದೇವಡ ವಾಕ್ಯತ್‍ನ ಕ್‍ೕಪ. 19ಈ ಬದ್‍ಕ್‍ರ ದುಃಖ, ಐಶ್ವರ್ಯತ್‍ರ ಬೋದ ಪಿಂಞ ಬೋರೆ ಬೋರೆ ತರತ್‍ರ ಇಚ್ಛೆಯು ದೇವಡ ವಾಕ್ಯತ್‍ನ ಇರ್‌ಕುವಗುಂಡ್ ಫಲ ಕ್‍ಟ್ಟುಲೆ. 20ಚೆನ್ನ ಜನ ನಲ್ಲ ಮಣ್ಣ್‌ಕ್ ಬುದ್ದ ಕುರುನನೆಕೆ ಇಪ್ಪ. ಅಯಿಂಗ ಕುಶೀಲ್ ದೇವಡ ವಾಕ್ಯತ್‍ನ ಸ್ವೀಕಾರ ಮಾಡಿತ್, ಫಲ ಕೊಡ್‍ಪ. ಚೆನ್ನ ನುಪ್ಪದ್, ಚೆನ್ನ ಅರ್‌ವದ್, ಚೆನ್ನ ನೂರಾಯಿತ್ ಫಲ ಕೊಡ್‍ಪ.

ಪಾತ್ರತ್‍ರ ಒಳ್‍ಕ್ ಬೆಪ್ಪ ಬೊಳ್‍ಚ

(ಲೂಕ 8.16–18)

21ಯೇಸು ಇಂಞು ಬೋದನೆ ಮಾಡಿಯಂಡ್ ಇಂಜತ್. ದಾರೇಂಗಿ ಬೊಳ್‌ಚತ್‍ನ ಎಡ್‍ತಂಡ್ ಬಂದಿತ್ ಪಾತ್ರತ್‍ರ ಒಳ್‍ಲ್ ಬೆಪ್ಪ? ಇಲ್ಲೇಂಗಿ ಕಡಿಕೆರ ಅಡಿಲ್ ಬೆಪ್ಪ? ಅದ್‍ನ ಬೊಳ್‍ಚ ಕಂಬತ್‍ಲ್ ಬೆಪ್ಪ್‌ಲೆಯಾ. 22ಒಳ್‌ಪ್‌ಚ್ಚಿಟಂಡ್ ಉಳ್ಳದೆಲ್ಲ ಪೊರಮೆ ಬಪ್ಪ, ಮುಚ್ಚಿತುಳ್ಳದೆಲ್ಲಾ ಬೊಳಿಕ್ ಬಪ್ಪ. 23ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ. 24ಇಂಞು ಅಯಿಂಗಳ ಅಂವೊ ನೋಟಿತ್ ಎಣ್ಣ್‌ಚಿ; ನಿಂಗ ಜಾಗ್ರತೆಲ್ ಕ್‍ೕಳಿ, ಏದ್ ಅಳ್‌ತೆಲ್ ನಿಂಗ ತೀರ್ಪ್ ಮಾಡ್‌ವಿರ, ಅದೇ ಅಳ್‌ತೆಲ್ ದೇವ ನಿಂಗಳ ಸಹ ತೀರ್ಪ್ ಮಾಡ್‌ವ, ಇಂಞು ದುಂಬ ಮ‌ಡುವ. 25ಉಳ್ಳಯಿಂಗಕ್ ಇಂಞು ಕ್‍ಟ್ಟ್‌ವ, ಇಲ್ಲತಯಿಂಗಕ್ ಚೆನ್ನ ಉಳ್ಳದ್‍ನ ಸಹ ಎಡ್‌ತ್‌ರ್‌ವ. 26ಯೇಸು ಇನ್ನನೆ ಬೋದನೆ ಮಾಡಿಯಂಡಿಂಜತ್. ದೇವಡ ರಾಜ್ಯ ಎನ್ನನೆ ಉಂಡ್‍ೕಂದ್ ಎಣ್ಣ್‌ಚೇಂಗಿ ಒರ್ ಮನುಷ್ಯ ಕುರುನ ಅಂವೊಂಡ ಬೇಲ್‍ಕ್ ಬಿತ್ತ್‌ವನೆಕೆ. 27ಅಂವೊ ಬೈಟಾಪಕ ಬುದ್ದಂಡ್ ವರಿರುವ. ಪೊಲಾಕ ಎದ್ದಿತ್ ನೋಟ್‌ವಕಾಪಕ ಅಂವೊಂಗ್ ಗೊತ್ತಿಲ್ಲತನೆಕೆ ಕುರು ವಡಂದಿತ್ ಮೊಳಕೆ ಬಂದನೆಕೆ ಆಪ. 28ಅಲ್ಲಿಯತ್‍ರ ಫಲವತ್ತಾನ ಮಣ್ಣ್‌ರಗುಂಡ್ ಗಿಡ ಬೊಳ್ಂದಿತ್, ಕೊಂಬ್ ಬಂದಿತ್, ಮೊಗ್ಗ್ ಬಂದಿತ್, ಕದ್ ಆಯಿತ್ ದುಂಬ ಪಣ್ಣಾಪ. 29ಪಣ್ಣ್ ಆನ ಪಿಂಞ ಆ ಮನುಷ್ಯ ಕೊಯಿ ಕತ್ತಿಲ್ ಕೊಯಿಪಣಿ ಸುರು ಮಾಡ್‌ವ.

