Mark 9
9
NAKATA 9
1Jesusim ukautiyaillu, “Ilumun ukautigipfi, hapkua inuit nangekataulektun ilait tukuyunaitun tautuktinatik Godim atanguvianik tikilektillugu.
Jesus allangukpiaktuk
(Mt. 17:1-13; Lk. 9:28-36)
2Uvlullu 6it nungumata, Jesusim Peter, Jameslu Johnlu inminun malikuyain maiyugakatigiyumavlugit manilgulmun kingiktumun kihimgiukhutik. Tatpaanilu takuangni allanguktitauyuk. 3Annugaillu kengnagnakpiakhutik kakutanguktun aputitun kakuktaukiyauvlutik uaktauhimayunin. 4Tapkunungalu Elijah Moseslu hagyaektuk Jesus ukagvigivlugu. 5Peterm Jesus ukallautiyaa, “Atanek, hamaniinapta nagutpiaktuk, tupigliukta pingahunik, ilingnun atauhengmik, Mosesmunlu atauhengmik, Elijahmunlu atauhengmik.” 6Ukakhaminik ilihimangnginami ekhiukpallaaktillugu. 7Nuvuyamlu ulingmagit, nipi nuvayagmin tuhaanaktuk ukakhuni, “Una engniga nagugiyaga, tuhaakhiuk.” 8Tayyainaglu kiviangmata inuhingitpiaktuk, Jesus avaliengman.
9Aahin manilgulmin atkautilugit Jesusim pitkuyain tapkua takuyamingnik uniuyyikunagit inum engniga makikaaktinagu tukungayunin. 10Taima tapfuminga ihumalektun tukungayun makiyyutaatigun unipkakhimaitumik. 11Apegiyallu Jesus, “Hug tiitigaktit ilihauyyivat Elijam tikittakhaanik hivulliuvluni?” 12Ukallautiyain, “Elijah ilaa tikikaaktukhaugaluaktuk tamaita ihuakuvlugit; huli tiitigakhimayuk inum engnigagunun naglikhaktitauhunguman mitautigiyauvluni, hug? 13Ukautigipfili, Elijah tikihimayugaluak inuilli ihumamingnik pivagaat tiitigakhimangman tapfumuna.”
Inuhuktuk agiuktulik naguhipkaktauyuk
(Mt. 17:14-21; Lk. 9:37-43)
14Aahin tapkua tikinamitigit maligutit allat inuit amigaitun tapkunani tautuktain, tiitigaktillu kangutivlutik. 15Tayyainaglu inuit takugamitku Jesus agligutakhutik akpahiyun tapfumunga hallutugu. 16Apegiyain, “Humik ukakatigikpihi tapkununga?” 17Inuit ilangata kiuyaa. “Ilihauyyi, engniga kagitiyagaluaga ilingnun agiuktukangman ukayuitumik. 18Agiuktum pigagamiuk nunamun ulgutiyaa, inuhuktuk kiiyakpiaktuk kapekivluni kigatakhimavlunilu. Aahin maligutitin apegivaktatka agiuktuekuvlugu pilimaitugaluit.” 19Talva Jesusim tapkua ukallautiyain, “Inuit hunauvat ukpektaitpiaktun, kanuk hivitutigiyumik naiyugniagipfi? Kanuk hivitutigiyumik huginiakkihi? Kagitihiuk uvamnun.” 20Tapkua inuhuktuk kagitiyaat tapfumunga. Agiuktum takugamiuk Jesus tayyainak inuhuktuk kiipkaktaa. Tamnalu nunamun ulgugami nunamun akhalekhuni kapekivluni kaniminin. 21Jesusimlu inuhuktum anguta apegiyaa, “Kanga taimalingnakpakpa?” Kiuyuk, “Nutagauneminin. 22Ilaani agiuktum ingnegmun imangmunlunin ulgutivaktaa tukunahuakhugu. Hapengngitkuvinlu nagligitigut ikayugluta.” 23Jesus ukallaktuk tapfumunga, “Hapengngitkuma! Hullika hapengnaipiaktun ukpegluaktumun.” 24Tayyainak inuhuktum anguta ukallaktuk nipikutuyumik “Ukpektunga ukpeguektailunga.” 25Talva inuit kuglukpallialengmata Jesusim takugamigit agiuktuk ukagvigiyaa ukakhuni, “Agiuktuk ukayuituk tuhaayuituglu, pitkuyagin, anigiagin tayya itekiktailutinlu talvangaanin tapfumunga.” 26Talva agiuktum kiipkakaaktillugu inuhuktuk igialaakhunilu aniyuk, inuhuktuklu tukungayutun-ililengman ilait ukaktun, “Tukuyunektuk” 27Jesusimli algaa tigugamiuk makiktitaa nangektuglu.
