John 21
21
NAKATA 21
Jesus hagyaektuk tahium Tiberiasim hinaani
1Kinguagun Jesus maligutiminun hagyaegmiyuk tahium taiyauyum Tiberiasmik hinaanitillugit. Imaatun hagyaektuk. 2Simon Peter, Thomaslu taiyauyuk Maligiyumik, Nathanael Canamiutak Galileemin, Zebedeem engningillu, maligutaillu malguk ikatigiktun. 3Simon Peterm ukallautiyain, “Ikalukhiugiaktugniaktunga.” Tapkua kiuyaat, “Uvagut uktukataunialektugutauk.” Anigamik umiagmun ikiyun, unugaalugli ikalugngitpiaktugaluit. 4Kaulgaktilluguli Jesus hinaani ituk, maligutaitali ilitagingitagaluangat. 5Jesusim ukallautiyain, “Ilannatka ikalukpakpihi?” Kiuyaat, “Imanak”. 6Tapfuma ukallautiyain, “Kuvyakhi ningitihiuk umiapfi avataanun ikalukuvluhi.” Tayyainak ningitigamitku ikaluit amigaitpallaamata amuaguminaitpiaktuk. 7Maliguta, Jesusim nagugihimayaa, Petermun ukallaktuk, “Atanikput tamna” Simon Peterlu tuhaagami, ataniuman, atigiyuk, atigihimainami, imangmun mihiktuk. 8Maligutailli allat umiakun kaiyun kuvyatik kalitugu ikalungnik tatatpiangman, hinaanin kanilgulmiinamik. 9Umiak itkalgiiman tikinamik ingnengmik tautuktun taikani, ikalugmiglu uhumaiyumik, mukpauyamiglu. 10Jesusim ukallautiyain, “Ikaluktahi ilait kagitihigit.” 11Simon Peter umiagmun ikimigami kuvyak nunamungautiyaa ikalungnik angiyunik tatatpiaktillugu. Tapkua ikaluit 153guyun, kuvyagli navingngitugaluak. 12Jesusim ukallautiyain, “Takki negiaktugumaaktuhi.” Maligutailli kanguhukpallaagamik apekhuiyumangngitpiaktun tapfuminga “Kinauvin?” ataniuman ilihimagamik. 13Jesuslu tiguhivluni ikalungnik, mukpauyamiglu tuniyain tapkuninga.
14Taima Jesus hagyaekpaktuk pingahuektukhuni maligutiminun tukungayunin makikaaktillugu.
Kingulengmik Jesusim Peter ukagvigiyaa
15Tapkua negihuemata Jesusim Peter ukallautiyaa, “Simon, Johnim engniga, nagugikiyagivinga allanin tamainin?” Peterm kiuyaa, “Ilaa, atanek, nagugigapkin ilihimayutin.” Ukallautiyaa, “Imnainuatka negipkakkit.” 16Jesusim ukallautimiyaa aahin, “Simon, Johnim engiga, nagugivinga uvanga?” Kiuyaa, “Ilaa, Atanek, nagugigapkin ilihimayutin.” Ukallautiyaa, “Imnaitka munagilugit.” 17Pingahuektukhuni Jesusim ukallautiyaa, “Simon, Johnim engniga, nagugivinga?” Peterm kiuyaa, “Atanek tamainik ilihimagavin nagugigapkin ilihimakpiaktutin.” Jesusim ukallautiyaa, “Imnaitka negipkakkit. 18Ilumuktumik ukautigipkin, inengninguklihaktillutin ilingnik tapfivaktutin pihuglutin kuyagingnaklutin ilaa; inuakuaguvilli ihagniaktutin alla kileghugniaktaatin tapfimun aullautivlutin pipkaingitgaluaktillutin.” 19Taima Jesus ukaktuk Peterm tukuniagutaa, God pivlugu, naunaekhugu. Ukaguegami ukallagmiyuk Petermun, “Malinga”.
20Peter kiviakhuni tautuktaa tamna maligutaa, Jesusim nagugihimayaa, maliktillugu. (Tamna hivungani Jesusim hanianiitpaktuk negikatigiktillugit tukutautinagu, apekhuivaktuk, “Atanek, kia niuvgutiginiaktaatin?”) 21Peterm tamna tautukamiuk ukaktuk, “Atanek, tamnatauk kanuk piniakka?” 22Jesusim ukallautiyaa, “Tukutailigupku tamna kaitkiktinanga ihumagitailugu. Ilvit malinga.” 23Taima katangutaini ukaktauyuk maliguta tamna tukuyunainman. Tukuyunaitumik Jesus ukangngitugaluak tapfumuna, imaatun kihimi, “Tukutailigupku tamna kaitkiktinanga ihumagitailugu.”
Ihhua
24Tamna maliguta hapkuninga ukauyyilektuk tamainik tiitigakhuni, ilumugman ilihimayugut.
25Allaniglu amigaitumik Jesus pivaktuk. Tamaita atuni tiitigaktaupata, ihumayunga, nunat tatangniagunakhiyun makpigainik.
Currently Selected:
John 21: Sperry
Highlight
Share
Copy
Want to have your highlights saved across all your devices? Sign up or sign in
©1972 Canadian Bible Society
