Sawmus 25
25
Pisnewa nuwiwhten ariw mbeyne
1Kiyavwiye Uhokri, nah ivegvap akak piriyepkawka.
2Nuwohkiga, nah kamaxwa pivitit. Ka ba isaksa nuvetunyavu marekevunma ku samah nah biyuk gitivutkis. Ka ba isaksa igkis batek giminkis awaku ku samah nah hahwa.
3Neras ku pariye kamaxwenevwi pivitit igkis ka hiyaptinek maraki hene awaku igkis ka hahwatinek. Heneme neras ku pariye kavetunsap yuma kavatrene, igkisnewa marekepkanek.
4Kiyavwiye Uhokri, uya kannuhun amin pihiyekemni! Keh nah hiyakni kabayntiwa.
5Uya kannuhun huwithan avigku pihiyekemni inyewatnene, mmanawa pisnewa nuwohkiga, pisnewa namnihten. Nah kamaxwene pivitit avanenekwa. Ka pahaytima nah ka kamaxwama pivitit.
6Kiyavwiye Uhokri, kiyenanuba akak pabay akak pamnihra ku pariye avanenekwa ay nukakuh minikwak.
7Ka ba kiye nutaraksan ku pariye nah keh minikwak ku samah nah takweyete avim ini ku aysaw nah ka wewkere pikak. Kiyavwiye Uhokri, kiyenanuba akak pibetki akak pabay.
8Ig Kiyavwiye Uhokri waditye. Ig kibeyne. Inneki keh ig akka gihina gitkis hiyeg taraksavye adahan igkis wew nivigku.
9Ig huwitha hiyeg tuwatavye avigku gihina waditye. Ig kannuhgikis amin gihiyekemni.
10Ig ka kinisakti. Ig ka gamnihrasima. Ig huwitha madikte hiyeg ku pariye ihpenevwi gahegbetawni akak gikumadukan.
11Kiyavwiye Uhokri, kehnaba ku samah pikaksan nutuh. Hiyawa nuvathawni ka aynsima, heneme uya bayahminan ariw madikte.
12Neras ku pariye kane taraksekere gikak Kiyavwiye Uhokri, igwa akkanek ahin gitkis adahan igkisme hiyak ku samahpa igkis wewnek.
13Avanenekwa igkis utinek kabayka. Inme waxri ku pariye ikaksepka gitkis in misakwanek gidahankis gikamkayuvwikis. In ka xuwahka giwkis.
14Ig Kiyavwiye Uhokri Dehetniye darihwak gikakkis neras ku pariye kane taraksekere gikak. Ig akka gitkis madikte gihiyekemni adahan ku samah igkis misakwa pasamrak pawtak gikak.
15 Inneki keh nah ivegnenekwa givitit Kiyavwiye Uhokri, mmanawa ignewa nuwiwhten ariw mbeyne.
16Kiyavwiye, uya iveg numkanit. Amnihnanuba, mmanawa nah pahapo ay abet kiyimwiki!
17Kariswahsanaba nuyakni ariw inin mbeyne kiyimwiki. Wiwhnanuba ariw madikte.
18Hiyapnaba nudahan nuwakemni. Ivegnaba arimkat nuhiyvan mbeyne. Bayahminan ariw madikte nutaraksan.
19Iveg ku samah nah kadahan ka aynsima nuvetunyavu. Iveg ku samah igkis amiyhan akak gidagonikis.
20Kiyavwiye, mpithanuba giwkis! Mpithan ariw mbeyne! Amnihnan! Uya ka isaksa nah marakwa nuvituh, mmanawa pisnewa numapten.
21Uya iki nawaygi adahan nah wew wadit pikak, adahan nah keh kabaykanenwa kahadbe mbayka ka hiya nusamanak. Mmanawa nah kamaxwa pivitit.
22Kiyavwiye Uhokri, amnihnaba pihiyegavu izhaewyenevwi, wiwhnigkis ariw madikte matekbetka!
Currently Selected:
Sawmus 25: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
