ಮಾರ್ಕ 3
3
ಪಾರ್ಶ್ವವಾಯುಲ್ ಕೈ ನೀಟ್‌ವಕಯ್ಯತಂವೊ
(ಮತ್ತಾಯ 12.9–14; ಲೂಕ 6.6–11)
1ಇಂಞೊರ್ ಕುರಿ ಯೇಸು ಸಬಾಮಂದಿರಕ್ ಪೋಚಿ. ಅಲ್ಲಿ ಒರ್ ಕೈ ಊನವಾನ ಒಬ್ಬ ಇಂಜತ್. 2ಚೆನ್ನ ಜನ, ಯೇಸು ಸಬ್ಬತ್ ದಿನತ್‌ಲ್ ಈ ಮನುಷ್ಯಂಡ ಕೈಯಿನ ವಾಸಿ ಮಾಡ್‍ಚೇಂಗಿ, ಅಂವೊನ ಕುತ್ತಪರಿವಕ್ ನೋಟಿಯಂಡಿಂಜತ್. 3ಯೇಸು ಆ ಮನುಷ್ಯನ ಎಲ್ಲಾಡ ಮಿಂಞತ್ ಎದ್ದಿತ್ ನಿಪ್ಪಕ್ ಎಣ್ಣ್‌ಚಿ. 4ನಿಂಗಡ ಕಾನೂನ್ ಪ್ರಕಾರ ಸಬ್ಬತ್ ದಿವಸತ್‍ಲ್ ಏದ್ ಮಾಡ್‍ವದ್ ನ್ಯಾಯ? ನಲ್ಲದ್ ಮಾಡ್‌ವದಾ ಅಥವ ಕೆಟ್ಟದ್ ಮಾಡ್‌ವದಾ? ಮನುಷ್ಯಂಡ ಜೀವತ್‍ನ ಕಾಪಾಡ್‌ವದಾ ಅಥವ ಅಂವೊನ ಪಾಳ್ ಮಾಡ್‌ವದಾಂದ್ ಅಲ್ಲಿ ಉಳ್ಳ ಜನಳ ಕ್‍ೕಟತ್. ಅಲ್ಲಿ ಉಳ್ಳ ಜನ ಒರ್ ತಕ್ಕು ಪರ್‍ಂದ್‍ತ್ತ್‌ಲ್ಲೆ. 5ಸುತ್ತ್‌ಮುತ್ತ್ ನೋಟಿತ್ ಯೇಸುಕ್ ಚೆಡಿ ಬಾತ್, ಅದೇ ಸಮಯತ್‍ಲ್ ಅಯಿಂಗಡ ಕಠಿಣ ಹೃದಯತ್‍ನ ಕಂಡಿತ್ ಯೇಸುಕ್ ಬೇಜಾರ್ ಆಚಿ. ಯೇಸು ಆ ಮನುಷ್ಯಂಗ್, ನೀಡ ಕೈಯಿನ ನೀಟ್‍ೕಂದ್ ಎಣ್ಣ್‌ಚಿ, ಅಂವೊ ಕೈ ನೀಟ್‌ಚಿ, ಅಂವೊಂಡ ಕೈ ಪೂರ್ತಿ ವಾಸಿಯಾಚಿ. 6ಅಕ್ಕ ಫರಿಸಾಯಂಗ ಅಲ್ಲಿಂಜ ಪೋಯಿತ್ ಹೆರೋದ ರಾಜಂಡ ಪಕ್ಷಕಾರಂಗಳ ಕಂಡತ್. ಅಯಿಂಗ ಯೇಸುನ ಕೊಲ್ಲ್‌ವಕ್ ಉಪಾಯ ಮಾಡ್‍ಚಿ.
