Matthew 17

NAKATA 17

Jesus allangukpiaktuk

(Mk. 9:2-13; Lk. 9:28-36)

1Uvlut 6it nungumata Jesusim Peter, Jameslu, nukaalu John, mallaukuyain maiyugakatigiyumavlugit manilgulmun kingiktumun. 2Takuangnilu Jesus allanguktitauyuk akulia kengnagnakpiaktuk hikenektun, annugaillu kakuktanguktun kaumanektun. 3Aahintauk tapkununga Moses Elijahlu hagyyaektuk ukakatigivlugu Jesus. 4Peterm Jesus ukallautiyaa, “Atanek hamaniinapta nagutpiaktuk, piyumaguvin tupiliukhunguyunga pingahunik atauhengmik ilingnun, atauhengmik Mosesmun, atauhengmiglu Elijahmun.” 5Ukaktillugulu, ilaa, nuvuyam kaumayum uliktain, nipi nuvuyangmin ukaktuk, “Una engniga nagugiyaga akhun, kuviahutigivlugulu; tamna tuhaahiuk.” 6Maligutaitalu tuhaagamitku tamna angayyuyun ekhitakhutik. 7Jesusimli upakhugit aktuktain ukakhuni, “Makititti ekhitailuhilu.” 8Aaglungmata inuhingituk, Jesus kihimi.

9Tapkualu manilgulmin atkautillugit, Jesusim pitkuyain ukakhuni, “Uniuyyitailuhi inungnun takuyapfingnik Inum engniga tukungayunin makikaaktinagu.” 10Talva maligutaita apegiyaat “Hug tiitigaktit Elijam hivulliuvluni tikittakhaanik ilihauyyivat?” 11Kiuyuk, “Elijah tikittukhauyulli tamaita naamaktikuvlugit, 12ukautiyagaluapfi, Elijah tikihimayugaluak inuillu ilitaginginamitku ihumamingnik aanekpagaat. Taimatuntauk Inum engniga naglikhaktauhunguyuk tapkununga.” 13Talva maligutait kangekhilihaktun tapfuminga Jesusim John Baptaiekti ukautigimagu tapkununga.

Inuhuktuk agiuktulik naguhipkaktauyuk

(Mk. 9:14-29; Lk. 9:37-43)

14Inungnun amigaitunun tikinmata angun Jesusmun upagniktuk hitkuvigigamiuk ukaktuk, 15“Atanek, engniga nagligiguk kiiyukpiangman ulugiahukpiakhuni. Ilaani ulugianakpiaktuk ingnevingmun imangmunlunin. 16Maligutingnunlu kagitiyaga tapkuali naguhipkaklimaitagaluangat.” 17Jesus kiuyuk, “Inuit ukpektaitpiaktun hunauvat, kanuk hivitutigiyumik naiyugniakapfi? Kanuk hivitutigiyumiglu huginiagipfi? Kagitiyyuk uvamnun.” 18Jesusim agiuktuk pitkumani, aniyuk tapfumanga, inuhuktuglu naguhiyuk tayyainak.

19Talva maligutait kihimgiukhutik upautiyun Jesusmun ukakhutik, “Hug uvagut anipkaglimaitpitigu?” 20Kiuyain, “Ukpegnekukitpiagapfi, ilumun ukautigipfi ukpegnekakupfi nautiakhatun mustardtun, una manilguk ukagviginiaktakhi imaatun, 'Nutin paunga' nuniaktuglu. Taima hullika hapengnaktun hapengnaekhunguyun ilipfingnun.

21Kihimi imaatun piyunaektuhi kengagngitkupfi negitaililuhilu.”

Jesus hivuniugiagmiyuk tukuyyutimigun

(Mk. 9:30-32; Lk. 9:43-45)

22Galileemilu akuihimaktillugit, Jesusim ukautiyain, “Inum engniga inungnun tuniyauniaktuk. 23Tapkualu tukuniaktaat uvluk pingahuangili makiktitauniaktugaluak.” Tapkuali kapiatakpiaktun.

Jesus angayyuvikpagyuagmun akilektuk

24Capernaumun tikinmata, manilekhiyit angayyuvikpagyuamun, Petermun upautiyun ukallautivlugu, “Ilihauyyin angayyuvikpagyuam piyakhaanik akilekka? 25Ukaktuk, “Ilaa”. Ainman Jesus ukallakaktuk. “Simon, kanuk ihumavin? Kikunin nunat ataningit maniniktitauvat? Kitungamingnin allaninlunin? 26Peter kiuman “Allanin” Jesusim ukallautiyaa “Talva kitungain akilegunaitun, 27tapkuali ihumalukunagit tahium hinaanungaugin ikaakhaginlu ikalukkuvin tapfuma kania aitaktiyyuk iluani katkangniagangni maniuyak atauhek. Tiguguk tamna tapfumingalu tunikit manilekhiyit ilingnin uvamninlu.

Currently Selected:

Matthew 17: Sperry

Highlight

Copy