John 17

NAKATA 17

Jesusim kengautaa

1Hapkuninga Jesus ukauyyiyuk. Talva kilangmun aglukhuni ukaktuk, “Angutiga pivikhaga tikinman, nagugilugu engnin engnivit nagugikuvlutin ilvit, 2atanektukugangni inungnun tamainun tunipkaikuvlugu inuhengmik nungulaitumik tamainun tuniyauhimayunun ilingnin. 3Inuhek nungulaituk imaatun-ituk, God atauhek ilumuktuk ilitakhinakkan tapfuma tiliyangalu Jesus Christ. 4Uvanga nagugivaktagin nunami inungni innegapkit havaktakhatka pivlutin. 5Tayya, Angutiga, nagugivaglunga haningni nagugiyauhimagama kangagaaluk nunat hanayaulaatinagit.

6“Atkinlu naunaekpaktaga inungnun kaitkuyauyunun nunaum inungningnin. Tapkua nanminigiyatin, tapkuningali tunivaktangma, tapkualu ukauhitin malingnakpiaktait. 7Tayya ilihimayun ilumuktumik tamainik tunivagangma kaitaumata ilingnin 8uvanga ukautigivagapkit ukauhitin tapkununga. Tapkua tuhaavagain ilihimavlutik kaithimagama ilingnin, ukpekhutik tilivagangma ilvit.

9“Kengautingitatka nunaum inungit, tapkuali tuniyauhimayun uvamnun ilingnin kengautiyagaluatka ilvit nanminigigapkit. 10Uvanga nanminitka ilvit nanminigiyatin, nanminitillu uvanga nanminigiyatka, tapkunanilu nagugiyauyunga. 11Tayyali uvanga nunaum inungingni itngitunga, tapkuali nunaum inungingniihimayugaluit, aitillunga ilingnun. Angutiga naguyutin, munagikit atipkun tapkuninga tunivagangma, tapkua atauhektun-itkuvlugit uvaptiktun. 12Tapkunaniitillunga ilaa munagivagatka atingni, tapkuninga tunivagangma. Amegivaktatkalu tamaita tamangngitpiaktullu, atauhek kihimi tamaktukhauman, Godim ukauhiit ilumukuvlugit.

13“Tayyali ailekkunga ilingnun, imaatun ukaktatka nunami tapkua ingmingni kuviahukiyaukuvlugit uvaptun. 14Tapkununga ukauhitin ukautigivaktatka, tapkualu ilaunginmata nunaum inungingnun uvaptun-ilivlutik nunaum inungita nagugiyuitpiaktain. 15Tukhiagngitkaluaktunga ilvit aullaktikuvlugit nunamin, munagikuvlugit tapkua Tupilagmin kihimi. 16Tapkua ilaa ilauhimangngitpiaktun nunaum inungingnun, uvanga ilaginginapkit inungit nunaum. 17Ihuitumin avipkaglugit tapkua ilumuktumun. Ukauhitin ilaa ilumuktun. 18Ilvin tilivagangma nunaum inungingnun taimatauk tiliyatka tapkua nunaum inungingnun. 19Tapkualu pivlugit avipkaiyunga uvamnik ihuitumin, tapkuatauk avipkaktitaukuvlugit ilumuktumun.

20“Kengautingitagaluatka tapkuainait, kengautiyatka tamaita ukpeguhuktun uvamnun unipkaitigun. 21Tapkua tamangmik atauhektun-illit, ilvin, Angutiga, uvamniinavin, uvangatauk ilingniinamalu, tapkua tamangmik uvaptingniitkuvluta taima nunaum inungit ukpekuvlugit ilvin tilivagangma. 22Uvanga tunivagatka naguyyutikhamik ayyikutaanik tunigangma tapkua atauhektunitkuvlugit uvaptiktun, 23uvanga tapkunaniilunga, ilvin uvamnivlutin nagutkuvlugit atauhektun-itkuvlugit nunaum inungit ilihimakuvlugit tilivagangma ilvin, nagugivagapkillu tapkua nagugivagangma uvanga.

24“Angutiga, tapkua aitutigigapkin ilvin uvamnun, piyumayatka uvamniitkuvlugit naiyugamni, naguyyutikhamnik tautukuvlugit tapfuminga tunivagangma nunat hanayaulaatinagit nagugivagangma ilaa. 25Angutiga ilumuktutin, nunaum inungita ilihimangngitpiaktaatin, uvangali ilihimayagaluapkin hapkualu ilihimayun ilvin tilivagangma. 26Atkillu naunaekpakiga tapkununga, aahin naunaekhunguyaga tamna, kuviakutin, pihimayaga ilingnin, tapkunaniitkuvlugu, uvangalu tapkunaniitkuvlugu.”

Currently Selected:

John 17: Sperry

Highlight

Copy