Markus 4
4
Yuwit patuwesbunka amin amutri
Mt 13.1; Lk 8.4
1Ayteke ariwnteke ini ig Kiyavwiye Jesus tivik mahakwakigbit. Ig danuh atere, ig gikannuhtenkis hiyeg akiw. Ka aynsima hiyeg kiyaran ganwa. Ig hiyapni hene ig sarayhwe muhumdakat adahan igkis ka dehekbetig. Ayge ig batahkiswe. Ig gikannuhtenkis hiyeg ayteke gumadgatak umuh. Igkisme hiyeg misekwe tabirbet waxrihbak.
2Ayteke ig kinetihwa ta gitkis akak ka aynsima iwit patuwesbunka. Ig gikannuhtenkis, ig awna gitkis:
3— Ataybiswanabay nutuh. Minikwak pahavwi awayg tivik giwasra amedgete adahan ig pekhene gamutra ayak. 4Ig pekhene gamutra ayak, gaytakis tuguhe avigku ahin ku kiney wayk adani. Ayteke nikwe kuhivra ayta axahpevgukis.
5Gaytakisme gamutra ayak tuguhe abetit tivebdi ku kiney ka kiyesradima wayk. Egnes gamutra ayak hiyenpiwatkama kibehtenwa mmanawa egkis ka mutuhwa mihadima awaku wayk ka kahogbi.
6Kamuw inutpi, awehe gamutra. Aynewa egnes huruhrup mmanawa gahanpabet he inuwew.
7Gaytakisme gamutra ayak tuguhe avuwit pudukuvwi. Egnes pudukuvwi hiyenpi payegbitak akak gamutra. Egkis tuwathe gamutra he egkis miyorap. Nikwe egkis gamutra ka sarayh guwkis aynesnima.
8Gaytakisme gamutra ayak tuguhe abetit kibeyne wayk. Ayge egkis hiyan. Egkis gamutra aymuhwa he egkis kew. Egkis sarayh ka aynsima guwkis. Gaytakis kew mpana madikwa gukebikis (30). Gaytakisme kew puguhkuna madikwa gukebikis (60). Gaytakisme kew madikawku madikwa gukebikis (100).
9Pisenwa inakni gawnan, ig Kiyavwiye Jesus awna akiw. Giwn:
— Yis ku pariye katayebnene, ataybiswanabay numkanit.
Hiyeg ka mpiksaw aharit Uhokri gihiyekemni
Iz 6.9; Mt 13.14; Lk 8.9; Jo 12.39; At 28.26; Ro 11.8
10Ayteke ariwnteke ini ig Kiyavwiye Jesus igwo gikakkis giwatnivwi gikakkis aynesa hiyeg ayge ganwa akiw. Avim ini igkis hiyeg ayavgi:
— Kaminki pis awna inakni iwit patuwesbunka?
11Igme kaytwa giwnkis:
— Hiyeg amadgayavu inin ignes kote hiyakte ku samah Uhokri gikumadukan. Yisme Uhokri akkamnihni ta yitnek. Igkisme ka akkaka ta gitkis. Ta gitkis nah awna patuwesbunkanen iwit.
12Hiyawa igkis iki gitewkis nimkanit kabayntiwa heneme ka paduk ta gitiwrikutkis. Hiyawa igkis ataybiswa nit kabayntiwa heneme igkis ka pukuhin. Ayge nikwe igkis ka wages gihiyekemnikis adahan igkis bayahminaka ariw gitaraksankis.
Jesus akkamnih giwn amin amutri
Mt 13.18; Lk 8.11
13Ayteke ig awna gitkis:
— Mmah yis ka pukuha inakni nuwnuh patuwesbunka ku pariye kane mahikonema? Mmah nikwe avukapka yit madikte nuwnuh ku pariye pi mahikotenene? Ka sam. Nah akkamnihte yit inakni nuwnuh.
14Ner awayg ku pariye pekhene gamutra ignebaki arakak gidahan pahavwi ku pariye ekkene Uhokri giwn ta gitkis hiyeg.
