John 19

NAKATA 19

Pilatem Jewmiut tuhaayain

(Mt. 27:15-31; Mk. 15:6-20; Lk. 23:13-25)

1Talva Pilate pitkuiman Jesus ungulaktauyuk, 2anguyaktillu niakutikhamik kakilautilingnik hangamik iliyaat niakuanun annugakhugulu aukpayaktumik atanektun. 3Aahin tapkua tapfumunga upagnikhutik ukainaktun “Hallu atanek Jewmiunun” patekhugu akhun akulianun. 4Pilate animigamilu Jewmiunun ukallaktuk, “Tautuk anitiniagiga ilipfingnun ilihimakuvluhi uvanga una ihuigiyauyukhaunginahugigapku.” 5Talva Jesus aniyuk niakutikhani kakilautilingmik annuganilu aukpayaktumik atukhugik. Pilatem ukallautiyain, “Tautukluhiuk una inuk”. 6Angayyuvikpagyuakut ataningita, kivgaitalu takugamitku tukhulauktun, “Kikiaktuguk kikiaktuguk.” Pilatem ukallautiyaain, “Uvanga ihuigiyauyukhaunginahugigapku tamna ilipfingnik pihiuk kikiaktuglugu.” 7Jewmiun kiuyaat, “Pitkuyakaktugut ilaa, pitkuyavullu maliktaupata una tukutauyukhauyuk inminik ukakhimagami engnigiyauyumik Godmun.”

8Pilate tapfuminga tuhaagami kuglukpiaktuk, 9igluminunlu utekhuni apegiyaa Jesus, “Nakin piyutin?” Jesus kiungitugaluak. 10Talva Pilatem ukallautiyaa, “Uvamnun ukagunaekkin? Ilihimangngilatin uvangainak ihumamnik anitiniaktagin, kikiaktugniaktaginlunin?” 11Jesus kiuyugaluak, “Ilaa Godim pipkagngitpatin atannektuglimaitpiaktangma. Talva inum niuvgutigivagaminga tuniyaukuvlunga ilingnun ihuitkiyamik pivaktugaluak.” 12Talvuna Pilatem Jesus aikuyumainakpiaktaa. Jewmiut tukhulauktugaluit, “Una inuk aullaktigungni aitkuvlugu ilannagilimaitpiaktan Caesar. Kinalika inminik ataniunahugigumi atauhektun Caesarmun akigaktun-ilinguktuk.” 13Pilatem ukauhiit tapkua tuhaagamigit agitiyaa Jesus hilataanun ingivluni uktugvium ikhivautaanun. Taika Jewmiut taivagaat Gabbathamik-Pihugvingmik. 14Tapfumani Kangiutivik tikingngitugaluak uvluk kitkaniituk. Pilatem Jewmiut ukallautiyain, “Tautukhiuk atanekhi.” 15Tapkua tukhulauktun, “Tukulugu, tukulugu kikiaktuguk.” Pilatem ukallautiyaa, “Uvanga kikiaktuktakhagivigu atanekhi?” Angayyuvikpagyuakut ataningita kiuyaat, “Atanekangngitkaluaktugut allamik, Caesar kihimi.” 16Kinguagun Pilatem pipkaktain kikiaktukuvluguu Jesus.

Jesus kikiaktuktauyuk

(Mt. 27:45-56; Mk. 15:33-41; Lk. 23:44-49)

Piyaat Jesus. 17Aavungaktuglu haniagutiminik nangmakhuni pihukhuni nunamun Golgothamik taiyauyumun – imaatun-ituk Umannagmik. 18Takanani tapkua kikiaktuktaat, allatauk malguk kikiaktukatigiktaik Jesus akuliutivlugu. 19Aahin Pilate naunaikutamik tiitigaktuk ilivlugu haniagumun. Tamna tiitigakhimayuk imaatun, “JESUS NAZARETHMIUTAK JEWMIUT ATANINGAT” 20Talva Jesusim kikiaktugvia ungahikpallaangiman iglukagvingmin Jewmiut amihun taiguktain tiitigakhimayun; ilaa tiitigakhimayuglu Jewmiutun, Latintun, Greekmiutullu. 21Talva Angayyuvikpagyuakut ataningit Jewmiut Pilatemun ukallaktun, “Tiitigaktailutin, 'Jewmiut ataningat' imaatun kihimi, 'Inmi ukaktuk Jewmiut ataniuman!” 22Pilate kiuyuk, “Tiitigaktatka aulayunaektun”.

