Luk 16
16
Tofə wù shwèʼ
1Yesò bè mò fətitì fə tsenfə à ndzɨ̀mtə̀sə bàm wen la, “Wù ghoʼo tsen nlù kìʼ wù shwèʼ a ghə̀ nghʉ la ghə̀ ntùʼmə̀ nə̀ ghoʼ wen. Tʉʼ layn, viʼi gàʼ à wen la wìʼ ayi byɨsə̀ fo wen tò kədyàŋ. 2Wù ghoʼ ayi dzàŋ wen ə bèm à wen la, ‘Ma zhʉ la ghò byìʼì wù a? Diʼi à mò la, à kwen gho, à fʉ̀ ghò lo? Zhʉ kwʉʼli a wù à fʉ̀ fa shwèʼ.’ 3Wù shwèʼ ayì mù sə kayntə la yi la nè gho ando tìʼ shwèʼ wen sə kəŋ ə shisə yi fa shwèʼ lə̀ lo. Yi ko kiʼ kədyòʼ ə nə̀ jèʼè tuŋə̀ shi a ko, kətʉ kyi be diʼi ə jèʼè loynə. 4Ghə̀ bè bwènsə̀ gàʼ tò fa wen a ngə̀ŋ la, ‘Ma kɨli kənyʉ̀ a mà nè ndi və nè dzɨ̀m mò fa shwèʼ, ma nkiʼ ndoŋsə a sə a shisə̀ mò à vəwenə aloʼ.’ 5Ghə̀ kwòʼtə̀ alì, mù dzàŋ tə viʼi vyi a və nkiʼ ko əlòʼ à tìʼ Shwèʼ wen, tò və mù və mù. Ghə̀ mbi vì, ghə̀ bèm à wen la wù kiʼ gho ə bwensə loʼ à tìʼ Shwèʼ mo a? 6Ghə̀ gàʼ la, ‘Mà kiʼi kaŋ məzhiʼ ghɨ.’ Ghə̀ gàʼ à wen la, ghaʼ ŋwàʼlə̀ ghèn a və nyòʼtə ko tsu lə̀ ə ŋwʉʼmə ə zàŋsə nyòʼtə tsu la wù kiʼ əku tò kaŋ, məwum tayn. 7Kənkùmtə̀ kə wìʼ kə vì, ghə̀ bèm a wen la wù kiʼ ku gho a? Ghə̀ gàʼ la, ‘Ma kiʼi ku mbò wit, ghɨ.’ Ghə̀ gàʼ la ghə̀ ghaʼ ŋwàʼlə̀ ə nyòʼtə tsu la ghə̀ diʼi bwènsə̀ lòʼ tò mbò məwum fwomə. 8Tìʼ Shwèʼ nè yen ji yì a wù Shwèʼ wamə ndi shɨtə kənyʉ̀ kə wen tsu ə bwomsə wen a wen ji tof.” Yesò mù gàʼ la, “Viʼi mbyì venə tofə a jisə a vəwenə shìtə nyʉ̀ vəwenə tsu chò vunə bayn.
9“Mà mù sə gàʼ à ghə̀ŋ la, ghə̀ŋ ne nè njùŋ nə̀ ko ghenə a ghə̀ ko lu faŋ ndi ghə̀ lù mè, ghə̀ŋ sə pfwo a loʼ faŋghə̀, və shisə ghə̀ŋ nə̀ avu à bò. 10Wìʼ shìtə ghaʼ mənyʉ̀lə̀ mə tyetə mə, ghə̀ ghaʼ nyʉ̀ ghoʼkə və a ku à wen. Ghə̀ sətsèn dìʼ ke ghaʼ mənyʉ̀tə mə tyetə mə, wù ku kənyʉ̀ kə ghoʼkə, kò ghə̀ lə shɨ̀tə ghaʼ. 11Ghə̀ŋ le sətsen dìʼ ke kɨ tuʼmə nə̀ ghoʼ mbyì, à lə̀ ku ndo nkàyntə ghoʼ à ghə̀ŋ a? 12Kə sə chò wìʼ ə ghə̀ tuʼmə nə̀ kəfo kə wen kə a lu ku ndo kəfo kə wen la ghə̀ tuʼmə nə̀ kə wen kə a?
13“Wìʼ ko zì ghə̀ ndiʼ wù shwèʼ viʼi və bò a zhʉ̀ mùʼ. Kə sətsèn ndiʼ alì, ghə̀ a baynə ghə̀ muʼ, alì kòŋ ghə̀ tsen; ko ngumlə̀ ghə̀ muʼ chasə ghə̀ tsen. Wù ko zì wu nshwèʼè à Nyìngòŋ bè shwèʼ ko tò fa zhʉ.”
Yesò ghàm viʼi Falàsi byìʼì nyʉ̀ ko
(Mat 11.12-13; 5.31-32; Mak 10.11-12)
14Viʼi Falàsi vətsen və zhʉ alì mù sə chəʼə Yesò byiʼ ando vəwenə nkòŋə̀ ko. 15Yesò mù gàʼ à vəwenə la, “A diʼ ghə̀ŋ vyi a ghə̀ŋ jèʼè diʼì a viʼi la ghə̀ŋ diʼ viʼi və jùŋ və, ali Nyìngòŋ kɨ tətyɨm təŋtə. No ghò a viʼi kwòʼtə̀ lyɨ̀ la à diʼ no kəfo diʼ tò kəfo kə tsoʼməkə à Nyìngòŋ.