15Gaytakis hiyeg ku pariye timap inakni giwn ignes ke innebe ahinbe. Ku aysaw igkis timap Uhokri giwn aynewa ig Satanas danuh atere gitkis. Ig wiwhpiye inakni giwn abetitak gihiyekemnikis.
16Egnesme nor amutri ayak ku pariye tuguhe ta abetit tivebdi innebaki arakak gidahankis hiyeg ku pariye timap nuwnuh igkis amavin kibehtenwa akak madikte gibetkikis.
17Henneme igkis ka kamax inakni nuwnuh kabayntiwatma abet gihiyekemnikis. In humaw kewa pahakti amutribe ku pariye yumanano guhanpabet eg ka dep miyó. Igkis batek akak nuwnuh adahan aynesa hawkri. Ayteke ku aysaw igkis hiyap mbeyne nivatra, aynewa igkis miniwvi niw. Ku aysaw hiyeg mahivwihpigkis nivatra, igkis diyuhkiswe butte.
18Egnesme nor amutri ayak ku pariye tuguhe ta abetit pudukuvwi, innebaki arakak gidahankis hiyeg ku pariye timap Uhokri giwn igkis amavin.
19Henneme igkis pi ikatuswete adahan arikna amadgaya inin. Igkis kinikiswete arit igiska amadgaya inin. Igkis miyarhawte aharit arakembet arikna mpiy giw Uhokri. Ayge nikwe Uhokri giwn mpithaka abet gihiyekemnikis. Igkis ka kannuhwa keh Uhokri gibetki. Amun ini nikwe igkis hiyeg humaw waditnevyenen ke pahakti amutribe ku pariye kane kew.
20Egnesme nor amutri ayak ku pariye tuguhe ta abetit waxri kibeyne waxri, innebaki arakak gidahankis hiyeg ku pariye timap nuwnuh, igkis amavin. Igkis keh Uhokri gibetki nikwe. Gaytakis hiyeg keh Uhokri gibetki kabayntiwa. Ignes humaw kewa amutribe ku pariye kew mpana madikwa gukebikis (30). Gaytakisme hiyeg humaw kewa amutribe ku pariye kew puguhkuna madikwa gukebikis (60). Gaytakisme hiyeg humaw kewa amutribe ku pariye kew madikawku madikwa gukebikis (100).
Wis ka hakis abukri adahan asabkeptenma
Mt 5.15; Lk 8.16
21Ayteke ig Kiyavwiye Jesus awna gitkis akak nawenyewa iwit patuwesbunka akiw. Giwn:
— Nuwnuh kewa pohow abukribe adahan in uguhne hiyeg gihiyekemnikis. Wis ka hakis abukri adahan wis asabkeptenma anavi suwyeg. Ine wis ka hakisgu adahan wis ayempitnima ta anavit payt abukaveyni. Kawa. Wis ikigu ta inut akekrit.
22Aysawnemenek madikte ku pariye ayempiki in kahayaknek. Inakni nuwnuh patuwesbunka aysawnemenek in kahayak kabayntiwanek.
23Yis ku pariye katayebnene, ataybiswanabay numkanit.
24Ayteke ig awna ta gitkis:
— Ikinay yitew ta nutuh kabayntiwa. Ku yis pi ikte yitew ta nutuh, yis pi darihte nuhiyekemni akiw. Yis darihni mpinevevye akiw.
25Mmanawa ku pahavwi darih nuhiyekemni kabayntiwa, nikwe ig Uhokri akki git pi kiyeste akiw. Heneme ku pahavwi ka darih nuhiyekemni kiyesradima, nikwe ini nuhiyekemni wiwhpikanek abetitak gihiyekemni.
Yuwit patuwesbunka amin ku samah amutri ayak hiyan mownye
26Ayteke ig Kiyavwiye Jesus awna nawenyewa iwit patuwesbunka akiw. Giwn:
— Nah akkite yit pahat abektey amin ku samah Uhokri gikumadukan. Minikwak pahavwi awayg mutuhe gamutra ayak amadga giwasra.
