Matthew 18

NAKATA 18

Inuit anangayangittukhaumata

(Mk. 9:33-37; Lk. 9:46-48)

1Tapfumani maligutaita Jesus upaktaat ukakhutik, “Kilaum atanguviani kina ataniukiyauva?” 2Kaitkuigami nutagamik inminun akunganun nangektitaa 3ukakhuni, “Ilumun ukautigipfi, allanguktitaungitkupfi nutakatun-itkuvluhi kilaum atanguvianun tikittunaituhi. 4Kinalika nutakatun anangayangitkumi tamna kilaum atanguviani ataniukiyauniaktuk. 5Inum nutagak ikumatun ilagigumiuk atimni ilagiyanga uvangatauk.

Inuit huinekipkaktakhagingitain allat

(Mk. 9:42-48; Lk. 17:1-2)

6“Inumlunin nutakat ukpegluaktun uvamnun hapkua ilangat huinekipkakumiuk uyagakpak kungahingagun nivingaktukhak imitkuvlugu imangmun. 7Kapianakpiaktuk inungnun huinekiyyutikhakangmata, huinekiyyutikhat kaitauningnakhunguyun huinekipkaiyilli kapianakpiaktumik pikakniaktun.

8“Algakpillu itigavillunin huinekipkakpatin kipilugu igitlugulu. Ilingnun nagutkiak kilangmun iteguvin tuhiaktumik algaekhimaktillutinlunin, igitaukunatin ikualakttivingmun avatitin tamangmik naamakaluaktillugit. 9Iyivitauk huinekipkakpatin ungavaguk igitlugulu. Ilingnun nagutkiak kilangmun iteguvin iyikaktillutin igluinangmik, igitaukunatin ikualakttivingmun iyikakaluaktillutin malgunik.

10“Nutakat hapkua ilangatlunin hukkaungitutunitnahugitailuhiuk tapkua ihalgulingit kilangmiitun angutima hanianiimata.

11“Inum engnigali tikihimayugaluak annauyyiyumavluni ulamnauhimayunik.

Hivuniunek imnaikun ulamnauyukun

(Lk. 15:3-7)

12“Kanuk ihumavihi? Inuk imnaikakumi 100nik, tapkuali ilangat tamakkan kimagunaingilain 99n manilgulmi kenigiaktukuvlugu tamakhimayuk. 13Pakekumiuk, ilumun ukautigipfi, imnailgum nagugikiyaginiaktaa tamna allanin 99nin tamakhimaitunin. 14Taima hapkua nutakat ilangatlunin angutima kilangmiitum tamaktukhaungitnahugiyaa.

Humik piniakita huinekiyunun

(Lk. 17:3)

15“Katangutin huinekitpan ilingnun ihuakhakpayyavan iliptik kihimgiuktillutik. Tuhaakpatin kahuyyutiyan katangutin. 16Tuhaangitpanlunin talva inuit malguk pingahullunin nalaukataukulugit ilihimayiuyunin malgunin pingahuninlunin ukauhit ukpengnaktukhaumata. 17Aahin katagutivit tuhaangitpagit tapkua tapfuminga tuhapkaktilugit ukpekatigiktun, tapkunungali tuhaangitpan katangutin talva ilingnun Jewmiungitutun, manilekhiyitun-itli.

18“Ilumun ukautigipfi, hullika pitailigupfiuk nunami pitailiyauniaktuk kilangmi, hullikalunin pipkangniagupfiuk nunami tamna pipkaktauniaktuktauk kilangmi.

Kengaklutik atautikun

19“Aahin ilumun ukautigipfi, innuk malguk ihumakatigiklutik humiglunin tukhiakatigigumik piyumayatik pihunguyaak angutimnin kilangmiitumin. 20Inuit malguklunin pingahuinaklunin katimagagata atimni, tapkua akunganiiniaktunga uvanga.”

Ihumagiyunaektukhauyun inuit. Hivuniunek kivgakun nagungitukun

(Lk. 17:4)

21Talva Peterm Jesus apegiyaktuktaa ukakhuni, “Atanek, katangutiga uvamnun huinekiyumainakkan kafiektuklunga ihumangiyunaektakhagivigu? 7ektuklunga? 22Jesusim ukallautiyaa, “7ektuktuinangnengnik ukautingitagin, amigaektuglugit kihimi ihumagiyunaektakhagiyan tamna. 23Taima kilaum atanguvia atanektun-iliyuk tapfuma kivgani atugaekuyumangmagit. 24Taimaliugman kivgak atugakakpaktuk maninik 10,000nik kagitiyauyuk tapfumunga. 25Tamna kivgak atugaegutikhainman, ataniata niuvgutigiyaukuyain kivgak tamna, nuliyangalu, nutagainlu, tamaiyainlutauk atugaekuvlugu. 26Talva kivgak hitkuvigivlugu tukhiavigiyaa, “Atanek, akhuktailunga atugaekhungugama tamainik ilaani.' 27Talva atangum kivgani nagligigamiuk aitkuyaa atugain ihumagiyunaekhugit. 28Kivgagli tamna anigami kivgaukataita ilangat upaktaa hivungani atukiktihimagamiuk 100 dallanik. Aahin tapfuma tukhuyagagun ipitinahuaktaa ukautivlugu, 'Atugaegiagin uvamnun.' 29Kivgamli atugalgum tukhiagvigiyaa aipa ukakhuni, 'Akhuktailunga atugaekhungugama tamainik ilaani.' 30Talva hivullium kivgaukatini tuhaanginamiuk igitpaga itektauvingmun akilekaaktinagu. 31Aahin tapfuma kivgaukatain allata tamna takugamitku nagliktakpiakhutik atanek upaktaat uniutivlugu tamainik. 32Talva atangum kivgani kaitkumiyaa ukautivlugu, 'Nagungitpiaktutin, ilvit tukhiagvigigangma atugan tamaita ihumagiyunaektatka. 33Uvanga nagligigapkin ilvin ilvittauk nagligiyakhagiyan kivgaukatin tamna?' 34Ataneglu ningakhuni tuniyaa tamna itektauvilingnun akilekaaktinagu tamainik. 35Taimatuntauk angutiga kilangmiituk piniaktuk ilipfingnun ihumagiyunaegngitkupfi katangutipfingnun umatipfingnin.”

Currently Selected:

Matthew 18: Sperry

Highlight

Copy