Markus 3
3
Jesus makniwa pahavwi awayg kidubetwiye giwak
Mt 12.9; Lk 6.6
1Ayteke ig Kiyavwiye Jesus tivik lammesya ariku judeyenevwi gileglisakis. Ayge pahavwi awayg kidubetwiye giwak.
2Igkisme neras hiyeg ayge avuriw Kiyavwiye Jesus kabayntiwa adahan igkis hiyap ba ig piyihgi abet samdi. Mmanawa igkis muwaka uti gitaraksan akak amekene Moís gikumadukan adahan igkis gikamyehpitni.
3Igme Kiyavwiye Jesus awna ta git ner awayg kidubetwiye giwak. Giwn:
— Ba ayta atan.
4Ayteke nikwe ig awna ta gitkis hiyeg. Giwn:
— Pariye amekene Moís gikumadukan aya wotwiy adahan ku pariye wixwiy keh abet samdi? Ba adahan wixwiy kehne kabayka, ba kawk, ba adahan wixwiy kehne mbayka? Ba adahan wixwiy amnihne hiyeg, ba kawk, ba adahan wixwiy umahkisne hiyeg? Igkisme timapni hene, igkis tinwovu.
5Igme ivegvusa madikte hiyeg ayge. Ig ka batek ku samah gihiyekemnikis. Ig wakaymni ku samah igkis ka amnihkere ner awayg. Ayteke nikwe ig awna ta git ner awayg kidubetwiye giwak. Giwn:
— Taraknaba piwak.
Igme tareke giwak. Aynewa giwak makniw.
6Igkisme neras farizewkis hiyapni hene, ku Kiyavwiye Jesus piyihpig abet samdi, igkis awna:
— Aa. Ig ka kiyatha samdi. Ik adahan ig taraksase ka aynsima hiyeg. Pugamawka ig umehpika.
Nikwe igkis pese ayteke, igkis ahegbete ginetnikis gikakkis Erodis gihiyegavu adahan igkis giwmasepten Kiyavwiye Jesus.
Jesus makniwa ka aynsima hiyeg akiw
Mt 4.23; Lk 6.17
7Igme Kiyavwiye Jesus hiyapni hene, ig tivik akigbite mahakwa. Gikannuhnivwi tivik gihapti. Hawata akiw pahabunene hiyeg aytontak Galileyamnawtak igkis kuruwkehe gihavu butte payak gikakkis hiyeg aytontak Judeyamnawtak, 8aytontak Jerusalémtak, aytontak Idumeyamnawtak, aytontak warik Jordawh, aytontak paytwemputak Tiru akak Sidoh. Igkis ka aynsima hiyeg. Igkis kuwis time gak ku samah ig keh ka aynsima annut. Nikwe igkis tivik iwasavgi.
9Igme Kiyavwiye Jesus awna ta gitkis gikannuhnivwi. Giwn:
— Ka aynsima hiyeg ay. Ik adahan igkis dehekwen. Ahekbetnay nudahan umuh.
10Mmanawa ig makniwenene ka aynsima hiyeg. Ayge nikwe madikte hiyeg ku pariye kakahravye igkis mpiksewnekuyes adahan gidaxten.
11Nerasme ku pariye wavityewnavye, ku aysaw igkis hiyavgi igkis tuguhkiswa mabuw gitivut. Igkis kabiman git:
— Pisnewa Kiyavwiye Uhokri gikamkayh.
12Igme timapni hene, ig awna ta gitkis:
— Ka ba yi akkan ku pariyene nah.
Jesus awahkis giwatnivwi muwapuw
Mt 10.1; Lk 9.1
13Ayteke ariwnteke ini ig Kiyavwiye Jesus wagehe ta avitit paha waxri imuwadnene. Ayge ig pahadguhe neras ku pariye ig muwaka.
14Igkisme danuh atere git. Ayge nikwe ig kaniybete gaytakis madikawku gikebikis gikakkis piyananene gawnakis (12) adahan igkis wewnes gikak. Hawata adahan igkis awahkiska adahan igkis ekkenes ginetni muwapuw.
15Avim ini ig ike kumadukaki gitkis adahan igkisme pekkiswiyes wavitye givititakis hiyeg.
16Nah akkite yit giwkis neras madikawkunene gikebikis gikakkis piyananene gawnakis (12):
Simawh ku pariye ig kuwis sarayh giw Pedru,
17Tiyagu, gisamwi Joawh. Igkis amekene Zebedew gikamkayuvwi. (Igme Kiyavwiye Jesus sarayh giwkis “Boanerjes”. Inakni wownavrik “Diridriyan”),
18Andre, Filip, Bartolomew, Matews, Tome, Tiyagu ku pariye amekene Alfew gikamkayh, Tadew, Simawh Zeloti,
19Judas Iskariyotismin ner kamaykistinene Kiyavwiye Jesus.
