Sawmus 24
24
Ukivarawiy ka gikiytanisima
1Inin hawkri akak madikte ku pariye ay niriku in gidahan Kiyavwiye Uhokri Dehetniye. Waxri akak madikte ku pariye aymuhwenevwi ay nivit in gidahanwata.
2Ig Kiyavwiye Uhokri yakise waxri ahakwatak un, ayteke nikwe ig kawetuhe un kahadbe in ka mpiya avitmin waxri akiw.
3Pariye kis adahan wagah avitit Kiyavwiye Uhokri Dehetniye giwaxig? Pariye ik adahan misakwa ayge ariku givin barewvitye?
4Ignewa ner ku pariye giwewni waditnene, hawata gikehni barewbetnene akak gihiyekemni, ku pariye ka kiyatha bataka, gikaksan kawnata kinisakama.
5Ku pahavwi ikewne hene, ig Kiyavwiye Uhokri Dehetniye ikinek kabayka git, ig amnihginek hawata ig hiyavginek barewvit abetnewa ku aysaw ig hiyeknenek gikakkis gihiyegavu.
6Henebaki giwskawnikis hiyeg ku pariye mpiksewnevwi aydha Kiyavwiye Uhokri, ku pariye aharitnevwi misakwa gimun Jakó giwohkiga.
7Wokanay lapot kabayntiwa. Wokanay lapot minikweknene, nikwe igme ukivarawiy ig paraknek atere akak madikte gikiytani.
8Pariyeki ner Ikivarat kane gikiytanisima? Ig Kiyavwiye Uhokri Dehetniye, ku pariye kane gidatnisima. Ig Kiyavwiye Uhokri ku pariye detye adahan kavetunsene givetunyavu.
9Ya, wokanay lapot gidahan, wokanay lapot minikweknene, nikwe igme ukivarawiy ig paraknek atere akak madikte gikiytani.
10Pariyeki ner ikivarat kane gikiytanisima? Ig Kiyavwiye Uhokri, kane-gidatnisima; ig Ikivarat adahan kiyatka.
Currently Selected:
Sawmus 24: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
