John 16

NAKATA 16

1Hapkuninga ukautivagapfi maliguektailivluhi. 2Tapkua ilaani atugvingnun itektailiniaktaahi. Ilaa ilaani inuk tukuttigumi ilipfingnik inminik nagunahuginiaktuk. 3Taimaliukhunguyun ilihimangnginamikku Angutigalu. 4Uvangali hapkuninga ukautivagapfi tapkua naglikhaktinahualekpahi itkaumakuvluhi ukautigigapkit ilipfingun. Hivungani ukautigingitagaluatka ilipfingni-itpiagama. 5Tayyali aullalegama tiliyimnun, ilapfili apekhugngitagaluapfinga 'Namungaulekkin?', 6hapkuningali ukautivagapfi kuviahugunaektuhi. 7Ilumuktumigli ukautiyagaluapfi. Nagutkiak ilipfingnun aullaguma, aullangngitkuma ikayukti kailimaiman, aullagumali tiliniagiga tamna ilipfingnun. 8Tapfuma tikitkumi inuit kangekhipkaktiniaktain huinekinengmik, ilumugnengmiglu, uktuktaunengmiglu. 9Huinekinekun inuit ukpegingimangnga. 10Ilumugnekun ailegama Angutimnun tautugunaekapfinga. 11Uktuktaunekullu, nunaum uma inungita ataningat uktuktauman.

12“Allaniglunun amihumik ukautiyumainaktapfi tuhaaktitaulimaekaluaktuhi tayya. 13Tamnali Ilumugnim Anengniga tikitkumi tapfuma hivulliugniaktaahi ilumugnim apkutaanun tamaanun, inminik ukagunaekami, tuhaagaigumi kihimi ukauyyiniaktuk, aahin ukautiniaktaahi piniaktunik. 14Tapfuma naguginiaktanga ukautiniagamihi pikutimnin. 15Angutima pikutain tamaita uvanga nanminigiyatka, talvuna ukaktunga Anengnek ukauyyiniangman pikutimnin.

Aullayukilektum ukauhiit

16“Kakugunuangukkan tautugunaekipfinga, aahin talvangaanin kakugungukkan tautukigniagipfinga.” 17Maligutaita ilait ingmingnik ukallaktun, “Kanugmik ukautipatigut, 'Kakugunuangukkan tautugunaekipfinga, aahin talvangaanin kakugungukkan tautukigniagipfinga?' imaalu 'Angutimnun aullangniaktunga'?” 18Talva ukaktun, “Humik hivunikakka ukagami 'Kakugunuangukkan'? Ukauhiata itkumayyuta naluyakkut.” 19Tapkua apekhuiyumainakpiagmata tapfuminga Jesus ilihimagami ukallautiyain, “Kanugmik apekhuilekkihi ilipfingnik? Ukauhipkun ukagama, 'Kakugunuangukkan tautugunaekipfinga, aahin talvangaanin kakugungukkan tautukigniagipfinga'? 20Ilumuktumik ukautigipfi, ilipfi kuviahugunaekhunguyuhi kialuhi, nunaum inungit kuviahukpiaktillugit, ilaani kuviahugunaekaaluhi kuviahukigniagaluaktuhi. 21Angnaglunin nutaganiyukilektillugu ulugiahuktuk engnivikhaa tikilengman. Nutaganikaktilluguli kuviatakpiagami nutagaminun, nunami inuman, hivungani ulugiahukpallaagami puiguinaktuk. 22Ilipfilu aiyukalektuhi tayya, ilaani tautukigupfi uvanga kuviatakhunguyuhi umatipfingni, talva kuviahugunaektitaulimaektuhi inungnin talvangaanin. 23Uvluk tamna tikitpan apekhugunaektapfinga. Ilumuktumik ukautigipfi, humillika tukhiagvigigupfiuk Angutiga atipkun tapfuma tuniniaktaahi tapfuminga. 24Hivungani tukhiayuitpiaktuhi atipkun, tukhiagitti pikakuvluhi kuviahukuvluhilu akhutayyuak. 25Uminga ukautigipfi hivuniunektigun, ilaanili hivuniunektigun ukagunaektunga ilipfingnun, naunaitumigli ukautiginiaktaga Angutiga ilipfingnun. 26Talvani tukhiakhunguyuhi atipkun, aahin ukagiangitunga tukhiakuvlunga Angutimnun pivluhi, 27Angutima inmi nagugimatin, ilipfi nagugivagapfinga ukpekpakhuhilu Godmin kaihimavagama. 28Angutimnin kaithimavagaluaktunga nunaum inungit tikittugit, aahintauk aullalektunga nuna kimaglugu ainiagama Angutimnun.” 29Maligutait ukaktun, “Ai tayya ukaklihaktainaktutin naunaitumik, hivuniunengmik atugngikivlutin. 30Tayya ilihimayugut ilvin tamainik ilihimagavin inuillu apekhutigiyakhagingitaatin ilvin, Godmin ilaa kaithimagavin ukpektugut uvagut.” 31Jesusim kiuyain, “Ukpekpihi tayya? 32Ilaa ilaani tayyalunin tamapfi aptektitauniaktuhi atunit iglupfingnun kimaglunga uvanga, kihimgiungitkaluaktungali Angutima naiyugmanga. 33Imaitumik ukautivagapfi uvapkun naamakuvluhi. Nunaum inungingni naglikhaktitauniaktuhi. Ihumaluktailuhili akimavaktunga tapkunanga.”

Currently Selected:

John 16: Sperry

Highlight

Copy