Sawmus 26
26
Uya mpithan giwkis nukamyehpitnivwi
1Kiyavwiye Uhokri, akkanaba gitkis nukamyehpitnivwi ku nah yuma nukehnisima, mmanawa nah mpiksaw wew wadit pikak. Nukamaxwan madikte pivitit.
2Pis hiyap madikte ku pariye abet nuhiyekmni. Nikwe uya akka nutuh ba in barewbetnama piwtrik. Ba pis uti taraksaki ayge? Uya akkin nutuh.
3Mmanawa pamnihra in huwithan hawata in pihiyekemni inyewatnene avanenekwa akka nutuh adahan ku samah nah wew.
4 Mmahpaki givewkankis igkis kamiyhan? Nah ka darihwak gikakkis hiyeg kinisekevutnevwi. Nah kawnata misakwa gikakkis hiyeg ku pariye ikawnamahkis kibeynevwi.
5Nah ka atak idiswa abet hiyeg mbayavye givahdukawnikis ku kiney igkis kehnes gahegbetawnikis adahan kehne mbeyne. Nah kawnata wew gikakkis patahwavye.
6Kiyavwiye Uhokri, nah sukokaw giwtrikkis hiyeg ay pivinwa adahan areketni ku nah barewvit ariw taraksaki, kahadbe nah ik adahan wewvari aranwa pidahan kakanhewket payak gikakkis ku pariye batekyevwi pikak,
7pekempi avat adahan kabeyhene piw hawata nah ekkempi pannivwi kane nibewisima!
8Kiyavwiye Uhokri, nah batek akak pivin ku kiney pis misakwa, in iwetrit ku kiney pikiytani misakwa.
9 Nukamyehpitnivwi muwaka pisenwa nukakuh. Kiyavwiye, ka ba isaksa in danuh nutuh. Mpithanuba. Ka ba pisenwepma nukakuh payak gikakkis patahwavye. Wiwhnanuba ariw ini mbeyne ku pariye hiyapkiska gitkis neras umehekevutnevwi,
10gikakkis neras ku pariye kehnevwinenwa mbayka avanenekwa, gikakkis neras ku pariye ahegbetnenekwa amevene karukri adahan dagahkisne waditka.
11Nahme keh ku pariye waditnene; nikwe uya amnih wiwhun ariw ini mbeyne.
12 Kibeyne, nah ay giwaku Kiyavwiye. Nikwe nah kuwis isahptaw ariw madikte mbeyne. Aynte abet uvahdukawni adahan kiyathene Kiyavwiye Uhokri, nah kabayhignek.
Currently Selected:
Sawmus 26: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
