ಮಾರ್ಕ 5
5
ಕೂಳಿ ಪುಡ್‌ಚ ಮನುಷ್ಯನ ಯೇಸು ವಾಸಿ ಮಾಡ್‍ನದ್
(ಮತ್ತಾಯ 8.28–34; ಲೂಕ 8.26–39)
1ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಗಲಿಲಾಯತ್‍ರ ಆ ಕರೆಯಿಂಜ ಗದರೇಸನರ ನಾಡ್‍ಕ್ ಬಾತ್ 2ಯೇಸು ದೋಣಿಯಿಂಜ ಪೊರಮೆ ಇಳ್ಂಜದು ಒರ್ ಮನುಷ್ಯ ಅಂವೊಂಗ್ ಎದ್‍ಕೆ ಬಾತ್. ಅಂವೊ ಚಾವ್‍ನ ಪೂಪ ತೂಟ್ಂಗಳತ್ಂಜ ಬಾತ್. ಅಂವೊ ಕೂಳಿ ಪುಡ್‌ಚ ಮನುಷ್ಯನಾಯಿತ್ಂಜತ್. 3ಅಂವೊ ತೂಟ್‌ಂಗಳತ್‌ಲ್ ವಾಸ ಮಾಡಿಯಂಡಿಂಜತ್. ದಾರ್‌ಕು ಅಂವೊನ ಪುಡ್‌ಚಿತ್ ಸರ್ಪಣಿಲ್ ಕೆಟ್ಟ್‌ವಕ್ ಕಯಿಂಜಿತ್‌ಲ್ಲೆ. 4ಎಚ್ಚಕೋ ಕುರಿ ಅಂವೊಂಡ ಕಾಲ್‌ಕೈಯಿನ ಸರ್ಪಣಿಲ್ ಕೆಟ್ಟ್‌ಚಿ. ಆಚೇಂಗಿ ಎಕ್ಕಾಲು ಸರ್ಪಣಿನ ಪೊಳ್‌ಚಿತ್ ಅಂವೊಂಡ ಕಾಲ್‌ಕ್ ಕೆಟ್ಟ್‌ನ ಇರ್‍ಂಬ್‍ರ ಸರ್ಪಣಿನ ಚೂರ್ ಚೂರ್ ಮಾಡ್‌ವಕಿಂಜತ್. ಅಂವೊ ಅಚ್ಚಕ್ ಗಟ್ಟಿಮುಟ್ಟಾಯಿತ್ ಇಂಜತ್. 5ಅಂವೊ ಪೊಲಾಕ ಬೈಯಿಟ್ ಕುಂದ್ ಪಿಂಞ ತೂಟ್‌ಗಳಂತಲ್ ಕೂತ್ ಕೊಡ್‌ತಂಡ್, ಕಲ್ಲ್‌ಲ್ ತಾಂಡ ತಡೀನ ಗಾಯಮಾಡಿಯಂಡಿಂಜತ್. 6ಚೆನ್ನ ದೂರತ್‍ಲ್ ಯೇಸು ಬಪ್ಪದ್‍ನ ಕಂಡಿತ್ ಅಂವೊ ಯೇಸುರ ಪಕ್ಕ ಓಡಿ ಬಂದಿತ್ ಮೊಣಕಾಲ್ ಊರ್‌ಚಿ. 7ಅಂವೊ ಜೋರಾಯಿತ್ ಕೂತ್ ಕೊಡ್‌ತಂಡ್: ದೇವಾದಿ ದೇವಡ ಮೋಂವೊನಾನ ಯೇಸುವೇ, ನನ್ನಗುಂಡ್ ನೀಕ್ ಎಂತಾಂಡು, ನಾಕ್ ದಯಬೆಚ್ಚಿತ್ ಶಿಕ್ಷೆ ತರತೇಂದ್ ದೇವಡ ಮೇಲೆ ಆಣೇಂದ್ ಎಣ್ಣ್‌ಚಿ. 8ಎನ್ನಂಗೆಣ್ಣ್‌ಚೇಂಗಿ, ಅಂವೊನ ಪುಡ್‌ಚ ಕೂಳಿಕ್ ನೀನ್ ಅಂವೊನ ಬುಟ್ಟಿತ್ ಪೋಂದ್ ಯೇಸು ಎಣ್ಣಿತ್ಂಜತ್.
9ಅಕ್ಕ ಯೇಸು ಅಂವೊನ ನೋಟಿತ್: ನೀಡ ಪೆದ ಎಂತ್‍ೕಂದ್ ಕ್‍ೕಟತ್.
