Markus 2
2
Jesus makniwa pahavwi awayg miyavuvye
Mt 9.1; Lk 5.16
1Ayteke ariwnteke aynesa hawkri akiw, ig Kiyavwiye Jesus diyuhe ta avitit paytwempu Kafarnawh. Ayge nikwe hiyeg kinetni gak ku ig ay givineku.
2Ayteke nikwe ka aynsima hiyeg pahadguhwa atere. Igkis ba gikebentenkis yuma iwetrit gidahankis ine ariku payt ine anumeku alapota. Igme Kiyavwiye Jesus ayge ekkene Kiyavwiye Uhokri giwn ta gitkis.
3Avim ini paxnika gikebikis hiyeg danuh atere, igkis ayta waxwenes pahavwi awayg miyavuvye ta gimkat Kiyavwiye Jesus.
4Igkis ka hiya igkisma danuh ta givetunat Kiyavwiye Jesus awaku ba akebentenwa hiyeg ayge. Igkis hiyapni hene, igkis hiyak ku pariye igkis keh. Igkis wagehe ta inut ta amadgat payt ahigwi. Ayge igkis wiwhe avettak payt. Igkis keh pahayku miyokwiye givitmin Kiyavwiye Jesus. Pisenwa igkis wiwhkise ner miyavuvye ariku miyokwiye peyeke akak gisivamna.
5Ig Kiyavwiye Jesus hiyapni hene ku samah gikamaxwankis givitit, ig awna ta git awayg miyavuvye. Giwn:
— Nukebyi, nah bayahminap ariw pitaraksan gikak Uhokri.
6 Avimnewa ini ka aynsima kannuhekevutnevwi amin amekene Moís gikumadukan igkis batebdebdihpi ayge. Gaytakis timapni inakni Kiyavwiye Jesus giwn, igkis awna gimin abet gihiyekemnikis. Giwnkis:
7— Mmahki ner awayg awna inakni hene? Yuma pahavwinema hiyeg hiya ubayamnihkawiy ariw utaraksanwiy. He ignenwa Kiyavwiye Uhokri hiya ubayamnihkawiy. Ig miyathene Kiyavwiye Uhokri ku samah ig awna inakni hene.
8Igme Kiyavwiye Jesus kateksan abet gihiyekemni ku igkis pukuhpaw gibohri. Ig hiyapni hene, ig awna ta gitkis:
— Mmahkay yis pukuhpaw nubohri hene?
9Mmah yivewkan ku in mahiko nudahan nah bayahmina ig awayg miyavuvye ariw gitaraksan? Ku yis hiyap nah hiya gikankasak nah keh ig kidis gisivamna ig wew akiw, ininkata akiw nah ka dat adahan nah bayahminig ariw gitaraksan?
10Nah hiyapkiste yit ku Nah, ku pariye wageswe awayg amadgaya inin, nahnewa detye amadga inin adahan nah bayahminene hiyeg ariw gitaraksankis gikak Uhokri.
Ayteke ig awna ta git ner awayg miyavuvye. Giwn:
11— Kannikaw. Kidis pisivamna. Hiyawa pis diyuhe pivinwate.
12Aynewa ig awayg kannikew, ig iwe gisivamna. Ig tivik wew giwtrikneswa hiyeg. Igkisme hiyapni hene, igkis wakaymnibdi. Igkis kabayha Kiyavwiye Uhokri. Igkis awna:
— Usuh ka hiyapti akebi inin. Kabahte usuh ka ihpin.
Jesus humak Matews
Mt 9.9; Lk 5.27
13Ayteke ig Kiyavwiye Jesus pese paytrikutak. Ig tivik ta mahakwa akigbite. Ka aynsima hiyeg pahadguhwa atere ganwat. Ig hiyapni hene, ig gikannuhtenkis ayge.
14Ayteke ariwnteke ini ig tivik waywe avigku ahin. Ayge ig hiyap Levi, ku pariye Alfew gikamkayh. Igme betnene ariku payt ahiwket karukri. Ig ladwan, ig ahiwne karukri gidahan guvelma. Igme awna git:
— Ba ayta wew nukakuh adahan pis humewne nukannuhni.
Igme timapni hene, ig kannikew, ig tivik gikak.
Jesus ayta humekwiye hiyeg taraksavye ta git
Mt 9.10; Lk 5.29
15Ayteke ig Kiyavwiye Jesus danuh ta givinekut Levi. Ayge ig axne gikak. Ka aynsima ladwan danuh atere payak gikakkis hiyeg akiw ku pariye ikaka kane kibeynevwima hiyeg. Igkis hawata ax gikak Kiyavwiye Jesus gikakkis gikannuhnivwi. Igkis ka aynsima hiyeg. Igkis gibetkikis wew gikak.
16Neras kannuhekevutnevwi amin amekene Moís gikumadukan ku pariye farizewkis igkis hiyapni hene ku ig axne gikakkis ladwan gikakkis hiyeg ku pariye ikaka kane kibeynevwima hiyeg, igkis hiyapni hene, igkis awna ta gitkis gikannuhnivwi. Giwnkis:
— Mmahki ig axne darihwekne gikakkis ladwan gikakkis hiyeg kane kibeynevwima hiyeg? Wake ig kibeyne hiyegbe, ig ka axkam gikakkis gikebikis neras hiyeg.
