ಮಾರ್ಕ 2
2
ಯೇಸು ಒರ್ ರೋಗಿರ ಪಾಪತ್‍ನ ಮನ್ನಿಚಿಟ್ಟಾಂಗ್ ಉಪಾದ್ಯಂಗ ಅಂವೊಂಡ ಮೇಲೆ ಆಕ್ಷೇಪಣೆ ಮಾಡ್‍ನದ್
(ಮತ್ತಾಯ 9.1–8; ಲೂಕ 5.17–26)
1ಚೆನ್ನ ದಿವಸ ಕಯಿಂಜ ಪಿಂಞ ಯೇಸು ಕಪೆರ್ನೌಮ್‍ಕ್ ಪೋಚಿ. ಅಂವೊ ಮನೆಲ್ ಉಂಡ್‍ೕಂದ್ ಎಲ್ಲಾರ್‌ಕು ಗೊತ್ತಾಚಿ. 2ಅಂವೊಂಡ ಮನೆಕ್ ದುಂಬ ಜನ ಬಂದಿತ್ ಕೂಡ್‍ಚಿ. ಮನೆರ ಒಳ್‍ಲ್, ಬಾಯಿಕಂಡಿಲ್ ಜನ ದುಂಬ್‌ನಗುಂಡ್ ಪೊರಮೆ ಕಂಡಿಲ್ ಸಹ ಜಾಗ ಇಲ್ಲತಾಚಿ. ಯೇಸು ಅಯಿಂಗಕ್ ದೇವಡ ವಿಷಯತ್‍ನ ಬೋದನೆ ಮಾಡಿಯಂಡ್ ಇಂಜತ್. 3ಅಕ್ಕಣೆಕ್ ನಾಲ್ ಜನ ಪಾರ್ಶ್ವವಾಯುಲ್ ನರಳಿಯಂಡಿಂಜ ಒರ್ ಮನುಷ್ಯನ ಯೇಸುರ ಪಕ್ಕ ಕೊಂಡ್ ಬಾತ್. 4ದುಂಬ ಜನ ಇಂಜಗುಂಡ್ ಆ ಮನುಷ್ಯನ ಯೇಸುರ ಪಕ್ಕ ಎಡ್‌ತ ಪೋಪಕ್ ಕಯ್ಯತಾಚಿ. ಅಕ್ಕ ಅಯಿಂಗ ಮೋಂದಾಯತ್‌ನ ತೂತ ಮಾಡಿತ್, ಆ ಮನುಷ್ಯ ಬುದ್ದಡಿಂಜ ಕಡ್‌ಕೆನ ಅಡಿಕ್ ಇಳ್‌ಪ್‍ಚಿ.
5ಯೇಸು ಅಯಿಂಗಡ ನಂಬಿಕೇನ ಕಂಡಿತ್, ಆ ಮನುಷ್ಯಂಗ್: ನಾಡ ಮೋನೇ, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.
6ಅಲ್ಲಿ ಇಂಜ ನ್ಯಾಯಪ್ರಮಾಣತ್‍ರ ಚೆನ್ನ ಉಪಾದ್ಯಂಗ: ಈ ಮನುಷ್ಯ ಎನ್ನನೆ ಇಂತ ತಕ್ಕ್‌ನೆಲ್ಲ ಪರಿವಾಂದ್ ಗೇನ ಮಾಡಿಯಂಡ್ ಇಂಜತ್. 7ಇದ್ ದೇವ ದೂಷಣೆ! ದೇವಕ್ ಮಾತ್ರ ಮನುಷ್ಯಂಡ ಪಾಪತ್‍ನ ಮನ್ನಿಚಿಡ್‌ವಕ್ ಕಯ್ಯು.