16“Və nlù sə jèʼè a tyì soʼ Mosìs bè jèʼè à tyi ziʼi nshə̀ʼtə̀sə ghoʼkə sə əkuʼ zaʼa a tʉʼ Joyn wù ku àmù. Əzìtə̀ fa tʉʼ ayì, və mù sə shə̀ʼtə̀ ntɨm jùŋə kùmə̀ soʼ fòyn Nyìngòŋ, no məndo sə soynə tò soynə əkwen a kəshi kə fòyn na kèn. 17Kə bwaʼmə kaŋ wenə nse cho alì kò la fəshinə fa soʼ Mosìs lu lè.
18“No məndo a ghə̀ dzɨ̀mə̀ wì wen ə làm ghə̀ kədyàŋ, ghə̀ kwaʼali soʼ làm. No wulɨm ko a ghə̀ lamə wùwì a ghə̀ fʉ̀ lam, mu ghə̀ be kwaʼa soʼ lam.”
Lazalùs wenə wù ghoʼo
19Ghə̀ gàʼ alì be shə̀ʼtə̀ fətitì fə tsenfə la, “Wù ghoʼo tsen nlù dìʼ, moʼò tò ndisə ko to ghə̀ bè zhɨ wenə wen tò mətsi tsèm. 20A ndiʼ alì, wu kəfem tsen be diʼ a və wen nə̀ Lazalùs, ghə̀ kiʼi tətsaʼa no tə ghoʼo à wen a wèn. Və nlù dyʉ̀ ghʉ wen a chʉ̀ kəbəŋ wu ghoʼo ghèn. 21Ghə̀ jɨ̀mə̀ la ndo ku byəʼ fo vyi a və nè zhɨ a ngə̀ŋ wù ghoʼo yi, və sə fəŋkə̀ a nsè li à wen lo. Bʉsə bè nvì lo tətsaʼa tə wen tì. 22Ghə̀ lù pfʉ, ntsɨ̀ŋsə ngə̀ŋ Nyìngòŋ sə lyɨ̀ wen ə dyʉ̀ ghʉ a mbyɨ̀ Ablaham. Wù ghoʼo ayì bè lu pfʉ, və bvɨ̀mə̀ wen. 23Ghə̀ a loʼ nə̀ mpfʉ̀ və nse sə yenə ngəʼ byɨ tsu, ə lù sə tsoʼsə ashɨ wen sə ki ə yen Ablaham no kəghaf nə̀ Lazalùs à wen a mbyɨ̀. 24Ghə̀ dzàŋ wen ə gàʼa la, ‘Ablaham, kusə nshinsə à mò a tìʼ ə tɨm Lazalùs ghə̀ chʉ̀ nyì kəvu wen a mu ə vì chì kəndòŋ kom kə tsu. Mà zhʉ əlɨ̀m toghə a tyì zhìʼ a shə̀.’ 25Ablaham gàʼ à wen la, ‘Wàyn, kə wù à lyèsə la wù nzhɨ njùŋ wù ando wù mbu tsi a mbyi, Lazalùs bè yenə ngəʼ wen. Luwen mù sə diʼ, ghə̀ zhɨ wenə wen a shə̀, wù bòŋsə zhʉ əlɨ̀m. 26Fa mpfen, kəfoyn kə ghoʼ kətsen kə diʼ a kə gə̀sə̀ vəghəŋ, wìʼ zì ghə̀ lu fà yès ashə ə dyàŋ ashə yi a ghə̀ŋ diʼ tsu lì, ka wìʼ zì ghə̀ lu fà ghə̀ŋ ashə ə dyàŋ vì ashə̀. Kò ghə̀ à kɨ dyàŋ.’ 27Wìʼ ayì gàʼ à Ablaham la, ‘Mà sènsə wù a tìʼ la ando kə sə dìʼ alə̀ la, wù bwènsə̀ tɨm Lazalùs a ngə̀ŋ tìʼ ghom, 28ghə̀ dyʉ̀ ə tyɨftə vəlèmə vwomə kùmə̀ kənyʉ̀ kènkə, ko vəwenə lù bè kwen a ngəʼ na ghèn. Vəwenə dìʼ tò, və tayn.’ 29Ablaham bwènsə̀ gàʼ à wen la, ‘Ghʉsə vəwenə zhʉtə nyʉ̀ vyi a Mosìs wenə nshə̀ʼtə̀ sə ghoʼkə sə nlù nyoʼ.’ 30Ghə̀ gàʼ à Ablaham la, ‘Jòʼ a Tìʼ, wìʼ sətsen bòŋsə lu fa loʼ və mpfʉ̀ və nsè ashə̀ ə bwènə̀ dyʉ̀ a vəwenə, vəwenə à kwitə tətyɨm tə vəwenə fa vəwenə mbyɨsə.’ 31Ablaham mù gàʼ à wen la, ‘Vəwenə sətsèn faŋ kè zhʉ̀tə kənyʉ̀ kyì a Mosìs wenə nshə̀ʼtə̀ sə ghoʼkə sə nlù nyòʼ, kò vəwenə à zhʉ̀tə tə kənyʉ̀, a zhʉ a wìʼ yì bwènə̀ dyʉ̀ à vəwenə mu ghə̀ lù fa pfʉ.’”
Currently Selected:
Luk 16: bbkDBLnt
Highlight
Share
Copy
Want to have your highlights saved across all your devices? Sign up or sign in
