Luk 15

Yesò mò ngàyn byi a ghə̀ nle

(Mat 18.12-14)

1Tʉʼ layn kətsi kətsenkə, viʼi vyi a və tinə kənsè bènə̀ viʼi ne nyʉ̀ byɨvə və tsen və sə dyʉ̀ a mbyɨ̀ Yesò ədyʉ̀ zhʉtə ziʼi wen. 2Viʼi Falàsi vətsenvə bènə̀ ndìʼsə̀sə təsoʼ yen alì mù sə demkə be taŋmə gàʼà la “Wìʼ ghèn byɨmə la viʼi nè nyʉ̀ byɨvə vi a wen a mbyɨ̀ be zhɨ tə̀ wenə vəwenə”. 3Yesò mù mò ngàyn ghèn a vəwenə ə bèm la;

4“Wìʼ fà ghə̀ŋ yi nkiʼi byisə njɨ̀ ghɨ, ghə̀ muʼ le, ghə̀ a nè ghò? Gaʼa kò ghə̀ à ghʉsə sətsen shì njʉ̀sə̀ abʉ̀muʼ a məwum abʉ̀muʼ a tò ə jèʼè kəŋə ghə̀ muʼ yi tò kəŋə əzaʼa fa zhʉ a ghə̀ ne yen. 5Ghə̀ ne yen, ghə̀ sə saŋlə no nànto. Ghə̀ byèʼè alə̀ ə ghʉ a wenə a mbyəʼsə 6ə pfwo dyʉ̀ dzàŋtə viʼi ndoŋsə wen bènə̀ viʼi vətsen vyi a və kɨ wen ə gàʼ à vəwenə la,‘Ghə̀ŋ vi vəghəŋ zhɨ kətsi kèn layn byiʼàndo ma yenli byi ghom a ghə̀ tə̀ lè, kənyʉ̀ a kèn sə bòŋ à mò no nànto’ 7Ma gàʼà ghə̀ŋ la kə lu ndiʼ tò alì a kaŋ. Saŋlə lu ndiʼ a kàŋ byìʼì wù ne nyʉ̀ byɨvə mùʼ a ghə̀ kwitə tyɨmə wen ə bwenə vi à Nyìngòŋ chò ando ghə̀ lu ndiʼ byìʼì viʼi və ghoʼvə vyi a və kwìʼtə la və ko bè diʼi kwitə tətyɨm tə vəwenə fa mbyɨsə.

Yesò mò ngàyn ko a ghə̀ nle

8“Ghə̀ŋ be zhʉtə a! Wùwì tsen nkiʼi ko wen a ghə̀ nghʉ, tsen ghə̀ lè, ghə̀ à nè ghò? Gàʼa kò ghə̀ à dyàyn kənkàʼtə̀ ə zhès ngə̀ŋ wen ə tuʼtə kəŋ ko ayi əzaʼa fa zhʉ a ghə̀ a yen. 9Zhʉ a ghə̀ yenə ko ayi ghə̀ dzàŋtə̀ viʼi ndoŋsə wen bènə̀ viʼi a və kɨ wen ə gàʼ à vəwenə la ‘Ghə̀ŋ vi vəghəŋ zhɨ ə saŋlə byiʼàndo mà yenli ko ghomə yi a ghə̀ tè lèlì’. 10Ma gàʼà ghə̀ŋ la wu ne nyʉ̀ byɨvə mùʼ sətsen kwitə tyɨm wen ə bwenə dyʉ̀ à Nyìngòŋ, ntsɨŋsə wen sə saŋlə̀ tò ndə̀ŋndəŋ.”