8ಅಕ್ಕಣೆ ಯೇಸುಕ್ ಈ ಮನುಷ್ಯಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾನಗುಂಡ್, ಅಯಿಂಗಳ ನೋಟಿತ್: ಎನ್ನಂಗ್ ನಿಂಗ ಇಂತದೆಲ್ಲ ಗೇನ ಮಾಡ್‌ವಿರಾಂದ್ ಯೇಸು ಕ್‍ೕಟತ್. 9ಒರ್ ಪಾರ್ಶ್ವವಾಯುಲ್ ನರಳಿಯಂಡ್ ಉಳ್ಳ ಮನುಷ್ಯಂಗ್, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ವಕ್ ಸುಲಬವಾ, ಇಲ್ಲತಪೋನಕ ನೀಡ ಕಾಯಿಲೆ ವಾಸಿ ಆಚಿ ಏಳ್, ನೀಡ ಕಡ್‌ಕೆನ ಸುತ್ತುವಂಜಿ ನಡೇಂದ್ ಎಣ್ಣ್‌ವಕ್ ಸುಲಬವಾ? 10ಮನುಷ್ಯಂಗಡ ಪಾಪತ್‍ನ ಮನ್ನಿಚಿಡ್‌ವಕ್ ಮನುಷ್ಯಕುಮಾರಂಗ್ ಈ ಬೂಮಿಲ್ ಅದಿಕಾರ ಉಂಡ್‍ೕಂದ್ ನಾನ್ ನಿಂಗಕ್ ಕಾಟಿತಪ್ಪೀಂದ್ ಎಣ್ಣಿತ್, ಯೇಸು ಕಾಯಿಲೆಲ್ ಇಂಜ ಮನುಷ್ಯನ ನೋಟಿತ್: 11ಏಳ್, ನೀಡ ಕಡ್‌ಕೆನ ಎಡ್‍ತಂಡ್, ನೀಡ ಮನೆಕ್ ಪೋಂದ್ ಎಣ್ಣ್‌ಚಿ. 12ಅಕ್ಕಣೆಕ್, ಆ ಮನುಷ್ಯ ಎದ್ದಿತ್ ತಾಂಡ ಕಡ್‌ಕೆನ ಸುತ್ತಿಯಂಡ್ ಎಲ್ಲಾಡ ಮಿಂಞತ್ ನಡ್ಂದ್ ಪೋಚಿ. ಅಕ್ಕ ಅಲ್ಲಿ ಉಳ್ಳ ಜನ ಎಲ್ಲಾರು ಆಶ್ಚರ್ಯ ಪಟ್ಟಿತ್, ಇಂತ ಒರ್ ಅದ್ಬುತ ಕಾರ್ಯತ್‍ನ ನಂಗ ಕಂಡಿತೇ ಇಲ್ಲೇಂದ್ ಎಣ್ಣಿತ್, ದೇವನ ತುದಿಪಕ್ ಸುರು ಮಾಡ್‍ಚಿ.
ಯೇಸು ಪಾಪಿಯಡ ಕೂಡೆ ಉಳ್ಳಾಂಗ್ ಉಪಾದ್ಯಂಗ ಅಂವೊಂಡ ಮೇಲೆ ಆಕ್ಷೇಪಣೆ
(ಮತ್ತಾಯ 9.9–13; ಲೂಕ 5.27–32)
13ಯೇಸು ಗಲಿಲಾಯ ಎಣ್ಣುವ ಕೆರೆರ ಕರೆಕ್ ಪುನಃ ಪೋಚಿ. ಅಂವೊಂಡ ಪಕ್ಕ ದುಂಬ ಜನ ಬಾತ್; ಅಂವೊ ಅಯಿಂಗಕ್ ಬೋದನೆ ಮಾಡ್‍ಚಿ. 14ಯೇಸು ಅನ್ನನೆ ನಡ್‌ದಂಡ್ ಪೋಯಂಡ್ ಇಪ್ಪಕ ಅಲ್ಫಾಯ ಎಣ್ಣ್‌ವಂವೊಂಡ ಮೋಂವೊ ಲೇವಿ ಎಣ್ಣ್‌ವಂವೊ ಅಂವೊಂಡ ಕಂದಾಯ ಎಡ್‌ಪ ಕಛೇರಿಲ್ ಅಳ್‌ತಂಡಿಪ್ಪದ್‍ನ ಕಂಡತ್. ಯೇಸು ಅಂವೊನ ಕಂಡದು ನಾಡ ಬಯ್ಯ ಬಾಂದ್ ಎಣ್ಣ್‌ಚಿ. ಅಕ್ಕ ಅಂವೊ ಎದ್ದಿತ್ ಅಂವೊಂಡ ಬಯ್ಯಕ್ ಪೋಚಿ. 