ಕಡು ಕುರುರ ಕಥೇರ ರೂಪ

(ಮತ್ತಾಯ 13.31,32,34; ಲೂಕ 13.18,19)

30ದೇವಡ ರಾಜ್ಯತ್‍ನ ಎಂತಾಂಗ್ ಹೋಲಿಕೆ ಮಾಡ್‍ವದ್? ನಿಂಗಕ್ ಅರ್ಥ ಆಪನೆಕೆ ಏದ್ ಕಥೇರ ರೂಪತ್‌ಲ್ ಎಣ್ಣಿತ್ ದೇವಡ ರಾಜ್ಯತ್‍ನ ವಿವರಿಚಿಡ್‌ವದ್? 31ಅದ್ ಕಡು ಕುರುರನೆಕೆ. ಅದ್ ಬೂಲೋಕತ್‍ಲ್ ಎಲ್ಲಾ ಕುರುಕಿಂಜ ಚೆರಿಯ ಕುರುವಾಯಿತುಂಡ್. 32ಅದ್‍ನ ನೆಲಕ್ ಬಿತ್ತ್‌ನ ಪಿಂಞ ಅದ್ ಎಲ್ಲಾ ಗಿಡಕಿಂಜ ಬಲ್ಯ ಗಿಡವಾಯಿತ್ ಬಲ್ಯ ಕೊಂಬ್ ಆಯಿತ್ ಬೊಳ್ಂದಿತ್ ಆ ಕೊಂಬ್‍ರ ನಳತ್‌ಲ್ ಬಾನತ್‍ರ ಪಕ್ಷಿಯ ಬಂದಿತ್ ಗೂಡ್ ಕೆಟ್ಟ್‌ವ. 33ಯೇಸು ಇನ್ನತ ಬೋದನೆನ ಜನಕ್ ಎಣ್ಣಿಯಂಡ್ ಇಂಜತ್. ಜನಕ್ ಅರ್ಥ ಆಪನೆಕೆ ಕಥೇರ ರೂಪತ್‌ಲ್ ಎಣ್ಣಿತ್ ಬೋದನೆ ಮಾಡಿಯಂಡ್ ಇಂಜತ್. 34ಯೇಸು ಕಥೇರ ರೂಪತ್‌ಲ್ ಎಣ್ಣತೆ ಜನಡ ಕೂಡೆ ತಕ್ಕ್ ಪರಿಯುವಕಿಂಜಿಲೆ. ಆಚೇಂಗಿ ಅಂವೊ ಅಂವೊಂಡ ಶಿಷ್ಯಂಗಡ ಕೂಡೆ ಇಪ್ಪಕ ಅಯಿಂಗಕ್ ಚಾಯಿತೆ ಅರ್ಥ ಮಾಡಿ ಕೊಡ್‌ಪಯಿಂಜತ್.

