Luk 14

Yesò chʉʼ wù kwaʼa tsen a kətsi kəzhʉ̀tə kə və Jus

1A ndiʼ a kətsi kəzhʉ̀tə kətsenkə,Yesò lù ə dyʉ̀ zhɨ a ngə̀ŋ wutsen a ndiʼ kətʉ kə viʼi Falàsi. Viʼi a və ndiʼ tsu ghʉ ashɨ a wen Yesò no ando. 2Wutsen mu afwen wen bènə̀ akwòŋ wen mwikəli vi à Yesò. 3Yesò mù bèm à ndìʼsə̀sə təsoʼ bènə̀ viʼi Falàsi la,“Soʼo lè byɨmə la və chʉʼ wìʼ a kətsi kəzhʉ̀tə, mu la ghə̀ tènsə lo?”

4Vəwenə chɨmə tò la kùʼ, Yesò kùmsə̀ wìʼ ayì ə chʉʼ wen ə gàʼ à wen la ghə̀ pfwo 5ə bwènsə̀ bèm à vəwenə la, “A diʼ ndo à ghèn a ntìntìn a wàyn wen kò nyàm wen sətsen fəŋ a nkwòŋ à mù a kətsi kəzhʉ̀tə kə, ghə̀ a faŋ ke shìsə tò fa a zhʉ̀ a?”

6Vəwenə nko kiʼi no kənyʉ̀ əgàʼ.

Shìʼsə wen nə̀ Tuʼmə

7Yesò ne yen viʼi vyi a və laʼà la və vi a kəshi kə kəzhɨ, vəwenə nè sə vì lyɨ̀ tò shi ŋaŋtəvə. Ghə̀ mù tyɨftə vəwenə a ngàyn la, 8“Wìʼ sətsen laʼà wù la wù vi a kəshi əzhɨ lam, wù vi kə wù à ŋwʉʼmə a kəshi kə ŋaŋtəkə byiʼàndo ghə̀ zì ghə̀ ndiʼ mu ghə̀ laʼà wìʼ a ghə̀ chò wù. 9Ə wìʼ yì a ghə̀ laʼà ghə̀ŋ vətsèm vi ə gàʼ à wu la, ‘Lù ə ku kəshi à wìʼ ghèn.’ Alì kətʉ kə̀ ne ndìʼì ə wù dyʉ̀ ŋwʉʼmə a kəshi kə tyetə kə. 10Wìʼ laʼà wù, wu dyʉ̀ wù bòŋsə̀ ŋwʉʼʉ a kəshi kətyetə kə ndi wìʼ yì a ghə̀ laʼà wù lì vi ə gàʼ à wù la,‘Wùndoŋ mò, kuʼtə vì ə ŋwʉʼmə a kəshi kə ŋaŋtəkə a shə̀.’ Ali, wù ne kuʼmə ashɨ viʼi vyì a ghə̀ŋ vəwenə diʼ a kəshi kəzhɨ akyì a mùʼù. 11No ndo a ghə̀ kuʼsə wenə wen a kàŋ, Nyìngòŋ lu shisə wen, ə no ndo a ghə̀ shiʼsə wenə wen, Nyìngòŋ ne kuʼsə wen a kàŋ.”

12Yesò bwènsə̀ ə gàʼ à wìʼ yì a ghə̀ nlaʼà wen la,“Wù sə nlaʼà viʼi la və vi à wù a kənyʉ̀ no a zhʉ kò kə wù a laʼà ndoŋ shəsə ko vəlèmə vyə lo viʼi ngwaʼ wù nə̀ viʼi və ghoʼkə və vyi a ghə̀ŋ vəwenə tsi boʼsə, byìʼàndo vəwenə ne lyɨ̀ kənyʉ̀ kə vəwenə be laʼà wù, ə kəfo a wù nku à vəwenə a wù a kənyʉ̀ vəwenə zhɨ vəwenə bwènsə̀ lòʼ à wù. 13Wù kyè kənyʉ̀ kyə̀ kə, wu bòŋsə laʼà viʼi kəfem nə̀ viʼi a və ŋàŋlə, nə̀ viʼi kənfyɨf bènə̀ və nlàʼfwen. 14Wù sətsèn nè alì mbwaʼmə lu ndiʼ à wù byiʼàndo vəwenə ko lu bwènsə̀ lòʼ wù, Nyìngòŋ lu lòʼ wù a kətsi kyì a viʼi vyì a diʼ viʼi və jùŋə və ashɨ Nyìngòŋ bwènə̀ lù fa pfʉ.”

Ngàyn kùmə̀ kəzhɨ kə ghoʼkə

(Mat 22.1-10)

15A ndiʼ ando wutsen a ghə̀ ndiʼi a ntìntìn nòyn ayì nzhʉ kənyʉ̀ kènkə, ə gàʼ à Yesò la, “Saŋlə lu ndiʼ à viʼi vyì a və lə zhɨ a kəchiʼ a kəshi kə foyn Nyìngòŋ.”

