Sawmus 27

Kiyavwiye, nah hiyepkere pihepka

1Ig Kiyavwiye Uhokri Dehetniye ignewa uguh nuhiyekemni, ignewa namnihten; kabohriki nah avis? Ig bisiksan ariw mbeyne. Ku aysaw ig ay nukakuh nah ka avis gibohri pahavwinema hiyeg.

2Ku aysaw nuvetunyavu mbayavye igkis ayta sigis numinuh adahan pisenwevye nukakuh, igkisnewa tayuhbetkisnek, igkis tuguhe.

3Hiyawa ka aynsima hiyegviyene ayta kiyaraniwhpen, heneme nah ka avis aynesnima. Hiyawa nah aynte abet kerka gitivutkis nuvetunyavu, nah nudukwenewa kamaxwenene givitit Kiyavwiye Uhokri.

4Nah pahatwowa nayapni git Kiyavwiye Uhokri Dehetniye, in ku pariye nah aharit ininewa: numawkan ig isaksan nah misakwa ay gimun takunipti ku samah nayivwi adahan nah hiyepne gibewi, nah ikatuswene git.

5Ku aysaw nah abet kiyimwikinek, ka sam. Ig amavunnek arikut givin. Ig bayahunnek ariku giwskeki. In ke wotbe ig nukeptenbenek aynte avitmin pahow tip imuwadnano ku kiney nuvetunyavu ka hiya nusamanak atere.

6Hene nah matakanek nuvetunyavu ku pariye ay nanwa kiyaran nukakuh. Akak kabimanka madikte nubetki, nah kakanhawnek git Kiyavwiye ayge ariku givin. Nah paknek avat git. Nah kabayhignek kiyesad.

7Kiyavwiye Uhokri, timapnanuba ku aysaw nah kanumpi! Akkanaba pamnihra nutuh hawata kaytwanaba nuwnuh.

8Piswa awna nutuh: “Ba ayta kennesa nutuh. Ivegva nuhepka.” Nahme kaytwa piwn: “Kiyavwiye, nah aterenek ta pivetunat adahan nah hiyepne pihepka.”

9Ka ba ayamwa nuwhu. Ka ba dagawnaw nutuh; ka ba tukuhun nah pibuk. Kiyavwiye Uhokri, namnihten, pisnewa nayavetni; ka ba ikiswenuma, ka ba maytwevunma.

10 Kibeyne. Hiyawa niguh gukak nnaguh tukuhpen, igme Kiyavwiye Uhokri avuriwhunnek.

11Kiyavwiye Uhokri, uya kannuhun adahan nah keh ku samah pimawkan. Huwithanuba avigku pihina waditye, mmanawa nuvetunyavu igkis ka aynsima.

12Ka ba ikevunma giwakuritkis neras nuvetunyavu. Igkis awna wasaymkanenwa numinuh. Igkis puwimahun akak garewhankis.

13 Ka sam. Nah hiyak ku nah dahwanek adahan nah hiyepne Kiyavwiye Uhokri gabay gikakkis gihiyegavu amadgaya inin.

14 Nukebyuvwi, kamaxwanabay kabayntiwa givitit Kiyavwiye Uhokri. Kibokahwanabay. Iwinabay yawaygi giwntak. Ka ba yi dunih yikamaxwan givititak Kiyavwiye Uhokri.

Currently Selected:

Sawmus 27: pluPB

Highlight

Copy