Matthew 19

NAKATA 19

Avitumik ilihauyyiyuk

(Mk. 10:1-2; Lk. 16:18)

1Jesus taimatumik ukaguegami Galileemin aullaktuk Judeam nunaanun, Jordam avataanun tikituni. 2Inuillu amigaitpiaktun maligmayyuk tapfuma naguhipkaktain takanani.

3Pharisekullu upaktaat Jesus uktugumagamitkulu apegiyaat, “Naamakpa angutim nuliyani avipkakkumiuk ihuigivlugu ihumaminik?” 4Kiuyuk, “Taigungilahi ingilgan nunaliukti inungnik hanagami angunmik angnangmiglu hanayuk. 5Ukaktuglu, 'Taima angutim anguni angnanilu kimangniaktaik nuliani naiyukuvlugu. Taima tapkuak malgukaluakhutik atauhektun-inniaktuk?' 6Talvangaanin tapkuak malgugngituk atauhiugamik. Godimlu nuliyagik katimagik inum allam avipkaktailivaglugik.” 7Tapkua ukallautiyaat, “Talva hug Moses pitkuiva imaitumik, inukguk nuliyaminik avipkaiyumagumi tiitekhanik aviyyutikhanik tunihiyyavuk?” 8Jesusim ukautiyain, “Inuit umatain naptuvallaamata Mosesim pipkaktain avipkaikuvlugit nuliamingnik, hivunganili taimaliyuitugaluit. 9Ukautigipfi, kialika avipkakumiuk nuliyani, angnak allatugngitpan, nulianikumi allamik taima inmi allatuktuk.”

10Talva maligutaita ukautiyaat, “Inuk nuliyaminun taimaliukkan tapfuma katiyyutaa ihuituk.” 11Kiuyagaluagit, “Ilihauyyutinek una tuhaalimaitaat inuit tamangnik ilihauyyauhimayun kihimi. 12Angutit ilait nulianilimaitun pitkuhikagamik taima. Aahin angutit ilait nulianilimaitun nulianitailiyaugamik inungnin, ilaittauk nulianiktailingnaktun ingmingnik kilaum atanguvia pivlugu. Hamna tuhaanagialik tuhaayuktunun.

Jesusim nutakat naguguktitain

(Mk. 10:13-16; Lk. 18:15-17)

13Talva inuit nutakatik kagitiyain Jesusmun tapfuma aktukuvlugit kengautilugillu. Maligutaitali pitailiyagaluangit. 14Jesusli ukaktuk, “Nutakat uvamnun kailit aahivaktailugillu kilaum atanguvia naminigimayyuk.” 15Talva aktuinagamigit tapkua aullaktuk.

Inuk manigiektuk inuhengmik nungulaitumik piyumayuk

(Mk. 10:17-22; Lk. 18:18-23)

16Talva inuk kaivluni Jesusmun ukaktuk, “Ilihauyyi humik naguyumik piniaktukhauvik inuhengmik nungulaitumik pikakuvlunga?” 17Ukautiyaa, “Hug apegivinga naguyukun? Naguyuk ilaa atauhiuyuk. Inuhengmik piyumaguvin Godim pitkuyain malikkit.” 18Tapfuma apegiyaa, “Kitu?” Jesus ukaktuk, “Inuaktailutin, allatuktailutin, kukittailutinlu, ikutailutinlu nuakatikun, 19angutin angnanlu nagugilugik aahin nuakatin nagugilugu iliktun.” 20Inum inuhuktum Jesus ukallautiyaa, “Hapkua pitkuyat tamaita maligapkit humik allamik piyukhauvik?” 21Jesusim ukallautiyaa, “Ilvin inuhigikhiyumaguvin takki aigiagin tamaiyatin niuvgutigikit ilingayun aitukuvlugit. Taimaliuguvin kilangmi pitkutinik akituyunik pikakhunguyutin; aahin kailutin malinga.” 22Inuhuktumli tamna tuhaagamiuk kimauyuk kuviahuluangitkivluni pikutikakpiagamik amigaitpiaktunik.

Manigiektun ilaani aiyukakpaktun

(Mk. 10:23-31; Lk. 18:24-30)

23Jesusimlu maligutini ukautiyain, “Ilumun ukautigipfi, manigiektum tikiyyutaa kilaum atanguvianun aiyungnakpiaktuk. 24Ukaktunga, negiyuk camel mitkutim iyagun itegluni tapfuma itegvikhaa aiyungnaitkiak manigiektum tikiyyutaanin kilaum atanguvianun.” 25Maligutaitalu tamna tuhaagamitku agligutakhutik ukaktun, “Kinatauklunin annauyyauniakka?” 26Jesusimli iigigamigit ukaktuk, “Una inungnun piyuminaitpiaktuk, Godmunli tamaita piyuminaktugaluit.”

27Talva Peterm kiuyaa ukakhuni, “Ilaa uvagut tamaita kimakpaktavut malikuvlutin. Humik uvagut pikangniakkita?” 28Jesusim ukallautiyain, “Ilumun ukautigipfi, nuna nutangukkan, inum engniga ikhivautakpanganin atannektuiniakkan, ilipfitauk malikpagapfinga ikhivautakpainin 12nin uktugniaktahi Israelim kinguvangit kitungangit 12n. 29Aahin inum kialika kimagumigit igluni katangutinilunin, anguni, angnanilunin, nutakani, nunanilunin, atiga pivlugu, tamna pikakfaaniamiyuk amigaektukluni inuhengmiglu nungulaitumik. 30Amihulli hivullit kinguliuniaktun kingullilli hivulliuniaktugaluit.

Currently Selected:

Matthew 19: Sperry

Highlight

Copy