John 20

NAKATA 20

Jesus makittuk

(Mt. 28:1-10; Mk. 16:1-8; Lk. 24:1-12)

1Uvlumi hivullekpangani kaulgaktinagu Mary Magdalamiutak iluvgaanungaktuk iluvengmin uyagak akhaluakhimayuk tautukhugu. 2Talva akpahiyuk Simon Petermun allamunlu, Jesusim nagugiyaanun, ukautivlugik, “Atanek aullautiyaat iluvgaanin, namunlunin ilimangayyuk naluyugut.” 3Talva Peter, aipalu anigamik iluvgaanungaktuk 4Tamangmik akpahiyuk aipali kaiyumitkiyaugami Petermin iluvek tikitta hivulliuvluni. 5Ukuvluni iluanun kungniaktuk annugain iliyauyun tautuktain, itegngitugaluak. 6Simon Peterlu kaimiyuk malikhugu, tamnali iluanun itegami annugainik iliyauhimayunik tautukhuni. 7Kalikuli atukhimayugaluak niakuanun annugainilli allani itngitpiaktuk aahini iliyauvluni nimekhimayumik. 8Talva maliguta aipa, tikilgaktuk iluvgaanun, itektainaktuk tamainik tautukhuni ukpekhunilu. 9Tapfumanili Jesus makittukhauman iluvgaanin tiitigakhimangmata Godim Ukauhiani kangekhimangitugaluit. 10Taima maligutait angilgaktun.

Jesus Marymun Magdalamiutagmun hagyaektuk

(Mk. 16:9-11)

11Mary iluvium hilataani nangektuk kiavluni. Kiatillugu ukuyuk kungniakuvlugu iluanun. 12Talva angnak ihagulingnik malgunik annugalingnik kakuktanik tautuktuk. Tamangmik ikhivayuk aipa Jesusim nallaviata niakuani, aipanga itigaini. 13Tapkuak ukallautiyaak, “Angnak hug kialekkin?” Kiuyaik, “Inuit aullautimayyuk ataniga namunlunin ilimangayyuk nalugama.” 14Taima ukagami kiviaktuk tautukhugu Jesus ilitakhingitugaluak tapfuminga. 15Jesusim ukallautiyaa, “Angnak hug kialekkin? Kina kenilekkiuk?” Marym tamna nauttiyekhiyiunahugigamiuk kiuyaa, “Atanek aahinun aullautivagungni namun iliyautilakhaanik ukautinga, uvanga piniakuvlugu.” 16Jesusim taivlugu ukaktuk, “Mary”. Kiviagamilu angnak kiuvluni ukaktuk, “Rabboni”, Jewmiutun (immatun – ilihauyyi). 17Jesusim ukallautiyaa, “Tayya tigutailunga Angutimun maiyukhimangnginama, maligutimnulli aigiagin ukallautikuvlugit imaatun, 'Maiyugahualekkunga Angutimun Angutipfingnunlu, Godimnun, Godipfingnullu.' ” 18Talva Mary Magdalamiutak aivluni uniutiyait maligutait ukakhuni, “Atanek tautukakhugu”, ukautigivugit ukakhimayain.

Jesusim Apostlet hagyaegvigiyain

(Mt. 28:16-20; Mk. 16:14-18; Lk. 24:36-49)

19Tapfumani, uvlut hivulliani, unuktinagu, maligutait iglumi ikatigiktun ukuak kilutakhimayuk Jewmiut ekhinangmata. Talva Jesus hagyaektuk akungani nangekhuni ukallautiyain, “Naamakpagluhi”. 20Taimatun ukagami takupkaktitain algaminik hanigaminiglu. Maligutaitalu Atanek takugamitku kuviataktun. 21Jesusim tapkua ukallautimiyain, “Naamakpagluhi. Angutima tilivagmanga taimatun tiliyapfi uvanga.” 22Taima ukagami Jesusim anekhagvigiyain ukautivlugit, “Anengnek Naguyuk pihiuk. 23Inuit huinekutait ihumagiyunaegupfigit, tapkua ihumagiyauyunaektun, allat huinekutait ihumagiyunaegngitkupfigit, talva ihumagiyauyunaeglimaitugaluit.”

Jesus Thomasmun hagyaektuk

24Thomaslu, 12m ilangat, Maligiyumik taiyauyuk maligutainiitngituk Jesusim tikinmagit. 25Maligutaita allat ukallautiyaat, “Atanek tautukpaktakkut uvagut.” Tapfuma kiuyain, “Uvanga tautugngitkupkit kikiaktugnigit algaini, aktuglugik tikimnun, algagalu ilingitkupku hanigaanun ukpegunaitpiaktunga.”

26Talvangaanin uvlut 8n nungukaktillugit maligutait katimavagmiyun iglumi Thomas tapkunaniitillugu. Ukuak kilutakhimakaluaktillugu Jesus hagyaektuk nangekhuni akungani ukautivlugit, “Naamakpagluhi” 27Talva Thomas ukallautiyaa “Tikin nauk, algatka tautuglugit, algaktillu ihakit ililugit hanikamnun, ukpegpaglutillu ukpeguekhimaitumik.” 28Thomasim kiuyaa, “Ataniga Godigalu.” 29Jesusim ukallautiyaa, “Tautugangma ukpekpin? Kuviahukiyauyun tapkua ukpegluaktun uvamnik tautugngitkaluaktillugit.”

Unipkam piyakhaa

30Jesus naunaikutanik allanik amigaitunik pivaktuk maligutaita takuangni, tapkuali tiitigakhimangngitpiaktun umani makpigagmi. 31Ilangilli ukua tiitigakhimayugaluit ilipfi ukpekuvluhi Jesusmun Christiuman, Godim engnigmagu, aahin, ukpegupfi inunikakuvluhi tapfuma atkagun.

Currently Selected:

John 20: Sperry

Highlight

Copy