17Ig Kiyavwiye Jesus timapni hene, ig kaytwa giwnkis. Ig awna ta gitkis:
— Hiyeg kane kibeynevwima ignes kewa hiyeg kakahribdavyebe. Igkis muwaka pahavwi ayta amnihgikis. Ignesme hiyeg makniwyevwi igkis ka muwaka mekseh. Ignesme hiyeg kakahribdavye igkis muwaka mekseh. Nah ka ayta adahan nah humeknema ku pariye hiyeg kibeynevwi kuwis adahan ignes wageswiyes gihiyekemnikis. Heneme nah ayta adahanikwa nah humekwiye neras ku pariye taraksavye adahan ignes wageswiyes gihiyekemnikis.
Amawka wixwiy maxhaw inyewa avititak uyakniwiy
Mt 9.14; Lk 5.33
18Avim ini Joawh Batista gikannuhnivwi igkis maxhewnes adahan igkis kiyenes Kiyavwiye Uhokri adahan igkis piriyepkewnes. Neras farizewkis hawata igkis maxhewnes. Ayteke nikwe hiyeg danuh ta git Kiyavwiye Jesus. Igkis awna git:
— Joawh Batista gikannuhnivwi igkis maxhaw adahan igkis kiyenes Kiyavwiye Uhokri. Kiberevut igkis maxhaw adahan igkis piriyepkewnes. Igkisme farizewkis gikannuhnivwi igkis hawata akiw igkis maxhaw. Pisme pikannuhnivwi ka maxhaw. Mmahki igkis ka kiyatha Kiyavwiye Uhokri kema nerasma? Mmah igkis ka kibeynewatma hiyeg kema nerasma?
19Igme Kiyavwiye Jesus kaytwa giwnkis:
— Igkis ka maxhaw adahan nukiyetni mmanawa nah kuviknene ay gikakkis. Nah kehte abektey akak pahavwi awayg maripkewviye. Ku aysaw ig maripkewviye nikwe gikagmadavu ayta iwasa gimaripkawni. Ku samah ig ayge gikakkis abet ini fet ba igkis maxhaw? Kawa. Avim ini ku samah igkis kadahan ner awayg maripkewviye ayge gikakkis igkis ka maxhaw. 20Henneme aysawnemenek ku aysaw nah iwepka giwkisnek nukannuhnivwi, avim ini nikwe igkis maxhawnek.
Jesus gihiyekemni ka kis gikakkisma hiyeg kuwisnene dehe gihiyakemnkis
Mt 9.16; Lk 5.36
21Ayteke ig Kiyavwiye Jesus keh nawenyewa abektey akiw. Ig awna:
— Ka kis adahan wis kahava simis mugumguviye akak nukune kamis mmanawa in kamis nukune ku pariye kote sukuhkante in ka dep tariswa mmanawa in kote dahwate kema mugumguviyema. Ku pahavwi kahava gisimsa mugumguviye akak nukune kamis, inkit mugumguviye sigka kiyeste akiw.
22Kawnata kis adahan wis katiyha win nukune arikut pakir amar ayivwivye ivatmakuvye. Mmanawa ku aysaw ini win tukugwa, in pakir amar ka ahwa payak nikak. In bekwe awaku. Ayge nikwe ini win biyuke payak akak atiy. Amawka wis katiyha win nukune ta arikut pakir amar ku pariye mitibetnene. Henneki nuhiyekemni kis gikakkis hiyeg ku pariye kote dahate gihiyekemnikis.
Jesus samdi akivara
Mt 12.1; Lk 6.1
23Ayteke samdi abet ig Kiyavwiye Jesus tivik mpiye amadgew pahak was. Igkis gikannuhnivwi tivik gihapti. Igkis waywe ayge, igkis matise fahhin ariw, igkis axwig.
24Nerasme farizewkis hiyapni hene, igkis awna ta git Kiyavwiye Jesus:
— Iveg neras pikannuhnivwi. Mmahki igkis ka iha amekene Moís gikumadukan? Mmahki igkis kannivwiye abet samdi?
25Igme Kiyavwiye Jesus kaytwa giwnkis:
— Mmah yis kote ivegbohate Uhokri gannasan ku kiney in kinetihwa amin ku pariye amekene Davi gikehni? Minikwak ig mativwe payak gikakkis gihaptiyevwi. Igkis yuma ariknawnema gimunkis.
26Nikwe ig pareke ta arikut Uhokri Givin avim ini ku aysaw amekene Abiyatar ig muwvegviyene gikivarakis. Ayge ig axe ini bugut ku pariye ekkepka ta givetunat Uhokri. Hawata ig ikepni ta gitkis gihaptiyevwi. Amekene Moís gikumadu kan awna ku muwvegnenwa kis adahan ignes ax ini bugut. Igkisme axwin heneme igkis ka taraksa mmanawa ig muwveg amnihpigkis.
27Ayteke ig Kiyavwiye Jesus awna ta gitkis akiw. Giwn:
— Samdi humaw gidahankis hiyeg. Hiyeg ka humaw adahanma samdi.
28Nah, ku pariye wageswe awayg amadgaya inin, nahnewa samdi akivara.
Currently Selected:
Markus 2: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