ಅದ್ಂಗ್ ಅಂವೊ: ನಾಡ ಪೆದ ಲೇಗಿಯೊನ್#5.9 ಲೇಗಿಯೊನ್ ಎಣ್ಣ್‌ಚೇಂಗಿ, ಸುಮಾರ್ ಆರಾಯಿರ ಸಿಪಾಯಿಯಂಗಡ ಕೂಟ್‍ೕಂದ್ ಅರ್ಥ., ನಂಗ ಸುಮಾರ್ ಕೂಳಿಯ ಉಂಡ್. 10ದಯಬೆಚ್ಚಿತ್ ನಂಗಳ ಈ ಜಾಗತ್ಂಜ ಅಯಿಕತೇಂದ್ ಬೋಡ್‍ಚಿ. 11ಅಕ್ಕ ಕುಂದ್‌ರ ಪಕ್ಕ ದುಂಬ ಪಂದಿಯ ಮೇಯಿಜಂಡ್ ಇಂಜತ್. 12ಆ ಕೂಳಿಯ, ಈ ಪಂದಿಯಡ ಕೂಡೆ ನಂಗಳ ಅಯಿಚತೇಂಗಿ ನಂಗ ಅಯಿಂಗಡ ಒಳ್‍ಕ್ ಕೂಡಿರುವಾಂದ್ ಯೇಸುನ ಬೋಡ್‍ಚಿ. 13ಅಂವೊ ಅದ್ಂಗ್ ಒತ್ತತ್. ಆ ಕೂಳಿಯ ಈ ಮನುಷ್ಯನ ಬುಟ್ಟಿತ್ ಪಂದಿಯಡ ಒಳ್‍ಕ್ ಕೂಡಿಯಂಡತ್. ಸುಮಾರ್ ದಂಡ್ ಆಯಿರ ಪಂದಿಯಡ ಗುಂಪು ಕುಂದ್‌ರ ಕೊಡಿಕ್ ಓಡಿ ಪೋಯಿತ್ ಅಲ್ಲಿಂಜ ನೇರೆ ಕೆರೆಕ್ ಬುದ್ದಿತ್ ಮುಳ್‍ಗಿ ಚತ್ತ್ ಪೋಚಿ. 14ಪಂದಿಯಳ ಮೇಪ ಜನ ಇದ್‍ನ ಕಂಡಿತ್ ಓಡಿ ಪೋಯಿತ್ ಪಟ್ಟಣತ್‍ಲ್ ಪಿಂಞ ಸುತ್ತ್‌ಮುತ್‍ಲುಳ್ಳ ಎಲ್ಲಾರ್‌ಕು ಈ ಸುದ್ದಿನ ಎಣ್ಣ್‌ಚಿ. ಎಲ್ಲಾ ಜನ ಬಂದಿತ್ ಎಂತ ಆಚೀಂದ್ ನೋಟ್‌ಚಿ. 15ಜನ ಎಲ್ಲಾ ಯೇಸುರ ಪಕ್ಕ ಬಾತ್, ಕೂಳಿ ಪುಡ್‌ಚಂವೊ ಚಾಯಿತೆ ಬಟ್ಟೆ ಇಟ್ಟಿತ್ ನಲ್ಲ ಮನಸ್ಸ್‌ಲ್ ಅಳ್‌ತಿತ್ಂಜನ ನೋಟಿತ್ ಜನಕೆಲ್ಲಾ ಪೋಡಿ ಆಚಿ. 16ಇದ್‍ನ ಕಂಡ ಜನ ಪೋಯಿತ್, ಕೂಳಿಪುಡ್‌ಚಂವೊಂಡ ವಿಷಯ ಪಿಂಞ ಪಂದಿಯಡ ವಿಷಯತ್‍ನ ಜನಕೆಲ್ಲ ಅರಿಚಿಟ್ಟತ್. 17ಅಕ್ಕ ಜನಯೆಲ್ಲ ಯೇಸುನ ನಂಗಡ ಪ್ರಾಂತ್ಯತ್‍ನ ಬುಟ್ಟಿತ್ ಪೋಪಕ್ ಬೋಡಿಯಂಡತ್.
