Sawmus 29
29
Uhokri gikuvimna ka gannusima
1Yis, ahjviyenevwi, kabayhanabay Kiyavwiye Uhokri Dehetniye. Kabayhanay ini gikiytani akak gidatni.
2Kabayhanay Kiyavwiye Uhokri giw kane nikiytanisima. Paberetusawnay gitivut Kiyavwiye Uhokri Barewvitye ku aysaw ig kahayaknek.
3Kiyavwiye Uhokri gikuvimna in timapka avitmin madikte paraw aman. Ku aysaw ig Kiyavwiye Uhokri kiyatye awna ig digihwa ke digidgiyebe. Gikuvimna timapka ahakwa madikte parahwokwa.
4In Kiyavwiye Uhokri gikuvimna in ka aynsima nidatni hawata ka aynsima nikiytani!
5In Kiyavwiye Uhokri gikuvimna in dunih ahpiyanovwi magawgavyano, in dunih he magawgavyano ayntenano avit waxri Libanomnaw.
6Ig keh waxribdi nopsadminene sagka ayge Libanomnaw. Ig keh in sarayhptaw ke pakyanbe. Inin waxri kewye Ermoh hawata ig keh in sarayhptaw ke pahavwi pak takweyebe.
7In Kiyavwiye Uhokri Dehetniye gikuvimna kabutnisa ugugune.
8In gikuvimna keh amatap kayhap sagka hawata ig keh amatap kewye Kades in sagka.
9In Kiyavwiye Uhokri gikuvimna sassah ahpiyanovwi kewyo karvalhos hawata in mavanpewasa madikte ah. Nikwe ay givinwa, madikte hiyeg hawata awna akak gihawnakis, giwnkis: “Kibeyne gidahan Kiyavwiye Uhokri!”
10Ig Kiyavwiye Uhokri kumaduka avitmin un amihawni. Ig bat amadga gevwi ig kumadukene adahan avanenekwa.
11Ig Kiyavwiye Uhokri Dehetniye iki gihiyegavu gidatnikis. Ig iki kabayka gitkis. Ig iki pasamraki.
Currently Selected:
Sawmus 29: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