ಯೇಸುರ ಪಕ್ಕ ದುಂಬ ಜನ ಬಂದತ್
(ಮತ್ತಾಯ 10.1–4; ಲೂಕ 6.12–16)
7ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಆ ಜಾಗತ್‍ನ ಬುಟ್ಟಿತ್ ಗಲಿಲಾಯ ಕೆರೆರ ಕರೆಕ್ ಪೋಚಿ. 8ಯೆರೂಸಲೇಮ್ ಕೂಡಿತ್, ಯೂದಾಯ ಪ್ರಾಂತ್ಯತ್ಂಜಲು, ಇದೂಮಾಯ ಪ್ರಾಂತ್ಯತ್ಂಜಲು, ಯೊರ್ದನ್ ಕೆರೆರ ಅಪ್ಪರತ್ಂಜಲು, ತೀರ್, ಸೀದೋನ್ ಪಟ್ಟಣತ್‍ರ ಸುತ್ತ್‌ಮುತ್ತ್‌ಯಿಂಜಲು ದುಂಬ ಜನ ಅಂವೊಂಡ ಪಕ್ಕ ಬಾತ್. 9ಅಂವೊ ದುಂಬ ಜನಡ ಕಾಯಿಲೆನೆಲ್ಲ ವಾಸಿ ಮಾಡ್‍ಚಿ, ಕಾಯ್ಲೆಸ್ತೆಂಗೆಲ್ಲ ಅದ್‍ನ ಕ್‍ೕಟಿತ್ ಅಂವೊನ ಮುಟ್ಟ್‌ವಕಾಯಿತ್ ಜನಡ ಕೂಟ‌ತ್‍ಲ್ ನೂಕಿತ್ ನುಗ್ಗಿಯಂಡಿಂಜತ್. 10ಬಪ್ಪ ಜನಡ ಕೂಟ ಬಲ್ಯದಾನದ್‌ನ ಕಂಡಿತ್, ಯೇಸು ಅಂವೊಂಡ ಶಿಷ್ಯಂಗಕ್ ನಾಕ್ ಒರ್ ದೋಣಿನ ತಯಾರ್ ಮಾಡಿ, ಈ ಜನ ನನ್ನ ನೆರ್‍ಕತನೆಕೆ ಮಾಡೀಂದ್ ಎಣ್ಣ್‌ಚಿ. 11ಕೂಳಿ ಪುಡ್‌ಚ ಜನ ಅಂವೊನ ಕಾಂಬಕ, ನೀನ್ ನೇರಾಯಿತು ದೇವಡ ಮೋಂವೊನೇ ಎಣ್ಣಿಯಂಡ್ ನೆಲಕ್ ಬುದ್ದಿತ್ ಕೂತ್ ಕೊಡ್‍ತತ್. 12ಆಚೇಂಗಿ ತಾಂಡ ವಿಷಯತ್‍ನ ದಾರ್‌ಕು ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಕೊಡ್‍ತತ್.
ಯೇಸು ಪನ್ನೆರಂಡ್ ಶಿಷ್ಯಂಗಳ ಆಯ್ಕೆ ಮಾಡ್‍ನದ್
(ಮತ್ತಾಯ 10.1–4; ಲೂಕ 6.12–16)
13ಯೇಸು ಕುಂದ್‌ರ ಕೊಡಿಕ್ ಪೋಯಿತ್ ಅಂವೊಂಗ್ ಬೋಂಡಿಯಾನಯಿಂಗಳ ಕಾಕ್‍ಚಿ. ಅಯಿಂಗ ಅಂವೊಂಡ ಪಕ್ಕ ಬಾತ್. 14ಅಕ್ಕ ಅಂವೊ ಪನ್ನೆರಂಡ್ ಜನಳ ಆಯ್ಕೆ ಮಾಡಿತ್, ಅಯಿಂಗಕ್ ಅಪೊಸ್ತಲ ಎಣ್ಣುವ ಪೆದ ಇಟ್ಟತ್. ಅಯಿಂಗ ತಾಂಡಕೂಡೆ ಇಪ್ಪಕು, ಪ್ರಚಾರ ಮಾಡ್‌ವಕು, 15ಜನಡ ವ್ಯಾದಿನ ವಾಸಿ ಮಾಡಿತ್ ಕೂಳಿ ಬುಡ್‌ತ್‌ವಕು ಅದಿಕಾರ ಉಳ್ಳವಯಿಂಗಳಾಯಿತ್ ಅಯಿಂಗಳ ನೇಮಿಚಿಟ್ಟತ್. 16ಆ ಪನ್ನೆರಂಡ್ ಶಿಷ್ಯಂಗ ದಾರ್‍ೕಂದ್ ಎಣ್ಣ್‌ಚೇಂಗಿ; ಸೀಮೋನ, ಯೇಸು ಅಂವೊಂಗ್ ಪೇತ್ರ#3.16 ಪೇತ್ರ ಎಣ್ಣ್‌ಚೇಂಗಿ ಬಂಡೆ ಕಲ್ಲ್‍ೕಂದ್ ಅರ್ಥ ಎಣ್ಣ್‌ವ ಪೆದ ಕೊಡ್‍ತತ್. 17ಜೆಬೆದಾಯಂಡ ಕ್‌ಣ್ಣ ಮಕ್ಕ ಯಾಕೋಬ ಪಿಂಞ ಯೋಹಾನ, ಅಯಿಂಗಕ್ ಬೊವನೆರ್ಗೆಸ್ ಎಣ್ಣ್‌ವ ಪೆದ ಕೊಡ್‍ತತ್; ಅದ್ಂಗ್ ತೆಡ್‌ರ ಮಕ್ಕಾಂದ್ ಅರ್ಥ. 18ಅಂದ್ರೆಯ, ಫಿಲಿಪ್ಪ, ಬಾರ್ತೊಲೊಮಾಯ, ಮತ್ತಾಯ, ತೋಮ, ಅಲ್ಫಾಯಂಡ ಮೋಂವೊನಾನ ಯಾಕೋಬ, ತದ್ದಾಯ, ದೇಶ ಪ್ರೇಮಿಯಾನ#3.18 ಯೇಸುರ ಕಾಲತ್‍ಲ್ ಪಲಸ್ತೀನ ದೇಶತ್‍ನ ಆಳಿಯಂಡಿಂಜ ರೋಮ್ ರಾಜ್ಯಕ್ ವಿರೋದವಾಯಿತ್ ದಂಗೆ ಮಾಡಿಯಂಡಿಂಜ ರಾಜಕೀಯ ಪಕ್ಷ. ಸೀಮೋನ 19ಪಿಂಞ ಯೇಸುನ ಕೊಲ್ಲ್‌ವಕ್ ಕಾಟಿಕೊಡ್‌ತಂವೊನಾನ ಇಸ್ಕರಿಯೋತ ಯೂದ ಎಣ್ಣ್‌ವಯಿಂಗಳೇ.