18ಅನ್ನನೆ ಯೇಸು ದೋಣಿರೊಳ್‌ಲ್ ಪೋಯಿತ್ ಅಳ್‌ಪಕ, ಕೂಳಿ ಪುಡ್‍ಚಿತ್ಂಜ ಮನುಷ್ಯ ಯೇಸುನ ನೋಟಿತ್: ನೀಡ ಕೂಡೆ ನಾನು ಬಪ್ಪೀಂದ್ ಬೋಡಿಯಂಡತ್. 19ಯೇಸು ಇಂವೊಂಡ ತಕ್ಕ್‌ಕ್ ಒತ್ತಂಡಿಲ್ಲೆ. ಅದ್ಂಡ ಬದ್‍ಲ್, ನೀನ್ ನೀಡ ಮನೆಕ್ ಪೋಯಿತ್ ದೇವ ನೀಕ್ ಕನಿಕರ ಕಾಟ್‌ವಂಜಿ ಎಚ್ಚಕ್ ನಲ್ಲದ್ ಮಾಡ್‍ಚೀಂದ್ ನೀಡ ಕುಟುಂಬಕ್ ಎಣ್ಣ್‍ೕಂದ್ ಎಣ್ಣ್‌ಚಿ. 20ಅಲ್ಲಿಂಜ ಆ ಮನುಷ್ಯ ದೆಕಪೊಲಿಕ್ ಪೋಯಿತ್ ಯೇಸು ಅಂವೊಂಗ್ ಎಚ್ಪಕ್ ನಲ್ಲದ್ ಮಾಡ್‍ಚೀಂದ್ ಎಣ್ಣ್‌ಚಿ. ಜನಕ್ ಇದ್‍ನ ಕ್‍ೕಪಕ ಆಶ್ಚರ್ಯ ಆಚಿ.
ಯೇಸು ಚತ್ತ ಮೂಡಿನ ಬದ್‌ಕ್‌ಚಿಟ್ಟ ವಿಷಯ ಪಿಂಞ ಒರ್ ಪೊಣ್ಣಾಳ್‍ರ ಚೋರೆ ಪೋಪ ರೋಗತ್‍ನ ವಾಸಿ ಮಾಡ್‍ನದ್
(ಮತ್ತಾಯ 9.18–26; ಲೂಕ 8.40–56)
21ಯೇಸು ಕೆರೆರ ಇಂಞೊರ್ ಬರಿಕ್ ಪೋಚಿ. ಅಲ್ಲಿಯತ್‍ರ ಕೆರೆರ ಬರಿಲ್ ದುಂಬ ಜನ ಅಂವೊಂಡ ಪಕ್ಕ ಕೂಡಿ ಬಾತ್. 22ಸಬಾಮಂದಿರತ್‍ರ ಒರ್ ಅದಿಕಾರಿಯಾಯಿತ್ಂಜ ಯಾಯೀರ ಎಣ್ಣ್‌ವಂವೊ ಯೇಸುನ ಕಾಂಬದು ಅಂವೊಂಡ ಪಕ್ಕ ಬಾತ್. ಅಂವೊ ಮೊಣಕಾಲ್ ಇಟ್ಟಿತ್, 23ನಾಡ ಮೂಡಿ ಕುಂಞಿ ದುಂಬ ಕಾಯಿಲೆಲ್ ಬುದ್ದಿತ್ ಉಂಡ್, ನೀನ್ ದಯಬೆಚ್ಚಿತ್ ಬಂದಿತ್ ನೀಡ ಕೈಯಿನ ಅವಡ ಮೇಲೆ ಬೆಯ್ಯಿ; ಅಕ್ಕ ಅವಡ ಕಾಯಿಲೆ ವಾಸಿಯಾಯಿತ್ ಬದ್‌ಕ್‌ವಾಂದ್ ಬಕ್ತಿಲ್ ಬೋಡಿಯಂಡತ್. 24ಯೇಸು ಅಂವೊಂಡ ಕೂಡೆ ಪೋಚಿ. ದುಂಬ ಜನಳು ಅಂವೊಂಡ ಕೂಡೆ ಅಂವೊನ ನೆರ್‌ಕಿಯಂಡ್ ಪೋಚಿ. 25ಅಲ್ಲಿ ಪನ್ನೆರಂಡ್ ಕಾಲತ್ಂಜ ಚೋರೆ ಪೋಪ ರೋಗತ್‌ಂಜ ಕಷ್ಟಪಟ್ಟಂಡಿಂಜ ಒರ್ ಪೊಣ್ಣಾಳ್ ಇಂಜತ್. 26ಅವ ಎಚ್ಚಕೋ ವೈದ್ಯಂಗಡಗುಂಡ್ ಮದ್ದ್ ಎಡ್‍ತಂಡ್ ಕಷ್ಟಪಟ್ಟಂಡ್, ಅವಡ ಪಕ್ಕ ಇಂಜ ಎಲ್ಲಾನ ಕರ್ಚ್ ಮಾಡಿತ್ಂಜತ್. ಆಚೇಂಗಿ ಅವ ವಾಸಿ ಆಯಿತಿಲ್ಲೆ. ದಿನ ದಿನ ಬಂದನೆಕೆ ಜಾಸ್ತಿಯಾಯಂಡಿಂಜತ್. 