Sawmus 28
28
Uya mpithan giwkis hiyeg mbayavye gihiyekemnikis
1Kiyavwiye Uhokri, nayemwekri, ku avim inin nah kanumpi. Timapnaba namnihswan pit. Ka ba mataybisawnama nuwhu. Ku pis ka kaytwanek nuwnuh, ka baki nah aymuhwakere ay amadga inin hawkri akiw, pi kabayte nah miya.
2Timapnanuba ku aysaw nah tarak nuwakuh arimkanit pivin barewvitye nah kabiman adahan amnihswene pit.
3Uya amnih mpithan giwkis hiyeg mbayavye gihiyekemnikis. Ka ba pisenwepma nukakuh payak gikakkis ku pariye kehnevwi mbeyne. Hawata, ka ba isaksa nah kinikiswa gitkis hiyeg ku pariye kinista giyakikis hiyeg akak barewye iwit, bawa gihiyekemnikis mbeyevye.
4Hiyapkis mbeyne gitkis ignes hiyeg avatra maditke mbayka ku pariye gikehavankis. Iki gitkis mbayavye ku pariye kis gidahankis.
5Igkis ka hiyekere amin ku pariye Kiyavwiye Uhokri Dehetniye gikehavan akak gidatni; inneki keh ig hiyapkisnek gitkis nivatra. Ig pisenwanek gikakkis adahan avanenekwa.
6Kibeyne gidahan Kiyavwiye Uhokri Dehetniye, mmanawa ig timep namnihswan git.
7Ig Kiyavwiye Uhokri ignewa nudatni, ignewa numaptenten ariw mbeyne; nah kamaxwa givitit avititak nuyakni. Ig Kiyavwiye Uhokri ignewa ayavan; inneki keh nah ka nubetkisima hawata nah paksig akak avat adahan kabeyhene giw!
8Ig Kiyavwiye Uhokri Dehetniye ignewa gidatnikis gihiyegavu. Ignewa gamnihten hawata gibiskegki ikivarat ku pariye gikanyan.
9Kiyavwiye Uhokri, amnihnaba pihiyegavu hawata ikinaba kabayka gitkis neras ku pariye pidahanviyenevwi! Humawnaba gikavriwtenkis. Avuriwnigkisba adahan avanenekwa!
Currently Selected:
Sawmus 28: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
