Sawmus 30
30
Pisnewa wagese nukanu adahan batekka
1 Kibeyne, Kiyavwiye Uhokri, nah kabayhap mmanawa pis wiwhpen ariw mbeyne. Pis ka isaksa nuvetunyavu mahivwihun.
2Avim ini, Kiyavwiye nuwohkiga, nah amnihswe pit, pisme makniwevun.
3Pis amnihpen ariw miyaka. Pis amnihpen adahan nah ka muhuksaka arikut imewti.
4 Nukebyuvwi Uhokri gihiyegavu, paknay avat adahan kabeyhene Kiyavwiye Uhokri Dehetniye. Kiyenabay ku pariye Kiyavwiye Uhokri Barewvitye gikehni. Kabayhanigbay adahan madikte.
5Gidagoni ka dahwa ayivwadima, heneme gabay in dahwa adahan avanenekwa. Hiyawa tihaki dahwa hewke tiyegem, heneme hawkanawa avatme pakanek akak kiyesad batekka.
6 Ku kavim nuvewkan ku madikte wewne kabayntiwa nukakuh, nah awna abet nuhiyekemni: “Ka takunima nah hahwa akiw. 7Ig Kiyavwiye Uhokri avuriwhun kabayntiwa. In ke wotbe ig ayamunbe ariku pahayku ayemweket aynte avit waxri imuwadnene. Kibeyne!”
Heneme ayteke ini mbeyne danuh nutuh. In keh nah avisasew, mmanawa in ke wotbe pis ayemwebe nuwhu.
8Nah hiyapni hene nah kanumpep, Kiyavwiye Uhokri. Nah amnihswe pit. Nah awna pit:
9“Ku nah miyapnek, pariyevahki kadahan nah kawihnek? Mmah miyaravye ik adahan igkis kabayhapnek? Mmah ik adahan igkis akkanek ku pis ik adahan hiyeg kamaxwa pivitit?
10Kiyavwiye Uhokri, timapnanuba. Amnihnanuba! Uya parak abet nuhawkan, Kiyavwiye!”
11 Kibeyne, Kiyavwiye! Pisnewa wagese nukanu adahan batekka. Pisnewa wiwhe nuwhu ini kadniki, pis ike nutuh batekka niwenyan.
12Kahadbe nahme paksene piw, hawata adahan nah ka misakwa tinwonema. Kiyavwiye, pisnewa nuwohkiga. Nah kabayhapnek adahan avanenekwa!
Currently Selected:
Sawmus 30: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