27ಅವ ಯೇಸುರ ವಿಷಯ ಕ್‍ೕ‍ಟಿತ್ಂಜತ್. ಅವ ಆ ಜನಡ ಕೂಟ‌ತ್‍ಲ್ ಅಂವೊಂಡ ಬಯ್ಯ ಇಂಜತ್. 28ನಾನ್ ಅಂವೊಂಡ ಬಟ್ಟೇನ ಮುಟ್ಟ್‌ಚೇಂಗಿ ನಾನ್ ವಾಸಿ ಆಯಿಪೋಪೀಂದ್ ಅವ ಗೇನ ಮಾಡ್‍ಚಿ. 29ಅನ್ನನೆ ಅವ ಬಂದಿತ್ ಯೇಸುರ ಬಟ್ಟೇನ ಮುಟ್ಟ್‌ಚಿ. ಅಕ್ಕಣೆಕೆ, ಅವಡ ಚೋರೆ ಪೋಪದ್ ನಿಂದ್ ಪೋಚಿ. ನಾಡ ತಡೀಲ್ ಇಂಜ ಈ ತೊಂದರೆ ವಾಸಿ ಆಯಿಪೋಚೀಂದ್ ಅವಕ್ ಗೊತ್ತಾಚಿ. 30ಅಕ್ಕಣೆ ಯೇಸು, ತಾಂಡ ದೇಹತ್ಂಜ ಅದ್ಬುತ ಶಕ್ತಿ ಪೊರಟಿತ್ ಪೋಚೀಂದ್ ಗೊತ್ತಾಯಿತ್, ನನ್ನ ದಾರ್ ಮುಟ್ಟಿಯೇಂದ್ ಜನಡ ಗುಂಪ್‍ರ ಸುತ್ತ್‌ಲೂ ನೋಟ್‌ಚಿ.
31ಅಂವೊಂಡ ಶಿಷ್ಯಂಗ ಅಂವೊನ ನೋಟಿತ್: ಇಚ್ಚಕ್ ಜನಡ ಗುಂಪ್‌ಲ್ ನಿನ್ನ ದಾರ್ ಮುಟ್ಟಿಯೇಂದ್ ಕ್‍ೕಪಿಯಲ್ಲಾಂದ್ ಎಣ್ಣ್‌ಚಿ. 32ಆಚೇಂಗಿ ಯೇಸು ಇನ್ನನೆ ದಾರ್ ನನ್ನ ಮುಟ್ಟಿಯೇಂದ್ ಜನಡ ಸುತ್ತ್‌ಲ್ ನೋಟಿಯಂಡೇ ಇಂಜತ್. 33ಆ ಪೊಣ್ಣಾಳ್‌ಕ್ ಎಂತಾಚೀಂದ್ ಗೊತ್ತಾನಗುಂಡ್ ಅವ ಬೊತ್ತಿಯಂಡ್ ಗ್‌ಡ್‌ಗಿಯಂಡ್ ಯೇಸುರ ಪಕ್ಕ ಬಂದಿತ್ ಮೊಣಕಾಲ್ ಇಟ್ಟಿತ್ ಅವಡ ಕಥೇನೆಲ್ಲ ಎಣ್ಣ್‌ಚಿ.
34ಯೇಸು ತಿರಿತ್ ಅವಳ ನೋಟಿತ್: ನಾಡ ಮೋಳೆ, ದೈರ್ಯ ಎಡ್‌ತ, ನೀಡ ನಂಬಿಕೆ ನಿನ್ನ ವಾಸಿ ಮಾಡ್‍ಚಿ. ನೀನ್ ಶಾಂತಿಲ್ ಪೋಯಿತ್, ಪೂರ್ತಿ ವಾಸಿಯಾಯಿತ್ ಕುಶೀಲ್ ಪೋಂದ್ ಯೇಸು ಎಣ್ಣ್‌ಚಿ. 35ಯೇಸು ಇನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ ಸಬಾಮಂದಿರ ಅದಿಕಾರಿಯಡ ಮನೇಯಿಂಜ ಚೆನ್ನ ಜನ ಸುದ್ದಿ ಎಡ್‌ತ ಬಂದಿತ್, ನೀಡ ಮೋವ ಚತ್ತ್ ಪೋಚಿ ಎನ್ನಂಗ್ ಈ ಉಪಾದ್ಯಂಗ್ ಇಂಞು ತೊಂದರೆ ಕೊಡ್‍ಪಿಯಾಂದ್ ಎಣ್ಣ್‌ಚಿ.
