Mark 11

NAKATA 11

Jesus tikittuk Jerusalemun nagugiyauvluni

(Mt. 21:1-11; Lk. 19:28-40; Jn. 12:12-19)

1Jerusalemun kaglilektillugit, Bethphagemun Bethanykukhutik, manilgulmi Olivesmik taiyauyumi, Jesusim maligutini malguk tiliyaik, 2ukautivlugik “Iglukagluangitumun hivuniptingni-itumun tavungaugittik, tikinahualeguptiglu tautugniaktakhi kenmekpaum hiutekuktuyum nuganga ipikhimayuk, atukhimaituk. Ipiekaalugu kagitihiuk. 3Inum apegivatik, 'Hug taimalivitikku' kiulutik imaa, 'Atangum atugniagmagu, atukaaluguli utektiniaktagaluanga tayyainak.” 4Taavungakamiglu nugak ipikhimayuk iglum hilataani katkaktaak, talva ipiektitaak. 5Inuillu taikaniitun ukallautiyait, “Hulilekkitik ipiektilugu?” 6Taima Jesusmin pitkuyaugamik uniutimagit inuit tapkua pipkaktain. 7Aahin nugak agitiyaak Jesusmun, kaanganunlu annugatik ilivlugit, Jesusimlu atuktaa. 8Inuillu amigaitun annugatik apkunmun ihivilektain allatauk napaaktun kihektutain kipigamitigik apkunmun ihiptektain. 9Tapkualu hivullit maliktingillu pihukhutik tukhulauktun “Hosanna, tamna tikittuk Atangum atingani nagugiyauli. 10Hivullipta Davidim atanguvia tikilektuk nagugiyaulitauk. Hosanna kingikiyauyumun.” 11Jerusalemunlu tikinami Jesus angayyuvikpagyuagmun itektuk, tamainik kungniakaaktillugu unulengman akuiyuk Bethanymun 12n ilagivlugit.

Napaaktuk ahiakaktukhak ahiakangngituk

(Mt. 21:18-19)

12Akagumanlu Bethanymun tikinamik Jesus kaalektuk. 13Kanilgulmi napaaktumik fignik ahiakaktukhamik tautukami upaktaa ahianik piyumavlugu. Upagamiulli ahiat takungitain napaaktuk ahiakangngiman kihektutain kihimi tautugnaktun. 14Talva Jesusim napaaktuk ukagvigiyaa ukakhuni, “Talvangaanin inuit ahianigunaektun ilingnin” Maligutaitalu tuhaayaat.

Jesusim inuit angayyuvikpagyuagmiitun ihhuaktain

(Mt. 21:12-17; Lk. 19:45-48; Jn. 2:13-22)

15Tapkualu Jerusalemun tikittun. Angayyuvikpagyuamunlu itegami anipkagahualektain niuvaayit niuvektunlu, manilekhiyit ikpatait kupanualgillu ikhivautain ulgutivlugit. 16Aahin angayyuvikpagyuami inuit nangmaktailiyain humillika. 17Ilihautiyain ukautivlugit, “Tiitigakhimangngilat imaatun, 'Igluga taiyauyukhak kengauvingmik nunakatigingnun tamainun?' Ilipfili kukivinguktitagaluakhi.” 18Angayyuvikpagyuakut ataningit tiitigaktillu tuhaagamitku ihumalektun tukutumavlugu ekhigigamitku inuit tapfuma ilihauyyutain agligutautigimatigit. 19Unulengmanlu Jesus maligutaillu iglukagvingmin aullaktun.

Ukpegnek hakugikpiangman

(Mt. 21:20-22)

20Uvlaamilu aullamigamik napaaktuk ahiakaktukhak fignik panengman tautuktaat. 21Peterlu itkakami ukallautiyaa Jesus, “Atanek, takuguk. Napaaktuk huniakkangni panektuk.” 22Jesusim kiuyain, “Godmun ukpekpagluhi. 23Ilumun ukautigipfi, inuk manilgulmun paunga pitkuigumi imaatun, 'Nutin igitaulutillu imangmun' umamini ukpeguekhimaitumik piyumanini negiugilugit tunihiviuniaktuk. 24Talva ukautigipfi kengagaigupfi humillika tukhiakupfi aituhiakuvluhi ukpegitti aituhiagniaktuhili ilumun. 25Kengagaigupfilunin huinekiyigigupfigit inuit ihumagiyunaeglugit, angutipfilu kilangmiitum ihumagiyunaekuvlugit huinekutihi ilipfi.

26Ilipfii ihumagiyunaegngitkupfigit inuit huinekutain, Angutipfilu kilangmiitum huinekutihi ihumagiyunaeglimaitpiaktaintauk.

Jesus hakugigmanganlunin inuit apekhuiyun

(Mt. 21:23-27; Lk. 20:1-8)

27Tapkualu Jerusalemun tikinmiyun. Angayyuvikpagyuamilu Jesus pihuktillugu, angayyuvikpagyuakut ataningit, tiitigaktillu, inuit atanekpaillu tapfumunga upagniktun 28ukautivlugu “Kia havakuyaatin hapkuninga, taima kia pitkuyaatin?” 29Jesusim ukallautiyain, “Apeginiagipfilu atauhengmik, kiugupfinga ukautiniagipfi havakuiyimnik hapkuninga havakuvlunga. 30Johnim baptaieguta, nakin piva Godmin inungninlunin? Kiugihinga.” 31Talva tapkua kangutiyun ingmingnik “Ukagupta 'Godmin' ukangniaktuk, 'Hug ukpegingitpakpihiuk?' 32Ukangniakkita 'Inungnin'?”–inuit ekhigiyain tapkua John nalautaiyiunahugivagmayyuk. 33Talva Jesus kiuyaat, “Uvagut ilihimangngitugut.” Jesusimlu ukallautiyain, “Uvangalu havakuiyiga ukautigiyunaitaga ilipfingnun.”

Currently Selected:

Mark 11: Sperry

Highlight

Copy