15ಬಯ್ಯಂಜಿ ಯೇಸುಕ್ ಲೇವಿರ ಮನೆಲ್ ಗದ್ದಾಳ ಇಂಜತ್. ಲೇವಿರ ಮನೆಲ್ ದುಂಬ ಕಂದಾಯ ಎಡ್‌ಪ ಜನ ಪಿಂಞ ಸಮಾಜ ಪಾಪೀಂದ್ ಎಣ್ಣ್‌ವಂತ ಜನ ಅಲ್ಲಿಕ್ ಬಂದಿತ್ ಅಂವೊಂಡ ಕೂಡೆ ಪಿಂಞ ಶಿಷ್ಯಂಗಡ ಕೂಡೆ ಉಂಬಕಿಂಜತ್. 16ಯೇಸು ಕಂದಾಯ ಎಡ್‌ಪಂವೊ ಪಿಂಞ ಸಮಾಜ ಪಾಪೀಂದ್ ಎಣ್ಣ್‌ವ ಜನಡ ಕೂಡೆ ಉಂಬದ್‌ನ ನ್ಯಾಯಪ್ರಮಾಣತ್‍ರ ಉಪಾದ್ಯಾಂಗಳಾನ ಫರಿಸಾಯಂಗ ನೋಟಿತ್, ಯೇಸುರ ಶಿಷ್ಯಂಗಡ ಪಕ್ಕ: ಎನ್ನಂಗ್ ಅಂವೊ ಕಂದಾಯ ಎಡ್‍ಪಯಿಂಗ ಪಿಂಞ ಸಮಾಜ ಪಾಪಿಯಿಂಗಾಂದ್ ಎಣ್ಣುವ ಜನಡ ಕೂಡೆ ಉಂಬಾಂದ್ ಕ್‍ೕಟತ್.
17ಯೇಸು ಅಯಿಂಗಡ ತಕ್ಕ್‌ನ ಕ್‍ೕಟಿತ್, ಅಂತು, ದಾರ್ ಸೌಕ್ಯತ್‌ಲ್ ಉಂಡೋ ಅಯಿಂಗಕ್ ವೈದ್ಯ ಬೋಂಡ, ದಾರ್‌ಕ್ ಸೌಕ್ಯ ಇಲ್ಲತೆ ಉಂಡೋ ಅಯಿಂಗಕ್ ಮಾತ್ರ ವೈದೈಂಗ ಬೋಂಡಿಯೆ. ನೀತಿವಂತಯಿಂಗಳ ಅಲ್ಲ, ಆಚೇಂಗಿ ಪಾಪಿಯಳ ಕಾಕಿಯಂಡ್ ಪೋಪಕಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ.
ಯೇಸುರ ಶಿಷ್ಯಂಗ ಉಪವಾಸ ಮಾಡತಾಂಗ್ ಉಪಾದ್ಯಂಗ ಅಂವೊಂಡ ಮೇಲೆ ಆಕ್ಷೇಪಣೆ ಮಾಡ್‍ವದ್
(ಮತ್ತಾಯ 9.14–17; ಲೂಕ 5.33–39)
18 ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಪಿಂಞ ಫರಿಸಾಯಂಗ ಪಟ್ಟಣಿ ನಿಂದತ್. ಚೆನ್ನ ಜನ ಯೇಸುರ ಪಕ್ಕ ಬಂತ್, ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಪಿಂಞ ಫರಿಸಾಯಂಗಡ ಶಿಷ್ಯಂಗ ಪಟ್ಟಣಿ ನಿಂದತಲ್ಲ, ಆಚೇಂಗಿ ನೀಡ ಶಿಷ್ಯಂಗ ಪಟ್ಟಣಿ ನಿಂದಿತ್‌ಲ್ಲೆಲ್ಲಾಂದ್ ಕ್‍ೕಟತ್.