ಯೇಸು ಸಮುದ್ರತ್‍ರ ಮೇಲೆ ಬಿರ್‌ಗಾಳಿನ ನಿಪ್ಪ್‌ಚಿಟ್ಟದ್

(ಮತ್ತಾಯ 8.23–27; ಲೂಕ 8.22–25)

35ಅಂದ್ ಬಯಿಟಾಪಕ ಯೇಸು, ನಂಗ ಕೆರೆರ ಆಬರಿಕ್ ಪೋಕನಾಂದ್ ಎಣ್ಣ್‌ಚಿ. 36ಜನಡ ಈ ಕೂಟತ್‌ನ ಅಯಿಚ ಪಿಂಞ ಅಂವೊ ಅಳ್‍ತಂಡಿಂಜ ದೋಣಿಲ್ ಅನ್ನನೆ ಅಂವೊನ ಕಾಕಿಯಂಡ್ ಪೋಚಿ. ಇಂಞು ಬೋರೆ ಚೆನ್ನ ದೋಣಿಯು ಅಂವೊಂಡ ಕೂಡೆ ಇಂಜತ್. 37ಒಮ್ಮಕೆ ಬಿರ್‌ಗಾಳಿ ಬೀಜಿತ್ ದೋಣಿರ ಒಳ್‍ಕ್ ನೀರ್ ದುಂಬುವನೆಕೆ ಅಲೆ ಪೊಜ್ಜತ್. 38ಯೇಸು ತಲೆಮೆತ್ತೆರ ಮೇಲೆ ಮಂಡೆ ಬೆಚ್ಚಂಡ್ ದೋಣಿರ ಇಂಞೊರ್ ಮೂಲೆಲ್ ವರಿಯಂಡ್ ಇಂಜತ್. ಯೇಸುರ ಶಿಷ್ಯಂಗ ಬಂದಿತ್ ಯೇಸುನ ಎಪ್ಪ್‌ಚಿಟ್ಟಿತ್, ಉಪಾದ್ಯನೇ, ನಂಗ ಚಾವದ್ ನೀಕ್ ಬೇಜಾರಾಪ್‌ಲ್ಲೆಯಾಂದ್ ಕ್‍ೕಟತ್.

39ಯೇಸು ಎದ್ದಿತ್, ನಿಪ್ಪಂಜಿ, ಗಾಳಿನ ಚೂಕಿತ್, ಕೆರೆನ ನೋಟಿತ್: ಶಾಂತ ಆಯಿರ್, ಮುಂಡತೆ ಇರ್‍ೕಂದ್ ಹುಕುಮ್ ಕೊಡ್‍ತತ್. ಅಕ್ಕನೆ ಗಾಳಿ ನಿಂದಿತ್ ದುಂಬ ಶಾಂತವಾಚಿ. 40ಯೇಸು ಅಂವೊಂಡ ಶಿಷ್ಯಂಗಕ್ ನಿಂಗಕ್ ಇಂಞು ನಂಬಿಕೆ ಬಂದಿತ್‌ಲ್ಲೆಯಾ? ಎನ್ನಂಗ್ ನಿಂಗಕ್ ಅಚ್ಚಕ್ ಪೋಡಿ ಆಚೀಂದ್ ಕ್‍ೕಟತ್.

41ಅಯಿಂಗಕ್ ದುಂಬ ಪೋಡಿ ಆಯಿತ್, ಆಶ್ಚರ್ಯ ಆಯಿತ್: ಗಾಳಿಯು ಅಲೆಯು ಇಂವೊಂಗ್ ಬಗ್ಗಿತ್ ನಡ್‍ಂದಂಡುಂಡಲ್ಲ, ಈ ಮನುಷ್ಯ ದಾರಾಯಿತಿಕ್ಕೂಂದ್ ಅಯಿಂಗಯಿಂಗಳೇ ತಕ್ಕ್ ಪರ್‌ದಂಡಿಂಜ‌ತ್.

Currently Selected:

ಮಾರ್ಕ 4: ಕೊಡವ

Highlight

Copy