36ಯೇಸು ಈ ತಕ್ಕ್‌ಕ್ ಕೆಮಿ ಕೊಡ್‍ಕತೆ ಅದಿಕಾರಿಯಂಗ್: ನೀನ್ ಬೊತ್ತತೆ, ನನ್ನ ನಂಬ್‍ೕಂದ್ ಎಣ್ಣ್‌ಚಿ. 37ಯೇಸು ಅಂವೊಂಡ ಕೂಡೆ ದಾರ್‌ನು ಬಪ್ಪಕ್ ಬುಡತೆ, ಬರಿ ಅಂವೊಂಡ ಶಿಷ್ಯಂಗಳಾನ ಪೇತ್ರ, ಯಾಕೋಬ ಪಿಂಞ ಅಂವೊಂಡ ತಮ್ಮಣನಾನ ಯೋಹಾನನ ಕೂಟಿಯಂಡ್ ಯಾಯೀರ ಮನೆಕ್ ಪೋಯಿತ್ ಎತ್ತ್‌ಚಿ. 38ಅಲ್ಲಿ ಜನಡ ಗಾಬರಿ, ಜೋರ್ ಮೊರೆ ಪಡೆನ ಕಂಡತ್. 39ಯೇಸು ಒಳ್‍ಕ್ ಪೋಯಿತ್ ಎಂತ ಇಚ್ಚಕೆಲ್ಲಾ ಗಾಬರಿ? ಎನ್ನಂಗ್ ನಿಂಗ ಮೊರಟಂಡುಳ್ಳಿರ? ಕುಂಞಿ ಚತ್ತಿತ್‌ಲ್ಲೆ, ಅವ ವರಿಯಂಡ್ ಮಾತ್ರ ಉಂಡ್‍ೕಂದ್ ಯೇಸು ಎಣ್ಣ್‌ಚಿ. 40ಯೇಸುರ ತಕ್ಕ್‌ಕ್ ಅಲ್ಲಿ ಉಳ್ಳಯಿಂಗೆಲ್ಲಾ ತೆಳ್‍ಚತ್. ಯೇಸು ಅಯಿಂಗಳೆಲ್ಲ ಪೊರಮೆ ಇಟ್ಟಿತ್, ಬರಿ ಕುಂಞಿರ ಅಪ್ಪವ್ವ ಅಂವೊಂಡ ಮೂಂದ್ ಶಿಷ್ಯಂಗಳ ಕಾಕಿಯಂಡ್ ಕುಂಞಿ ಬುದ್ದಂಡುಳ್ಳ ಕೋಂಬರೇಕ್ ಪೋಚಿ. 41ಕುಂಞಿರ ಕೈಯಿನ ಪುಡ್‌ಚಿತ್ ತಲಿಥಾಕೂಮ್‌ಂದ್ ಎಣ್ಣ್‌ಚಿ. ಅದ್ಂಗ್ ಚುಮ್ಮಿ ಕುಂಞಿ ನೀನ್ ಏಳ್‍ೕಂದ್ ನಾನ್ ಎಣ್ಣ್‌ವೀಂದ್ ಅರ್ಥ. 42ಅವ ಒಮ್ಮಕೆ ಎದ್ದುರ್‌ವಂಜಿ ಆಲೆ ಈಲೆ ನಡ್‍ಪಕ್ ಸುರು ಮಾಡ್‍ಚಿ. ಅವ ಪನ್ನೆರಂಡ್ ವಯಸ್‌ರ ಮೂಡಿ ಕುಂಞಿ ಆಯಿತ್ಂಜತ್. ಇದ್‍ ಅಲ್ಲಿ ಉಳ್ಳಯಿಂಗಕೆಲ್ಲಾ ಆಶ್ಚರ್ಯ ಆಚಿ. 43ಆಚೇಂಗಿ ಯೇಸು ಅಲ್ಲಿ ಉಳ್ಳಯಿಂಗಕೆಲ್ಲಾ ನಿಂಗ ಈ ವಿಷಯತ್‍ನ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಹುಕುಮ್ ಕೊಡ್‍ತತ್. ಅವಕ್ ಎಂತೇಂಗಿ ತಿಂಬಕ್ ಕೊಡೀಂದ್ ಯೇಸು ಎಣ್ಣ್‌ಚಿ.
Currently Selected:
ಮಾರ್ಕ 5: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