19ಅದ್ಂಗ್ ಯೇಸು: ಮಂಗಲಕಾರ ಅಯಿಂಗಡ ಕೂಡೆ ಇಪ್ಪಕಾಪಕ ಅಂವೊಂಡ ಚಂಙಾದಿಯ ಪಟ್ಟಣಿ ನಿಕ್ಕಂಡುವಾ? ಪುತ್ತಾಂಗಾರ ಇಪ್ಪಕತ್ತನೆ ಅಯಿಂಗ ಪಟ್ಟಣಿ ನಿಪ್ಪುಲೆ. 20ಆಚೇಂಗಿ ಮಂಗಲಕಾರನ ಅಯಿಂಗಡ ಕೂಟ್‌ಂಜ ಕಾಕಿಯಂಡ್ ಪೋಪ ಸಮಯ ಬಪ್ಪ, ಅಕ್ಕ ಅಯಿಂಗ ಉಪವಾಸ ಮಾಡ್‌ವಾಂದ್ ಎಣ್ಣ್‌ಚಿ 21ದಾರೂ ಪಳೆಯ ಬಟ್ಟೇಕ್, ಚುರ್ಂಗಿ ಪೋಕತ ಪುದಿಯ ತುಣಿನ ಅಡ್ಡಬೆಚ್ಚಿತ್ ಪೊಲ್ಲ್‌ಚಿಡುಲೆ. ಎನ್ನಂಗೆಣ್ಣ್‌ಚೇಂಗಿ ಪುದಿಯ ಬಟ್ಟೆ ಚುರುಂಗಿತ್ ಇಂಞು ಬಲ್ಯ ತೂತತ್‍ನ ಮಾಡ್‌ವ. 22ದಾರೂ ಪುದಿಯದಾಯಿತ್ ಮಾಡ್‍ನ ದ್ರಾಕ್ಷಿರಸತ್‍ನ ಪಳೆಯ ಚರ್ಮತ್‌ರ ಚೀಲಕ್ ಬೂಕ್‌ಲೆ, ಅನ್ನನೆ ಮಾಡ್‍ಚೇಂಗಿ ಚರ್ಮತ್‌ರ ಚೀಲ ಒಡಂದ್ ಪೋಪ. ಚೀಲ ಒಡಂದ್ ಪೋಯಿತ್, ದ್ರಾಕ್ಷಿರಸವು ಚೆಲ್ಲಿಪೋಪ. ಅದ್ಂಡ ಬದ್‍ಲ್ ಪುದಿಯ ದ್ರಾಕ್ಷಿರಸತ್‍ನ ಪುದಿಯ ಚಕ್ಕಳತ್‍ರ ಚೀಲಕ್ ಬೂಕಂಡು.
ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಸಬ್ಬತ್ ದಿವಸತ್‍ನ ಅಲಕ್ಷ್ಯ ಮಾಡ್‌ವಾಂದ್ ಉಪಾದ್ಯಂಗ ಆಕ್ಷೇಪಣೆ ಮಾಡ್‍ವದ್
(ಮತ್ತಾಯ 12.1–8; ಲೂಕ 6.1–5)
23ಪಿಂಞ ಯೇಸು ಸಬ್ಬತ್#2.23 ಸಬ್ಬತ್ ಎಣ್ಣ್‌ಚೇಂಗಿ ಸಂಖ್ಯೆ ಏಳ್ಂದ್ ಅರ್ಥ. ಆ ದಿನತ್‌ಲ್ ಯೆಹೂದ್ಯಂಗ ಆರಾಮ್ ಮಾಡ್‌ವ ಪಿಂಞ ದೇವನ ತುದಿಪ. ನ್ಯಾಯಪ್ರಮಾಣತ್‍ರ ಪ್ರಕಾರ ದಾರೂ ಒರ್ ಕೆಲಸವು ಮಾಡ್‌ವಕ್ಕಾಗ. ದಿವಸತ್‍ಲ್ ಗೋದಿ ನಟ್ಟ ಬೇಲ್‌ಲ್ ನಡ್ಂದ್ ಪೋಯಂಡ್ ಇಂಜತ್. ಅಂವೊಂಡ ಶಿಷ್ಯಂಗ ಅಂವೊಂಡ ಕೂಡೆ ನಡ್ಂದ್ ಪೋಯಂಡ್ ಇಪ್ಪಕ ಗೋದಿರ ಕೊಡಿನ ಞುಂಡ್‌ವಕ್ ಸುರ್ ಮಾಡ್‍ಚಿ.
