John 18

NAKATA 18

Jesus tiguyauyuk

(Mt. 26:47-56; Mk. 14:43-50; Lk. 22:47-53)

1Taima Jesus ukaguegami, maligutini ilagivlugit Kidrom natinanga ikaaktaa. Talvani nauttivikaktuk, tamna Jesusim maligutaitalu tikittaat. 2Judaslu, tunihinialektuk, tapfuminga ilihimavaktuk taikani Jesus, maligutaillu katimainakpagmata ilaani. 3Talvunga Judasim aullautiyain anguyaktit ilait angayyuvikpagyuakut ataningita kivgaillu ilait, Pharisekunin. Kaiyun tapkua kullingmingnik havingmiglu natkakhutik. 4Jesuslu, tapkua piniaktainik, ilihimagami ukaktuk tapkununga upakhugit. “Kimik kenilekkihi?” 5Tapkua kiuyaat, “Jesus Nazarethmiutagmik”. Tapfuma ukallautiyait, “Tamnauyunga”. Judas, tapfuminga tunihinahualektuk, nangekataulektuk tapkunani. 6Jesus ukangman, “Tamnauyunga”, utegahuaktun ulguvlutik nunamun. 7Talva Jesusim apekhugmiyain “Kimik kenilekkihi?” Ukaktun, “Jesus Nazarethmiutagmik” 8Jesus kiuyuk, “Tamnaugama ukautiyagaluapfi. Kenigupfinga uvanga hapkua aullalit” – 9taimalivaktuk ukakhimayain ilumukvlugit “Tapkua tunivaktatin uvamnun tamangngitatka.” 10Simon Peter havikpakagami amuktaa angayyuvikpagyuakut ataningata kivganga hiutaektitaa talikpianik kipivlugu. Tamna kivgak atikaktuk Malchusmik. 11Jesusim Peter ukautiyaa, “Havikpautin pugiaguk. Angutima pitkumanga imekuvlunga kallumin nangianaktumik imektukhaungipik?”

12Anguyaktillu, ataningatalu tapkua, Jewmiullu kivgaita tigugamitku Jesus kilekhukhugu 13aullautivlugulu Annasmun, Caiaphasim hakianga tamna ataninguyuk angayyuvikpagyuakunun tapfumani. 14Caiaphasim ilaa ukautivaktain Jewmiun imaatun hivungani, inukguk atauhek tukutaupan inuit pivlugit naamaktuk.

Peterm Jesus ikutigiyaa, Jesuslu apegiyauyuk angayyuvikpagyuakut ataningaanin

(Mt. 26:59-75; Mk. 14:54-72; Lk. 22:55-71)

15Simon Peter, maligutillu aipa Jesusmun malingnaktugaluak. Aipa ilaa angayyuvikpagyuakut ataningata ilihimangmani, atangum igluata avaluata iluanun itekatauyuk malikhugu Jesus. 16Peterli ukuam hilataani nangektugaluak. Talva maliguti aipa, angayyuvikpagyuakut ataningata ilihimayaa, animigami apegiyaa angnak amekhiyi ukuangmun, itektikuvlugu Peter. 17Angnam tapfuma apekhuktaa Peter, “Inum ikumaa maligutainun ilauvakpin?” Peter ukaktuk, “Imanak”. 18Talva kivgait ikayuktullu keyungnik ikitun kaiyunangman, nangekhutik aukhektuktun. Peterlu nangekatigivlugit aukhektuktuk.

19Angayyuvikpagyuakut ataningata Jesus apekhuktaa maligutaitigun ilihauyyutaitigullu. 20Jesusim kiuyaa, “Naunaitumik ukauyyivaktunga nunaum inungingnun. Atugvingni, angayyuvikpagyuami Jewmiut katimagagata ilihauyyingnaktunga tuhaanaitumilu ukayuitpaktungalu. 21Hug apekhukkinga? Apegiyyavatin tapkua inuit nalauvigimangna, ukaktamnik ilihimangmata. Ukakhimayatka ilihimayain tapkua.” 22Taimatumik ukangman Jesus, kivgaita ilangata patektaa akulianun akhun ukakhuni, “Angayyuvikpagyuakut ataningat kiuviuk taimatun?” 23Jesusim kiuyaa, “Ihuitumik ukaguma naunaeguk, itkumayumigli ukaguma hug patekpinga?”

