Markus 5
5
Jesus awahkis wavityempu ta givuritkis pakirempu
Mt 8.28; Lk 8.26
1Ayteke pisenwa igkis hamah pahabakat igkis minehwe atere avit gadarayenevwi giwaxigkis.
2Igme Kiyavwiye Jesus sarayhwe waxrit. Ayge pahavwi awayg wavityewnivye atere patiptakig. Ig pes abetitak imewti.
3Ig awayg misakwa ayge avuheket. Hiyeg ka hiya giwankaminka he akak xen.
4Mmanawa takunipti igkis wanakminave gibagwan akak giwan akak sivari akak xen heneme ig matisbetepni madikte. Yuma pahavwinema hiyeg hiya gisamanak.
5Mataytak, hewke tiyegem ig wewvari muwapuw avuheketiw, muwapuw waxribdiw. Avanenekwa ig kabiman, ig huwivwihtaw akak tip.
6Ku aysaw ig hiye Kiyavwiye Jesus piyawakad, ig sigise atere gimin, ig paberetusaw ta gitivut.
7Ig kabiman git akak gihawna. Giwn:
— Aa, Kiyavwiye Jesus. Pis Kiyavwiye Uhokri gikamkayh inurikyene. Pariye pimawkan ta nutuh ku avim inin? Uya amnihun gidahan Kiyavwiye Uhokri. Ka ba hiyapkis mbeyne nutuh.
8Ig awna inakni iwit hene mmanawa ig Kiyavwiye Jesus kuwis pekkiswiye ner wavitye mbeyevye aygivititak.
9Ayteke nikwe ig Kiyavwiye Jesus ayavgi:
— Mmah piw?
Igme kaytwa giwn:
— Nuwhu “Pibohram”. Mmanawa usuh wavityempu ka aynsima ay givit.
10Ayteke ig amnihswe git Kiyavwiye Jesus akiw. Ig awna git:
— Ka ba arewepma wotuh awahkiswima usuh piyawakad ariwntak inin iwetrit.
11Ayge pahabunene pakirempu axwenekis avit paha waxri imuwadnene.
12Igkis wavityempu hiyapni hene, igkis aya git Kiyavwiye Jesus:
— Uya awahkis usuh tahan givititkis pakirempu. Isaksanaba usuh parak givititkis.
13Igme Kiyavwiye Jesus isaksevgikis. Ayteke nikwe neras wavityempu mbeyevye igkis pesbetwikis givititak ner awayg. Igkis pareke givititkis ignes pakirempu. Neras pibohramnene pakir igkis pina mil (2.000) gikebikis. Igkisme wavityempu parekwigkis, igkisme pakirempu sigisbetwikis ta asebrikute. Igkis tubohbetwikis ta ahakwate mahakwa. Ayge igkis aniksewbet ahakwa mahakwa.
14Pakirempu gikavriwtenkis igkis hiyapni hene, igkis sigisbet kibehtenwa ta paytwempuwit. Igkis danuh atere, igkis kinetihwa nimin muwapuw paytwempuriw muwapuw iwetrit aranwa paytwempu. Neras hiyeg paytwempuyenevwi timapni hene, igkis tivik atere adahan igkis hiyepnes ku pariye danuh.
15Igkis danuh atere git Kiyavwiye Jesus, igkis ute ner awayg ku pariye kuwisnene makniw ariw wavityempu. Igme bat ayge. Ig kasimsavu kuri. Gihiyekemni diyuh adukwenewa akiw.
16Igkis hiyapni hene, igkis avisasew. Neras ku pariye hiyepnevwi madikte ku pariye kehka gikak ner awayg igkis kinetihwa ta gitkis neras hiyeg amin madikte ku pariye danuh ta git ner awayg gikakkis neras pakirempu.
17Igkis timapni hene, igkis awna git Kiyavwiye Jesus:
— Su tivik aytakihan avititak uwaxig.
18Igme katapte amadgat gihmun. Igme ner awayg ku pariye kuwisnene makniw ariw wavityempu, ig awna ta git:
— Nah ataka pihapti.
19Igme Kiyavwiye Jesus awna git:
— Pi kabayte pis misakwa ay. Su ataknate ta pivinwat ta gitkis pikebyuvwi. Kinetihwanaba gitkis amin madikte ku samah Uhokri keh pikak ku samah ig amnihpep.
20Igme awayg timapni hene, ig tivik ta avitit paytwempu Dekapolis. Ig danuh atere ig kavusa kinetihwa ta gitkis madikte hiyeg aygnenevwi amin ku samah Kiyavwiye Jesus keh gikak. Igkisme wakaymnibdi ka aynsima.
Jayru amnihswa git Jesus
Mt 9.18; Lk 8.40
21Igme Kiyavwiye Jesus manuke pahabakat mahakwa akiw amadga umuh. Ig danuh atere, ig ute ka aynsima hiyeg pahadguvu adahan igkis patiptakene ig ayge akigbimna mahakwa.