24ಫರಿಸಾಯಂಗ ಯೇಸುನ ನೋಟಿತ್: ಎನ್ನಂಗ್ ನೀಡ ಶಿಷ್ಯಂಗ ಮೋಶೇರ ಕಾನೂನ್‍ಕ್ ವಿರೋದವಾಯಿತ್ ಸಬ್ಬತ್ ದಿವಸತ್‍ಲ್ ಮಾಡಕ್ಕಾಗತ ಕೆಲಸತ್‍ನ ಮಾಡಿಯಂಡುಂಡ್‍ೕಂದ್ ಕ್‍ೕಟತ್.
25ಅದ್ಂಗ್ ಯೇಸು: ದಾವೀದ ಪಿಂಞ ಅಂವೊಂಡ ಕೂಡೆ ಇಂಜಯಿಂಗ ಕೆಲ ಪಯಿಪಕ ಮಾಡ್‌ನಾನ ನಿಂಗ ಓದಿತ್‌ಲ್ಲೆಯಾ? 26ಅಂವೊನು ಅಂವೊಂಡ ಕೂಟ್‌ಕಾರಳು ದೇವಡ ಮನೆರ ಒಳ್‍ಕ್ ಪೋಯಿತ್ ದೇವಕ್ ಬೆಚ್ಚ ಒಟ್ಟಿನ ತಿಂದ ವಿಷಯತ್‍ನ ನಿಂಗ ಪುಸ್ತಕತ್‍ಲ್ ಓದಿತ್‌ಲ್ಲೆಯಾಂದ್ ಕ್‍ೕಟತ್. ಆ ಸಮಯತ್‍ಲ್ ಅಬಿಯಾತರ ಎಣ್ಣ್‌ವಂವೊ ಮಹಾ ಯಾಜಕನಾಯಿತ್ಂಜತ್. ನ್ಯಾಯಪ್ರಮಾಣತ್‍ರ ಪ್ರಕಾರ ದೇವಕ್ ಬೆಚ್ಚ ಒಟ್ಟಿನ ಯಾಜಕಂಗ ಮಾತ್ರ ತಿಂಬಕ್ ಇಂಜತ್. ಆಚೇಂಗಿ ದಾವೀದ ಮಾತ್ರ ತಿಂದತಲ್ಲತೆ, ಅಂವೊಂಡ ಕೂಡೆ ಇಂಜ ಕೂಟ್‌ಕಾರಕು ಒಟ್ಟಿನ ಕೊಡ್‍ತತ್. 27ಸಬ್ಬತ್ ದಿವಸ ಮನುಷ್ಯಂಗಕಾಯಿತ್ ಮಾಡ್‍ಚಿ, ಆಚೇಂಗಿ ಮನುಷ್ಯಂಗಳ ಸಬ್ಬತ್ ದಿವಸಕಾಯಿತ್ ಮಾಡಿತ್‌ಲ್ಲೆ. 28ಆನಗುಂಡ್ ಮನುಷ್ಯಕುಮಾರ ಸಬ್ಬತ್ ದಿವಸಕೂ ಒಡೆಯನಾಯಿತುಂಡ್‍ೕಂದ್ ಎಣ್ಣ್‌ಚಿ.
Currently Selected:
ಮಾರ್ಕ 2: ಕೊಡವ
Highlight
Share
Copy
Want to have your highlights saved across all your devices? Sign up or sign in
© 2017, New Life Literature (NLL)