ಯೇಸುರ ಶತ್ರುವ ಅಂವೊನ ದೂಷಣೆ ಮಾಡ್‍ನದ್, ಅಂವೊನ ಅನುಮಾನಪಟ್ಟದ್
(ಮತ್ತಾಯ 12.22–32; ಲೂಕ 8.19–21; 11.14–23)
20ಪಿಂಞ ಯೇಸು ಮನೆಕ್ ಪೋಚಿ. ಅಲ್ಲಿ ಅಂವೊಂಗು ಅಂವೊಂಡ ಶಿಷ್ಯಂಗಕು ಉಂಬಕ್ ಸಹ ಸಮಯ ಕ್‌ಟ್ಟತಚ್ಚಕ್ ಜನ ಪುನಃ ಬಂದಿತ್ ಕೂಡಿತ್ಂಜತ್. 21ಇದ್ ಯೇಸುರ ಕುಟುಂಬಕಾರಕ್ ಗೊತ್ತಾಚಿ. ಯೇಸುಕ್ ಪುಚ್ಚ್ ಪುಡ್‍ಚಿ ಪೋಚೀಂದ್ ಗೇನ ಮಾಡಿತ್ ಯೇಸುನ ಕಾಕಿಯಂಡ್ ಪೋಪಕ್ ನೋಟಿಯಂಡ್ ಇಂಜತ್. 22ಯೆರೂಸಲೇಮ್ಂಜ ಚೆನ್ನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಬಂದಿತ್, ಯೇಸುಕ್ ಬೆಲ್ಜೆಬೂಲ್#3.22 ಸೈತಾನಂಗ್ ಬೆಲ್ಜೆಬೂಲ್ ಎಣ್ಣುವ ಪೆದ ಸಹ ಉಂಡ್. ಅಂವೊ ಕೂಳಿಯಡ ಪೆರಿಯಂವೊ. ಎಣ್ಣುವ ಕೂಳಿ ಪುಡ್‌ಚಿತುಂಡ್, ಇಂವೊ ಸೈತಾನಂಡ ಎಜಮಾನನಗುಂಡ್ ಸೈತಾನನ ಬುಡ್‌ತಿಯಂಡುಂಡ್‍ೕಂದ್ ಎಣ್ಣ್‌ಚಿ.