24Annasim talva aullaktitaa Jesus kilekhimaktillugu Caiaphasmun angayyuvikpagyuakut ataningaanun.

25Taikani Peter nangekhuni aukhektuktuk. Inuit ukallautiyaat, “Ilvillunin ikuma maligutait ilagingitpigit?” Talva imanakhuni ukallaktuk, 'Uvangaungituk ilaa” 26Aahin angayyuvikpagyuakut ataningata kivgaita ilanga, ilaguhegigamiuk hiutaektuk Petermin, ukallaktuk, “Nauttivingmi Jesusmi tautugngipigin?” 27Aahintauk Peter imanakpaktuk, tayyainaglu tingmiak nipyaaktuk.

Jesus tuniyauyuk atanengmun Pilatemun Romanmiutagmun

(Mt. 27:1-2, 11-14; Mk. 15:1-5; Lk. 23:1-5)

28Tapkua agitiyaat Jesus Caiaphasmin atangum igluanun kaulgaktinagu. Igluanunli Jewmiut itegngitugaluit ihuigiyaukunatik pitkuhimigun ingmingnik Kangiutivigmun upalungayakuvlugit. 29Talva hilataanun Pilate aniyuk ukautivlugit, “Kanugmik ihuigivihiuk una inuk?” 30Tapkua kiuyaat, “Una ihuitumik pingitpan tuniyunaitakkut ilingnun.” 31Pilatem ukallautiyain “Ilipfi pihiuk uktugiaktukuvlugu pitkuyapfigun.” Jewmiun kiuyaat, “Pitkuyauhimayugut kihimi tukuttikunata inugmik.” 32Taimatun Jesusim tukuniagutata kanuitilakhanik naunaektuk hivungani ukautigimani.

33Pilatem iglumi iluanun itegami Jesus kaitkuyaa inminun, ukautivlugu, “Jewmiunun ataniuvin?” 34Jesus kiuyuk, “Ilingnik taimatumik ukakkin allat ukautigipangnga ilingnun?” 35Pilate kiuyuk, “Jewmiutauvik uvanga? Angayyuvikpagyuakut ataningita nunakativillu uvamnun kagitiyaatin. Hulivakkin?” 36Jesus kiuyuk, “Atanguviga kaitaungituk nunamin. Atanguviga kaitaupan nunamin talva kivgatka anguyangniaktun tiguyaukunanga Jewmiunun. Ilumun atanguviga uvanga hamanga kaitaungitpiaktuk.” 37Pilatem ukallautiyaa, “Ataniuyutin ai?” Jesus kiuyuk, “Ataniugama ukakkutin. Ukagaluaktunga inuyunga tikittungalu nunamun ukautigikuvlugu ilumugnek kihimi. Inuit tamangmik ilumugnekakumi ilumingni nipiga tuhaayaat.” 38Pilatem apegiyaa, “Ilumugnek huva?” Ukagami taimatun animiyuk Jewmiunun ukautivlugit, “Tapfumani ihuigiyauyukhamik ihumangngitkaluaktunga. 39Kangiutivingugaganli pitkuhikaktuhi uvanga aullaktitkuvlugu itektauhimayuk atauhek. Itektauvigmin anipkaikuniakkihinga Jewmiun ataningaanik ilipfingnun?” 40Tapkua tukhulauktun, “Tamnaungitukhak Barabbasmik kihimik.” Barabbas kukiyuktugaluak.

Currently Selected:

John 18: Sperry

Highlight

Copy