Hiyeg ikiy ku Jesus biyukse gihiyekemni
20Ayteke ig Kiyavwiye Jesus tivik givinwate. Ayge nikwe neras hiyeg pahadguhwa atere git akiw. Avim ini ig Kiyavwiye Jesus gikakkis gikannuhnivwi igkis ka kahawkan adahan igkis ax awaku ba gikebentenkis hiyeg.
21Ku aysaw gikebyuvwi time gak hene, igkis tivik iwevgi mmanawa hiyeg kinetihwene gimin ku ig kuwis biyukse gihiyekemni.
Jesus ka piyihak akakma wavitye gannu
Mt 12.22; Lk 11.14
22Avim ini neras kannuhekevutnevwi amin amekene Moís gikumadukan igkis ayta avititak Jerusalém, igkis danuh atere ku kiney Kiyavwiye Jesus piyihne hiyeg. Igkis awna ta gitkis hiyeg:
— Ig pekkis wavitye givititakis hiyeg akak wavitye gikivarakis gannu ay givit. Igwa Belzebu ay givit.
23Ig Kiyavwiye Jesus hiyapni hene, ig pahadguhe neras hiyeg ta gimkanit. Ig kinetihwa ta gitkis akak iwit patuwesbunka. Ig awna:
— Ig Satanas ka hiya igma pekkis gidahanwa gihiyegavu wavitye givititakis hiyeg.
24Ku hiyeg avitya pahanene waxri ku igkisweke kerbetpikis, igkis ka ayivwi akiw.
25Pakebyekne hawata, ku igkisweke kerbetpikis, igkis kawnata ayivwi akiw.
26 Wavitye hawata. Wake ig Satanas suguh gidahanwa gihiyegavu wavityebe, ig ka ayivwikam. Ig pisenwakam akak gikumadukan.
27 Nah kehte abektey akak pahavwi ku pariye parekere ta givinekut pahavwi hiyeg detye adahan ig kidisne gewkanbet atere. Avit ig parak atere amawka ku ig wanakminanete ner hiyeg detye. Pisenwa nikwe ik adahan ig parak atere kidis ku pariye ay gimun. Henewa nah keh gikak wavitye gikivarakis.
Ku yis ka kiyatha Uhokri Gitip, yis ka bayahminaka
Mt 12.31; Lk 12.10; 1Jo 5.16
28— Ik adahan Uhokri bayahmina hiyeg ariw madikte gitaraksankis ariw madikte miyathaki.
29Henneme ku ignes ka kiyatha Uhokri Gitip, nikwe ka hiya igma bayahminigkis ariw ini gitaraksankis. Mmanawa ku pahavwi ka kiyatha Uhokri Gitip, nikwe ka ik adahan ig Gitip dax avit giyakni adahan ig wages gihiyekemni. Nikwe ig ner misakwa akak ini gitaraksan adahan avanenekwa. Ihanabay inakni nuwnuh. Henewatbaki in.
30 Ig Kiyavwiye Jesus awna inakni mmanawa igkis kinetihwa gimin ku wavitye ay givit.
Jesus kakebyuhwa ta gitkis hiyeg ihpenenvwi giwn
Mt 12.46; Lk 8.19; Eb 2.11
31Ayteke ig Kiyavwiye Jesus ginag gikakkis gisamwivwi egkis danuh atere. Egkis misekwe kabaywak. Aytontak kabaywaktak egkis wasavanaw gimin Kiyavwiye Jesus adahan ig ayta gumkatkis.
32Ayge ka aynsima hiyeg batebdebdihpikis ganwa. Igkis hiyapni hene, igkis awna git:
— Kiyavwiye, pinag ay kabaywak gikakkis pisamwivwi. Egkis watihap.
33Igme Kiyavwiye Jesus kaytwa giwnkis:
— Pariyeki nnaguh? Pariyeki nusamwivwi? Nah akkite yit.
34Ayteke ig ivegvusa neras hiyeg batebdebdihpiye ayge ganwa. Pisenwa ig awna:
— Ivegnay ayta. Norasnewa ku pariye nnaguh. Nerasnewa ku pariye nukebyuvwi.
35Mmanawa ku pariye hiyeg kehnevwi Uhokri gibetki, ignes nah ikiygikis ke nukebyuvwibe, egnesme tinogben nah ikiygukis ke nnaghube.
Currently Selected:
Markus 3: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