22Ayteke pahavwi awayg danuh atere git Kiyavwiye Jesus. Giw Jayru. Ig leglis akivara, judeyenevwi gileglisalis. Ig hiyavgi, ig paberetusaw ta gikimpuwit.
23Ig awna git:
— Kiyavwiye, uya amnihun. Nukamkayh mihenavyo pahayempi guyekwin. Ba ayta sarayh piwak ta guvitit kahadbe eg makniw eg ka miyó.
24Ig Kiyavwiye Jesus timapni hene, ig tivik gihapti. Ka aynsima hiyeg tivik gihapti. Ig waywe dahebdi gikakkis.
Pahavu tino makniw ariw guminewkan
Mt 9.20; Lk 8.43
25Ayge nikwe pahavu tino danuh gihavu butte. Eg kuwis hiyap mbeyne akak guminewkan adahan ka aynsima kamukri, madikawkubu akebi akak pikana arawna (12).
26Eg hiyap mbeyne ay giwakukis ka aynsima mekseh kuwis. Eg sarayhe gukakura madikte adahan gikatiwnihpitnikis. Heneme eg kote makniwte. Guwskawni pi mbayte ariw pitatye.
27Eg kinetni Kiyavwiye Jesus gak. Nikwe eg danuh atere giharaptak gibetimpikis neras hiyeg, adahan eg daxno gisimsa.
28Mmanawa eg awna gunaktin:
— Ku nah he daxpi gisimsa, ikeyvi, nah makniw.
29 Eg danuh atere, eg daxwin. Aynewa guminewkan matiswe. Eg kayah ku eg kuwis makniw ariw gukahri.
30Igme Kiyavwiye Jesus kayah ku gidatni pes aynesa ku samah ig makniwevgu. Ig hiyapni hene, ig wagestaw ayge gibetkis hiyeg. Ig awna:
— Pariye dax nukawihni?
31Igkisme gikannuhnivwi awna git:
— Kiyavwiye, Ka ba pis hiyap ka aynsima hiyeg daykekbeti pikak? Mmahki pis awna: “Pariye daxwen?”
32Igme ivegvari guvegepten gidaxten gikawihni.
33Eg tino hiyapni hene ku eg makniw kuwis, eg danukwa atere git. Eg avisasew. Eg segke. Eg paberetusaw ta gitivut. Eg akki git makisute.
34Igme awna gut:
— Nukebyi, pis makniw mmanawa pis kamaxwa ta nuvitit. Hiyawa pis diyuhe pivinwate akak kabayka. Pis makniw ariw pikahri.
Jesus kannikasa Jayru gikamkayh
Mt 9.23; Lk 8.51
35Ku samah ig Kiyavwiye Jesus awnempiye inakni iwit hene, aynesa hiyeg danuh atere. Igkis ayta givinwatak ner leglis akivara. Igkis atere ewkne inetit git. Igkis awna git:
— Pikamkayh ayipa miyop. Ka muwaka wewkis ukannuhtenwiy waditnevyenen.
36Igme Kiyavwiye Jesus ka aminama ariw inakni giwnkis. Ig awna ta git leglis akivara. Giwn:
— Ka muwaka avis. Kamaxwanaba ta nuvitit.
37Ig ka isaksa pahavwinema hiyeg atak gihapti. Ignesnenwa Pedru gikak amekene Tiyagumni gikak Joawh ku pariye Tiyagumni gisamwi igkiswonas tivik gihapti.
38Ayteke ig Kiyavwiye Jesus danuh atere givinekut ner awayg leglis akivara. Ayge ig hiyap ka aynsima hiyeg kadukman. Igkis tihenekuyes, igkis kadniyes guharit nor bakimni ka aynsima.
39Ig hiyapni hene, ig parak atere, ig awna gitkis neras hiyeg:
— Mmahki yis kadukman? Mmahki yis tih? Nor bakimni ka miyó. Himak eg.
40Igkisme hiyaraptihpig. Igme pekkiswigkis madikte. Ayteke ig iwe nor bakimni gig gukak gunag payak gikakkis neras gihaptiyevwi igkis parak ta arikut xam ku kiney eg haritminano.
41Ayge ig sumuh nor bakimni guwaku. Ig awna gut:
— Talita, kumi.
Inakni wownavrikwiy “Mim, kannikaw”.
42Aynewa eg kannikew eg wew. Mmanawa gaw madikawkubu kamukri akak pikana arawna (12). Igkis madikte wakaymnibdi ka aynsima.
43Igme Kiyavwiye Jesus awna gitkis:
— Ka yi muwaka akkin ta gitkis hiyeg. Ikinay gut aynesa gumana.
Currently Selected:
Markus 5: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