27Ayteke egnes gamutra hiyan, egnes aymuhwa takunipti, ig ka hiyak ku samah. Ku samah ig himeknete egnes aymuhwa. Ku samah ig ivegnete egnes aymuhwa hawata.
28Egnes aymuhwa guwntekneswa abetitak wayk. Pitatye gavankis tarakwa, ayteke egnes kavuwi, pisenwa egnes sarayh guwkis.
29Ayteke ku aysaw guvatyavrikkis danuh, aynewa ig awayg ig iwe gikaswaga, ig hiwhpigkis.
Yuwit patuwesbunka amin “mostad” ayak
Mt 13.31; Lk 13.18
30Ayteke ig Kiyavwiye Jesus awna ta gitkis hiyeg akiw. Giwn:
— Mmah nuwnuh kuri adahan nah akki yit ku samah Uhokri gikumadukan? Pariye iwit patuwesbunka ik adahan nah kawih?
31Uhokri gikumadukan aymuhwa amadga inin ke amutri “mostad”be. Ku aysaw “mostad” ayak mutuhka abetit wayk eg nopsesniyo.
32Eg pi isite ayak ariw madikte amadga inin. Heneme ku aysaw eg hiyan, eg pi wadiswete ariw madikte iveybet. Gutawna humaw nopsad. He ik adahan kuhivra kibhaw ta guvewit abet guvan gumisnavyi.
Jesus awna iwit patuwesbunkanen
Mt 13.34
33Ayteke ig Kiyavwiye Jesus akki Kiyavwiye Uhokri giwn ta gitkis neras hiyeg akak ka aynsima iwit patuwesbunka akiw. Ig akkin gitkis madikte ku pariye igkis ik adahan amavin.
34Ig ka awnati ariknawnema ta gitkis huwewe. Ig he kinetihwa akak iwit patuwesbunkanen. Heneme ku aysaw igwo gikakkis gikannuhnivwi ig akkamnihni madikte gitkis.
Jesus misak mayg akak paraw
Mt 8.23; Lk 8.22
35Abetnewa ini hawkri aygete kuwis, ig Kiyavwiye Jesus awna ta gitkis gikannuhnivwi. Giwn:
— Uyay manuke ta pahabakaytak mahakwa.
Igkisme kaytwa giwn:
— Uyay.
36Igkis ekkewviyes gitkis madikte hiyeg aygnenevwi. Ayteke igkis iwevgi payak gikakkis amadga umuh mmanawa igme kuwis ayge gumadga. Hawata akiw nawenyevwi hiyeg gihmunkis ayge gikak.
37Igkis ku aynte pakwa amadga mahakwa, pahaye adahan mayg kannikew gimkanitkis, ka aynsima paraw katapte amadgat gihmunkis. Gihmunkis me buwisemet.
38Heneme ig Kiyavwiye Jesus aburik umuh, ig himeke ayge abet itiwevwit. Igkis gikannuhnivwi hiyapni hene, igkis atere wadiswig. Igkis awna git:
— Kiyavwiye, uya amnih usuh. Mmah pis ka aminama wowhu? Wixwiy me biyukapmet.
39Igme wadise, ig himehe mayg, ig awna ta arit paraw. Giwn:
— Asa misakwa. Tinwohaw. Aynewa mayg tinwohew. Paraw mavawanew.
40Nikwe ig kaytwa giwnkis:
— Awaykemni avisatruvye! Mmahki yis ba yavisatrun? Mmahki yis ka kamaxwa givitit Uhokri?
41Igkis gikannuhnivwi hiyapni hene, igkis wakaymnibdi gidahan. Igkis kinetihwa pawtak. Igkis awna:
— Pariyeneki ner hiyeg? He mayg akak paraw iha giwn.
Currently Selected:
Markus 4: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
