Mark 10

NAKATA 10

Avitumik ilihauyyiyuk

(Mt. 19:1-12; Lk. 16-18)

1Jesus talvanga aullaktuk Judeam nunaanun, Jordam avataanun; aahintauk inuit amihut tikittaat. Taima pitkuhiminik malikhuni ilihautiyain. 2Talva Pharisekut uktugumavlugu upaktaat apekhivlutik, “Naamakpa angutim nuliyani avipkakpagu?” 3Kiuyain, “Kanuk Mosesim pitkuyaahi?” 4Ukaktun, “Moses avitumayunun pitkuiyuk tiitigakuvlugit avityyutikhanik avitkuvlugit.” 5Jesusim ukallautiyain, “Mosesim taima pitkuyaahi umatihi naptuvallaamata. 6Ingilganli God hanagami tamainik 'Tamna havavaktuk angunmik angnagmiglu.' 7'Taima angutim anguni, angnanilu kimangniaktaik nuliayani naiyukuvlugu, 8tapkuaklu malgukaluakhutik atauhektun-inniaktuk'. Talvangaanin malgungitpiaktuk atauhiugamik. 9Tapkuaglu Godim nuliagik katinmagik, inum allam avipkaktailivaglugik.”

10Iglumilu maligutaita apegiyaat tapfuminga. 11Ukautiyain, “Kialika nuliyani avipkakumiuk nulianikhuni allamik allatuktuk. 12Angnamlunin uini avipkakumiuk uinigumavluni allamik tamnatauk allatuktuk.

Jesusim nutakat naguguktitain

(Mt. 19:13-15; Lk. 18:15-17)

13Nutakalgillu nutakatik kagitiyain Jesusmun aktuinakuvlugit, maligutaitali taimaliuktailiyagaluangit. 14Jesusimlu takugamigit kuviahungngituk ukautivlugit, “Nutakat uvamnun kailit aahivaktailugit tapkua Godim atanguvia naminigimayyuk. 15Ilumun ukautigipfi, kinalika Godim atanguvianik pigngitkumi nutagaktun tapfumunga itegunaituk.” 16Nutakallu tigugamigit taliminun naguguktitain.

Inuk manigiektuk inuhengmik nungulaitumik piyumayuk

(Mt. 19:16-22; Lk. 18:18-23)

17Jesus aullagahualektillugu inuk akpahiyuk tapfumunga hitkuvigigamiuk apekhiyuk, “Ilihauyyi naguyutin, humik piniaktukhauvik inuhengmik nungulaitumik kinguvakhakakuvlunga?” 18Jesusim ukallautiyaa, “Hug naguyumik taivinga? God kihimi naguyuk. 19Pitkuyainik ilihimagaluaktutin, 'Inuaktailutin, allatuktailutin, kukittailutinlu, ikutailutinlu nuakatikun, hullika naminigitailugu ihuitukun, angutin angnallu nagugilugik.' ” 20Kiuyaa, “Ilihauyyi, hapkua pitkuhiit tamaita malikpaktagaluatka inuhuktutimnin.” 21Jesusim iigigamiuk nagugiyaa ukallautivlugu, “Atauhengmigli pingitkaluaktutin. Aigiagin tamaiyatin niuvgutigikit ilingayun aitukuvlugit taima pikutinik akituyunik pikakhunguyutin kilangmi. Aahin kaigiagin maliglunga.” 22Taima Jesus ukangman akulia allanguktuk aiyuglu kuviahungngitkivluni pikutain amigaitpiangmata.

Manigiektun ilaani aiyukakpaktun

(Mt. 9:23-30; Lk. 18:24-30)

23Jesuslu kiviakhuni maligutiminun ukaktuk, “Mangiektum tikiyyuta Godim atanguvianun aiyungnakpiaktuk.” 24Maligutaitali agligutautigiyaat. Jesusli ukangmiyuk, “Kitungatka, aiyungnakpiaktuk Godim atanguvianun itekluni. 25Negyuk camel mitkutim iyagun itekluni hapengnaitkiak manigiektum tikiyyutaanin Godim atanguvianun.” 26Agligutakamik ukallautiyaat, “Talva kikut annauyyauhunguvat?” 27Jesusimlu iigigamigit ukallaktuk “Inungnun piyuminaituk tamna. Godli allauyugaluak, Godmun tamaita piyuminakpiaktugaluit.”