28Iglumunlu Jesus itengman, maligutaita apegiyaat kihimgiukhutik, “Hug uvagut anipkaglimaitpitigu tamna?” 29Kiuyain, “Agiuktun taimatun anipkaktauniaktun kengaunektigun kihiagun.”
Jesus hivuniugiagmiyuk tukuyyutimigun
(Mt. 17:22-23; Lk. 9:43-45)
30Talvangalu aullangmiyun Galileekukhutik. Jesuslu takuyumangituk inungnik takanani 31ilihauyyiyumavluni maligutiminun kihianun. Ukautiyaillu, “Inum engniga inungnun tuniyauniangman tapkua tukuniaktaat, tukutaugumilu uvluk pingahuangni makiniaktuk.” 32Tapkuali ukauhiit kangekhimangngitait kamahukpallaagamiglu apegiyumangngitaat.
Inuit anangayangitukhaumata
(Mt. 18:1-5; Lk. 9:49-50)
33Capernaumun tikihimangmata, iglumiitillugu Jesusim apegiyain, “Kaigapta huna ukautigivakkihiuk?” 34Nipiliyuitun tapkua aullaktillugit nallitik ataniukiyaumangan ingmingnik apekhuivagamik. 35Ingigamilu 12n kaitkuyain inminun ukautivlugit, “Ilipfingnin kinalika hivulliugumagumi kinguliuyukhauyugaluak kivgaktuinakluni tamainun.” 36Talva nutagak pigamiuk akungnamingnun iliyaa, talva tigugamiuk ukallautiyait, 37“Kialika nutagak umatun ilagikumiuk atimni, ilagiyanga uvanga. Aahin kialika ilagiguminga atauhektun ilagingnaktaa tamna tiliyiga.”
Ihuigikunagit allat uvaptitun-itngitkaluakhutik
(Lk. 9:46-48)
38John Jesumun ukallaktuk, “Ilihauyyi tautukpagapta angunmik anipkaitillugu agiuktunik atingnun pitailiyakkut malingngimatigut.” 39Jesus ukaktugaluak, “Pitailiyukhaungitkaluaktuhi tapfuminga, inuk hapengnaktumik pigumi atipkun talvangaanin atiga ukautigiyunaimagu ihuitumik. 40Inuk akikektungitkumi uvaptingnun ikayuktaatigut. 41Ilumun ukautigipfi, kialika imektigumihi iminnangmik atikautigigapfiuk Christ tamna akiliuhiakhunguyuk ilaa.
Inuit huinekipkaktakhagingitain allat
(Mt. 18:6-9; Lk. 17:1-2)
42“Inum huinekipkakumiuk nutakat ilangatlunin ukpekluakkan uvamnun, uyagakpak kungahingagun nivingaktukhak imangmun imitkuvlugu. 43Algavillunin huinekipkakpatin kipilugu nagutkiak ilingnun kilangmun iteguvin algaekhimaktillutin igitaukunatin ikualakttivingmun ingnegvilingmun malgunik algakakhimakaluaktillutin.
44Talvani kupilgut negingnaktun tapkuninga, ingnillu kamilaitpiaktuk. 45Itigavillu huinekipkakpatin kipilugu nagutkiak kilangmun iteguvin tuhiakaluaktillutin igitaukunatin ikualakttivingmun malgunik itigakaktillutin.
46Talvani kupilgut negingnaktun tapkuninga, ingnillu kamilaitpiaktuk. 47Iyivillunin huinekipkakpatin ungavagiaguk nagutkiak Godim atanguvianun tikitkuvin iyikaktillutin aipanik igitaukunatin ikualakttivingmun kamilaitumun. 48Talvani kupilgut negingnaktun tapkuninga, ingnillu kamilaitpiaktuk.
Ilihauyyutikhak tagiukun
(Mt. 5:15; Lk. 14:34-35)
49“Tamangmiglu tagiuktauniaktun ingnegmun. 50Tagiuk naguyuk, tagiugli hakuekumik kanuk atuktauniakkat? Ilipfingni tagiukakpagluhi naamakpayyavuhilu.”
Currently Selected:
Mark 9: Sperry
Highlight
Share
Copy
Want to have your highlights saved across all your devices? Sign up or sign in
©1972 Canadian Bible Society