23Anguyaktillu kikiaktugamitku Jesus annugait piyait autakhugit hitamainun, atuni anguyaktit pikuvlugit. Ilupangalu piyaat kiluituk tamna. 24Talva ingmingnik ukallaktun “Aliktuktailakput haptautigilakput kihimi nalliak pinahualektuk uminga naunaitkuvlugu.” Taimalivaktuk Godim Ukauhiit ilumukuvlugit, “Annugatka piyyutigiyain ingmingnun, ilupagalu haptautigiyaat.” Anguyaktit taimalivaktun.

25Aahin Jesusim angnanga, angnata anekataalu, Marylu Clopasim nuliyanga, Marylu Magdalamiutak nangekatigiktun tapfuma haniagutata tungani. 26Jesusim angnani, maligutinilu, nagugihimayani takugamigik nangektillugik, angnani ukallautiyaa, “Angnak, taika engnigiguk.” 27Maligutiminullu ukaktuk, “Taku tamna angnagilugu.” Talvangaanin tapfuma Mary aiyaa igluminun munagivlugu.

Jesus tukuyuk

(Mt. 27:45-56; Mk. 15:33-41; Lk. 23:44-49)

28Talva tamaita inengmata Jesus ilihimagami, Godim ukauhiit ilumukuvlugit ukalaktuk, “Imekiyunga” 29Taikanilu kallun wainlik mamaitumik kapumun ilivlugu ihagutivlugulu kanianun. 30Jesuslu waimik mamaitumik pigami ukaktuk, “Naamakhiyuk.” Tayyainaglu ukuvluni anengnigektuk.

Jesus kapiyauyuk iluvektauvluni

(Mt. 27:57-61; Mk. 15:42-47; Lk. 23:50-56)

31Talva Sabbath kaglilengman Jewmiut tukhiagvigiyaat Pilate kikiaktuktauhimayun niungit navgukuvlugit timaillu piektaukuvlugillu. Taimaliyun kikiaktuktauhimayun nivingakunagit haniagutimingni Sabbathguktillugu, uvlua tamna nagugiyauyukhauman 32Talva anguyaktit kaiyun hivullium niugik navgukhugik, aipatatauk kikiaktuktaukatauyum. 33Upagamitkuli Jesus tamna tukuhimagaluangman niugik navgugngitaik. 34Anguyaktilli ilangata Jesusim haniagun kapiyagaluanga nauligagmun, tayyainaglu auk imeglu kuviyuk. 35Inuk ilaa tamainik kungniagami uniuyyiyuk, uniuyyivaktuk ilumuktumik ilipfi ukpekuvluhi. Itkumayumik uniuyyivangman God ilihimayuk. 36Anguyaktit taimalivaktun Godim ukauhiit ilumukuvlugit, “Tapfuma hauningit atauhinaklunin naviktaungitugaluak.” 37Aahin tiitigakhimayuk imaatun, “Tamna kapihimayaat tautugniaktaat.”

38Kinguagun Joseph Arimatheamiutak, maliguhuktuk Jesusmun ukakhimaitumik tapfumuna ekhigigamigit Jewmiut, tukhiaktuk Pilatemun Jesusim timaa tutkukuvlugu. Pilatem pipkaktaa tamna. 39Nicodemuslu, kangayuak kailgakpaktuk Jesusmun unuktillugu, kaiyuk natkakhuni tipigiktumik, nanunmik aloemiglu, ukumaitilakhainik 100 lbnik. 40Tapkua Jesusim timaa tigugamikku nimektaa kalikumik tipalaakhivlugu malikhugit Jewmiut pitkuhiit tukungayunun iluvektaupata. 41Aahin Jesusim kikiaktuktauvianin nauttivik kanitumiituk. Taikanilu iluvekhak iluliukhimayuk ituk atukhimaitumik. 42Sabbathlu tikiyyukilengman iluvek kaninman iluanun Jesus iliyaat.

Currently Selected:

John 19: Sperry

Highlight

Copy