28Peter ukagahualektuk tapfumunga, “Ilaa uvagut tamaita kimaktavut malikuvlutin.” 29Jesus ukaktuk, “Ilumun ukautigipfi, inum igluni, katangutinilu, angunilu, angnanilunin, nutakanilunin, nunanilunin kimagumigit uvanga Godim ukauhiillu pivluta, 30tapkuninga pikangniaktuk amigaektugluni iglunik, katangutiniglu, angayukamingniglu nutakanilu nunaniglu naglikhaktitaugaluaktillugit, ilaanilu inuhengmik nungulaitumik piniaktuktauk. 31Amihulli hivulliuyun, kingulliuniaktun, kingullitlu hivulliuniaktun.”

Jesus ukagiaktuk pingahuanik tukuyyutimigun

(Mt. 20:7-19; Lk. 18:31-34)

32Tapkua aullakhutik Jerusalemun Jesus hivulliuvluni pihuktuk maligutait maliktunlu agliguhuktun ekhiukhutik. Tapfumali 12 kaitkugamigit ukautinahualektain piyauniangneminik, 33ukakhuni, “Ilaa uvagut Jerusalemun aullalegapta inum engniga angayyuvikpagyuakut atanigingnun tiitigaktinullu tuniyauhunguyuk. Tapkualu tukutakhautiginiaktaat tunivlugulu Jewmiungitunun. 34Tapkualu mitautiginiaktaat tivguaktuglugulu, ungulaklugulu tukutumavlugulu. Uvlak pingahuangnili makiniaktuk.”

Angnak engnilik tukhiaktuk

(Mt. 20:20-23)

35Talva Zebedeem engnigik James Johnlu, tapkuak Jesusmun upagniktuk ukautivlugu, “Ilihauyyi, apekhiyumalektuguk ilingnun piyumayaptingnik pikuvlunuk.” 36Ukautiyaik, “Kanuk piyukhauvik iliptingnun?” 37Ukallautiyaak, “Pipkaktiguk atanguvingni ikhivakataukuvlunuk atauhek talekpivit tungani, aipalu haumikpit tungani.” 38Jesusli tapkununga ukaktugaluak, “Taima tukhiaktutik nalugaptik. Imingniakkitik kallunmin imegahualektamnin, baptaiegnima ayyikutaanik baptaiektauniakkitiglu?” 39Ukallautiyaak, “Piniaktuguk”. Jesusim ukallautimiyaik, “Ilaa kallunmin imengniaktutik, baptaiegnima ayyikutaaniktauk baptaiektauniaktutik. 40Talekpimali tungani, haumingmalunin tungani ikhivakataukuvlutik pipkailimaitunga pilluakhimayun kihimi piniangmata.”

Ataniukiyaukuvlugit naguyumik

(Mt. 20:24-28; Lk. 22:24-27)

41Aahin kulit tuhaagamitku Jamesmun Johnmunlu kuviahugunaektun. 42Jesusimli inminun kaitkuyain ukautivlugit, “Ilihimagaluaktuhi Jewmiungitun atanekpait atannektuinaktain inuit, tapkualu atanigiyain. 43Ilipfingnili taimaliuktukhaungituk, ilipfingnili kinalika ataniukiyauyumagumi ilipfingnun kivgaktuinaktukhak tamna. 44Kinalikalunin ilipfingni hivulliugumagumi kivgaktuktukhauyugaluak tamapfingnun. 45Inum engniga tikinginman kivgaktuktaukuvlugu kivgaktuinakuvlugu allanun kihimi, inunini aitutigiyumavlugu inuit amihun annautikhainun.

Bartimaeus takpikhipkaktauyuk

(Mt. 20:29-34; Lk. 18:35-43)

46Jerichumun tikihimayun, talvangalu Jesus, maligutaillu, inuillu amigaitun aullalektillugit, tukhiakti takpiitpiaktuk atikaktuk Bartimaeusmik, Timaeusim engniga, apkutim haniani ikhivayuk. 47Jesus Nazarethmiutak kailengman tuhaagami tukhulavluni ukaktuk, “Jesus, Davidim engniga, nagliginga.” 48Inuillu tanektaat nipahuekuvlugu, akhunigaalukli tukhulauktuk “Davidim engniga nagliginga.” 49Jesuslu nutkakhuni ukallaktuk, “Kaitkuhiuk.” Inuillu kaitkuvlugu takpiituk ukaktun, “Kuviahugin makittin kaitkumatin” 50Tamnalu atigiekhuni makittuk upagahuakhugu Jesus. 51Jesus ukallautiyaa, “Kanuiliugniakkik ilingnun?” Takpiitum kiuyaa, “Ilihauyyi takpikhipkaktauyumavlunga.” 52Jesusim ukallautiyaa “Aigiagin ukpegnivit naguhipkaktaatin.” Tayyainaglu tautuglektuk maligahuakhugu Jesus apkumni.

Currently Selected:

Mark 10: Sperry

Highlight

Copy