Mark 8

NAKATA 8

Inuit 4000guyun negipkaktauyan

(Mt. 15:32-39)

1Tapfumani inuit amigaitpiaktun katimangmimata nekhaekpiakhutik, Jesusim maligutini inminun kaitkuyain ukautivlugit, 2“Inuit nagligiyatka uvluni pingahuni uvamniitpagmata nekhaitgaluaktillugit. 3Aitkugupkit negitinagit hakuekhunguyun, ilait ungahiktumin kaithimangmata.” 4Maligutaitalu kiuyaat, “Kanuk mukpauyaktuktiniakkitigit hapkua hamani inuilgulmiitilluta?” 5Apegiyain “Kafinik mukpauyagliuyuhi uhimayunik?” Ukaktun “7nik.” 6Talva tapfuma inuit ingitkuyain nunamun, talva mukpauyait uhimayun 7n tigugamigit kuyahukhuni avguktain tapkuninga maligutini tunivlugit, tapkua tunipkaikuvlugit inungnun; tapkualu tuniyain. 7Aahin ikalukaktunlu ikitunik, Jesuslu kuyahukaaktillugu pitkuyain tapkuatauk tuniyaukuvlugit inungnun. 8Inuillu negivaktun akeatukhutik. Aahin mukpauyaita ilakungit kimakhimayun, katigamigit tigumiaktit 7n tatattait 9Takanani inuit 4000guyun itpaktun. 10Jesusimlu aullaktinamigit tayyainak umiagmun ikiyuk maligutaillu aullakhutik Dalmanutham nunaanun.

Jesus naunaikutamik tunihiyumangngituk

(Mk. 16:1-4; Lk. 12:54-56)

11Talva Pharisekut kaivlutik kaninahualektaat naunaikutamik kilangmin takuyumavlutik uktugiaktukuvlugu Jesus. 12Jesuslu akhun anekhaumiyuk ukakhuni, “Hug hapkua inuit naunaikutamik takuyumavat? Ilumun ukautigipfi, hapkua inuit naunaikutamik takuyunaitun.” 13Kimakhugitlu akianungaktuk umiaktukhuni.

Jesusim maligutini ihuaktain kangekhilimaimata

(Mt. 16:5-12)

14Maligutaillu puigukpiagamik natkangngitun mukpauyanik, umiagmi mukpauyak uhimayuk atauhinak avaliektuk. 15Jesusim ihuakhaktain ukakhuni, “Kamahutigilugit Pharisekut Herodkullu mukpauyaita puvlangit.” 16Tapkuali ingmingnik apekhiyun tapfuminga ukakhutik, “Mukpauyaekapta”. 17Jesusimlu tuhaagamigit ukaktuk, “Mukpauyaekapfi hug ukakkihi? Kangekhingitpihi ilihimaluanginapfi? Umatihi naptuvallaaktun? 18Iyikaktilluhi takulimaituhi, hiutikaktilluhilu tuhaalimaitgaluaktuhi? Itkaumayuitpihilu? 19Uvanga mukpauyait talimat avgukpagapkit inungnun 5000guyunun kafinik tigumiagutit ilakungingnik tatatpaktahi?” Ukautiyaat, “12nik”. 20“7nlu inungnun 4000guyunun kafinik tigumiagutit mukpauyaita ilakungingnik?” Tapkua ukaullautiyaat, “7nik”. 21Ukautiyaillu, “Tayyalunin kangekhingitpihi?”

Jesusim takpikhipkaktaa takpiituk Bethsaidami

22Bethsaidamun tikittun. Inuillu takanani kagitiyaat takpiituk Jesusmun tukhiagvigivlugu aktukuvlugu tamna. 23Tapfumalu takpiituk tahiuktaa kanilgulmun iglukagluangitumin, kanimininlu mihatektaik iyingik aktugamiuk apegiyaa, “Humik tautukpin?” 24Tamna aaglukhuni ukaktuk, “Inuit tautuglektatka pihukhutik, napaaktutun-ililektugaluit.” 25Iyingillu aktugmiyaik, talva takpiitugaluak kungniakhuni tautuglektuk tamanik. 26Jesusimlu tamna aitkugamiuk ukaktuk, “Aitinatin iglukagluangitumun pulaaktailutin.”

Peterm Jesus ukautigiyaa Christiunahugigamiuk

(Mt. 16:13-20; Lk. 9:18-21)

27Jesus maligutaillu aullangmiyun iglukagluangitunun Caesarea-Philippimiitunun. Aullakhutik maligutini apegiyain, “Inuit kinaunahugivangnga, kanuk ukaktun”. 28Kiuyaat, “John Baptaiektiunahugiyaatin, allata Elijaunahugiyaatin, allatalu nalautaiyyit ilangatlunin ukaktaat.” 29Apegiyain, “Ilipfili kinaunahugivihinga?” Peterm kiyuaa, “Christiuyutin.” 30Uniuyyitailiyain inungnun.

Jesus tukuyyutini makiyyutinilu ukautigiyaik

(Mt. 16:21-23; Lk. 9:22)

31Aahin ilihautinahualektain inmigun inum engniga naklikhaktitauhunguman amihumik, igitauluni inuit ataningingnin, angayyuvikpagyuakut ataningingninlu, tiitigaktininlu tukutauluninlu, uvluglu pingahuani makiniaktugaluak. 32Hapkua ukautigiyain naunaitumik. Peterm pigamiuk ihuahagahualektaa. 33Jesusim kiviakhuni takuvlugit maligutini Peter ihuakhaktaa ukakhuni, “Tunumnungaugit Tupilak, God ihumaginginangni, inuit kihimi.”

Inuk inminik nagugiyukhaungituk

(Mt. 16:24-28; Lk. 9:23-27)

34Talva Jesusim inuit maligutinilu inminun kaitkuyain ukautivlugit, “Inuk uvamnik maligumayuk inminik pitailiyukhak haniagutiminiglu tigukaalugu maliglunga. 35Kinalika inuheminik annautigumi tamaktiniaktaa, kinalikalunin inuheminik tamaktigumi uvanga ukauhitkalu pivlugit annautiniaktaa. 36Inuk humik pikangniakka nunat tamaita piyutigigumigit tukugaluaktillugu? 37Humiglunin inuk tunihiniakka inuhini himmautigikuvlugu? 38Inum uvanga ukauhitkalu kanguhutigipagit inuit huinekiyun takuangni tamnatauk inum engningata kanguhutiginiaktaa kaitkumi Angumi kaumaningagun ilagilugit ihalgulgit naguyun.

Currently Selected:

Mark 8: Sperry

Highlight

Copy