23ಯೇಸು ಅಯಿಂಗಳ ಕಾಕುವಂಜಿ ಕಥೇರ ರೂಪತ್‌ಲ್: ಸೈತಾನ ಸೈತಾನನ ಬುಡ್‌ತ್‌ವಕ್ ಕಯ್ಯುವ? 24ಒರೇ ದೇಶತ್‍ರ ಜನ ಅಯಿಂಗಯಿಂಗಳೇ ಜಗಳ ಮಾಡಿಯಂಡ್ ಇಂಜತೇಂಗಿ ನಾಶ ಆಯಿಪೋಪಲ್ಲಾ 25ಅನ್ನನೆ ಒರ್ ಕುಟುಂಬತ್‍ಲ್ ಉಳ್ಳಯಿಂಗ ಅಯಿಂಗಯಿಂಗಳೇ ಜಗಳ ಮಾಡಿಯಂಡ್ ಇಂಜತೇಂಗಿ ಆ ಕುಟುಂಬ ಒಡಂದ್ ಪೋಪಲ್ಲಾ. 26ಅನ್ನನೆ, ಸೈತಾನ ಅಂವೊಂಗ್ ವಿರೋದವಾಯಿತ್ ಅಂವೊಂಡ ಗುಂಪ್‌ಲ್ ಜಗಳ ಮಾಡಿಯಂಡಿಂಜತೇಂಗಿ ಅಂವೊ ನಿಪ್ಪಕಯ್ಯತೆ ನಾಶ ಆಯಿಪೋಪ. 27ಒರ್ ಗಟ್ಟಿಮುಟ್ಟಾನ ಮನುಷ್ಯನ ಕೆಟ್ಟಿ ಇಡತೆ ಪೋಚೇಂಗಿ ಅಂವೊಂಡ ಮನೆನ ಒಡ್‌ಪಂಜಿ ಅಂವೊಂಡ ಮನೆರ ಒಳ್‍ಲ್ ಉಳ್ಳದ್‍ನ ಲೂಟಿ ಮಾಡ್‌ವಕಯ್ಯುವ? ಅಂವೊಂಡ ಕೈಕಾಲ್ ಕೆಟ್ಟಿತ್ ಇಟ್ಟಿತುಂಡೇಂಗಿ ಮಾತ್ರ ಅಂವೊಂಡ ಮನೆನ ಲೂಟಿ ಮಾಡ್‌ವಕಯ್ಯು. 28ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ: ಮನುಷ್ಯಂಗ ಮಾಡ್‌ವ ಏದ್ ಪಾಪಕು ಪಿಂಞ ಅಯಿಂಗ ಪರಿಯುವ ದೇವದೂಷಣೆಕು ಮನ್ನಿಪ್ ಕ್‍ಟ್ಟ್‌ವ. 29ಆಚೇಂಗಿ ದಾರ್ ಪವಿತ್ರಾತ್ಮಂಡ ಮೇಲೆ ದೂಷಣೆ ಪರಿಯುವ ಅಯಿಂಗಕ್ ಮನ್ನಿಪ್ ಕ್‍ಟ್ಟ್‌ಲೆ. ಎನ್ನಂಗೆಣ್ಣ್‌ಚೇಂಗಿ ಇದ್ ನಿತ್ಯ ಪಾಪ, ಆನಗುಂಡ್ ನಿತ್ಯ ಕಂಡನೆಕ್ ಒಳಪಡ್‌ವ. 30ಯೇಸುರ ಮೇಲ್‌ಲ್ ಕೂಳಿ ಉಂಡ್‍ೕಂದ್ ಅಯಿಂಗ ಪರ್‌ದಂಡ್ ಇಂಜಗುಂಡ್ ಯೇಸು ಇನ್ನನೆ ಎಣ್ಣ್‌ಚಿ.
ಯೇಸುರ ಅವ್ವ ಪಿಂಞ ಅಣ್ಣತಮ್ಮಣಂಗ
31ಅಕ್ಕ ಅಂವೊಂಡ ಅವ್ವಳು ಪಿಂಞ ತಮ್ಮಣಂಗಳು ಬಂತ್, ಪೊರಮೆ ನಿಂದಿತ್ ಅಂವೊನ ಕಾಕ್‌ವಕಾಯಿತ್ ಒಬ್ಬನ ಒಳ್‍ಕ್ ಅಯಿಚತ್. 32ಅಲ್ಲಿ ಅಂವೊಂಡ ಸುತ್ತ್‌ಲ್ ಇಂಜ ಜನ ಅಂವೊನ ನೋಟಿತ್, ಅದೋ ನೀಡ ಅವ್ವ ಪಿಂಞ ತಮ್ಮಣಂಗ ನಿನ್ನ ತ್‍ೕಡಿಯಂಡುಂಡ್‍ೕಂದ್ ಎಣ್ಣ್‌ಚಿ.
33ಅದ್ಂಗ್ ಅಂವೊ: ದಾರ್ ನಾಡ ಅವ್ವ? ದಾರ್ ನಾಡ ಅಣ್ಣತಮ್ಮಣಂಗಾಂದ್ ಎಣ್ಣಿತ್; 34ಯೇಸು ತಾಂಡ ಸುತ್ತ್‌ಲ್ ಅಳ್‌ತಿತ್ ಉಳ್ಳ ಜನಳ ನೋಟಿತ್, ನೋಟಿ, ಇಲ್ಲಿ ಅಳ್‍ತಿತುಳ್ಳ ಜನಳೇ ನಾಡ ಅವ್ವ, ಅಣ್ಣತಮ್ಮಣಂಗ ಪಿಂಞ ಅಕ್ಕತಂಗೆಯ. 35ದಾರೆಲ್ಲಾ ದೇವಡ ಚಿತ್ತ ಮಾಡ್‌ವ ಅಯಿಂಗಳೇ ನಾಡ ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅವ್ವಾಂದ್ ಎಣ್ಣ್‌ಚಿ.
Currently Selected:
ಮಾರ್ಕ 3: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