Yesò mò ngàyn wàyn a ghə̀ nle

11Yesò bè dyʉ̀ mbì əshəʼtə la,“Wutsen nlu kiʼi vunə wen və bò, 12ghə̀ tyetə lu ə gàʼ à wen la, ‘Tìʼ, gə̀tə̀ fo luwen ə ku vwomə.’ Tìʼ wen gə̀tə̀ fo ə ku və lèmə̀ wen ə be ku vəwenə. 13Mətsi chò tò nshə̀ʼ alə̀, ghə̀ tyetə yi baʼlə fo wen no tsèm ə lù dyʉ̀ a jèʼ a loʼ tsen ghə̀ no kəghaf. Ne dyʉ̀ zaʼa tsu ə zhɨ ko wen tsu no tsèm. 14A ndiʼ a zhʉ ghə̀ nzhɨ ghoʼo wen yì ə mè, Jɨŋ faynsə tsen ku loʼ ayi, ghə̀ nko be kiʼ kəfo əzhɨ. 15Ghə̀ dyʉ̀ ə sènsə əshyèʼ à wù loʼ ayi tsen, ghə̀ tɨm wen la ghə̀ dyʉ̀ ə lyè və ankwʉnyàm vəwenə a to? 16Ghə̀ mù dyʉ̀ sə shyèʼè, wìʼ ayi nko ku kəfo la ghə̀ zhɨ. Ghə̀ mu sə kwòʼtə̀ la ndo ku la yi zì yi zhɨ yabyabsə fozhɨvə və ankwʉnyàm lo. 17Tof wen bwenə vì, ghə̀ kwòʼtə̀ ə bèm a wen a tyɨm la, Ma lè pfʉ dyʉ̀ nə̀ jɨŋ a shə̀ alə̀ byìʼì ghò, tìʼ ghom kiʼ viʼi shyèʼ no vəghoʼ və zhɨ fozhɨvə və ghoʼmə vəwenə a? 18Kə boŋ la mà lu ə bwenə pfwo dyʉ̀ yen tìʼ ghom ə gàʼ à wen la, tìʼ mà neli mbyɨ à Nyìngòŋ, be ne à wù. 19Mà ko bè kwʉʼ və dzàŋ mò nə̀ wàyn wù. Lyɨ̀ mo tò nə̀ wu shyèʼ wu.” 20Ghə̀ gàʼ alì mù lù sə bwenə pfwo dyʉ̀ à tìʼ wen. “Tìʼ wen yenə wen ghə̀ bù bu no kəghaf, nshinsə ku wen, ghə̀ nyɨŋ dyʉ̀ ə bwàmə wen. 21Wàyn ghèn gàʼ ando ghə̀ yi kwòʼtə̀ li la,‘Tìʼ, ma neli mbyɨ à Nyìngòŋ, be nè à wù. Ma ko bè kwʉʼ və dzàŋ mì nə̀ wàyn wù’. 22Alì tìʼ wen gàʼ à viʼi shyèʼ wen la vəwenə zaŋsə vì nə̀ ndisə a sə boŋ no a nkàyn ə lafsə wen tsu ə wye mfɨŋ à wen kəvu be we sə gwʉsə aghʉ a wen aghʉ, 23ghə̀ bè gàʼ à vəwenə la ‘Ghə̀ŋ nè ghə̀ŋ vi nə̀ kəzoʼ kə nàym ki a kə ghoʼ no nkàyn ə tìntə, vəghəŋ zhɨ kətsi kènkə layn ə saŋlə. 24Wyè ghom ghèn dìʼ alə̀ mà tə sə ghʉ tò la ghə̀ bwenə vì.’ Vəwenə mù zìtə̀ sə zhɨ saŋlə.

25“Kənyʉ̀ a kèn nlyɨ̀ kəshi, wàyn wen to diʼ a sɨm. Ghə̀ sə pfwo boʼsə vi à vəwenə chʉ̀ ngə̀ŋ ə zhʉ ando və zhɨmə ndzàŋsə bè bʉʼ fo. 26Ghə̀ dzàŋ wàyndyə shyèʼ tsen ə bèm à wen la à chò ghò a chʉ̀ ngə̀ŋ lo? 27Ghə̀ gàʼ à wen la, ‘A bwenə nvì lèmə̀ wù. Tìʼ wù mbvaʼ kəzoʼ kə nyàm à wen byiʼàndo ghə̀ bwènə̀ li nvì diʼ tò to.’ 28Wàyn to ayi fwisə tin no nànto ə tyen la yi ko kwen a chʉ ngə̀ŋ. Tìʼ wen fʉ̀ ə dyʉ̀ sènsə wen. 29Ghə̀ gàʼ à tìʼ wen la, ‘Yen la mà shyèʼè li à wù ngʉʼsə shə̀ʼ lo, kènla ma gàʼà kənyʉ̀, kènla ma taŋmə. Wù nko təmə ku tè no wye byi la mà bvaʼ yo viʼi ndoŋsə mò pfiʼ.’ 30Alì wàyn wù ghèn sə dyʉ̀ vì tò vì, mu ghə̀ tə lyɨ̀ ko wu ndyʉ̀ mbyɨsə wenə və akwàlà, wu boŋsə bvaʼ mpfi kəzoʼ kə nyàm à wen! 31Tìʼ wen mù gàʼ à wen la, ‘Wù ke ŋwʉʼ tò yo wu no məzhʉ̀ tsèm a wàyn ghom, gaʼa kò no mə ghò ghom diʼ a kiʼ wù lo? 32Kə yì boŋ la mà nè kəzhɨ kə ghoʼkə kèn byiʼàndo, kə tə̀ sə kə̀ʼə̀ la lèmə̀ wù ghèn tə pfʉ, alì ghə̀ sə diʼ a shə̀ luwen diʼ tò no to. Mà tə sə diʼ mu mà ghʉli la ghə̀ leli alì ghə̀ bwènə̀ vi. Wu lè gàʼ a vəghəŋ ko yi ndiʼ saŋlə a?’”

Currently Selected:

Luk 15: bbkDBLnt

Highlight

Copy