16Yesò gàʼ à wen la,“Wutsen nlù ki kəzhɨ kə ə laʼà viʼi və ghoʼkə və no vəghoʼo. 17Zhʉ kwʉʼ, ghə̀ tɨm wù shyèʼ wen la ghə̀ jèʼè ə shə̀ʼtə̀ a viʼi vyi a ghə̀ tə̀ laʼà li la vəwenə vi byiʼàndo no ghò sə diʼ mu ghə̀ baʼtə̀ li. 18Alì vəwenə zìtə̀ tò və mùʼ və mùʼ əloyn ji. Wù mbì gàʼ à wù shyèʼ ayì la ‘Ma zenli sɨm sə kəŋ dyʉ̀ ə lye. Dyʉ̀ sènsə ti shyèʼ wù la kə ghə̀ à fwisə tyin à mò.’ 19Wutsen gàʼ la, ‘Ma zenli vemboŋ ə wum mù sə dyʉ̀ ə mwòmsə vəwenə əshyèʼ sɨm ghomə. Dyʉ̀ sènsə ti shyèʼ wù la kə ghə̀ a fwisə tyin a mò.’ 20Ghə̀ sə dyʉ̀ à wutsen, ghə̀ gàʼ la,‘Ma ko vì byìʼàndo ma bu lan wì ghom tò lamə.’ 21Wù shyèʼ ayì bwènə̀ pfwo ə shə̀ʼtə̀ nyʉ̀ na vènə à ti shyèʼ wen, tyin wen fwi, ghə̀ gàʼ à wàyn ayì la, ‘Zaŋsə fʉ̀ ə dyʉ̀ a jisə tosə nə̀ sə tyetəsə a ntə̀ʼ ə boŋtə viʼi kəfem, nə̀ viʼi a və ŋàŋlə ŋàŋlə, nə̀ viʼi kənfyɨf bènə̀ vi ngesə̀ fwen vyi a və diʼ tsu ə vi nə̀ vəwenə.’ 22Wu shyèʼ ayi dyʉ̀ ə bwènə̀ vì ə gàʼ wen la, ‘Tìʼ ma nèli ando wù yì gàʼ alì ngə̀ŋ ko təmə lwin.’ 23Alì ti shyèʼ wen be gàʼ à wen la, ‘Fʉ dyʉ̀ a ntə̀ʼ a məjìtə mə təsɨm bènə̀ a woŋ a wù a yen ngi tsu tò nə̀ venə ə nè vəwenə vi ndi ngə̀ŋ ghom lwin. 24Mà gàʼ à ghə̀ŋ la, no wìʼ fa ntìntìn viʼi vyi a ma tə̀ laʼà vəwenə nyiŋkəli a mwòm kəfo kəzhɨkə mò.’”

Kənyʉ̀ kù kə a wù diʼi nè mimbu ndiʼ ndzɨ̀mtə̀ bàm Yesò

(Mat 10.37-38)

25A ndiʼ ando Yesò njèʼè dyʉ̀, nòyn viʼi sə dzɨ̀mtə̀ dyʉ̀ nə̀ wen. Ghə̀ fuʼtə ə gàʼ à vəwenə la, 26“Wìʼ zì kò ghə̀ lù kwʉʼ ədiʼ ndzɨ̀mtə̀ bàm mò, chò la ghə̀ kòŋ mò chò ando ghə̀ kòŋə̀ tìʼ wen nə̀ lì wen, ne wì wen, nə̀ vunə wen, nə̀ və lèmə̀ və wen, be kòŋ mò chò tè ngə̀ŋ kətʉ wen. 27No məndò a ghə̀ sətsèn faŋ ke byèʼè kəntò kə wen ə dzɨ̀mtə mo, ghə̀ zì kò ghə̀ lə ndiʼ ndzɨ̀mtə̀ bàm ghom. 28No məndo a ghə̀ŋ a ntyìntyìn sətsèn mù nkəŋ bwom ngə̀ŋ ghoʼo ə faŋ ke shiʼi ŋwʉʼʉ ə kyitə ə lye la gàʼa yi kiʼ ki a ji a yi ne myètə kəmbwom akyì tsu lo? 29Ghə̀ sətsèn faŋ ke nè alì, ə wye kechɨ kə ngə̀ŋ akyì, ə fàŋ ke bwom mwètə̀, à sə nchò no ndò fa ji ə yen, ghə̀ sə chəʼə dyʉ̀ nə̀ wen, 30gàʼà la,‘Wìʼ ghèn tə̀ zìtə̀ kəmbwom ko ghə̀ diʼi mwètə̀’. 31A le zì a baʼtə̀ fòyn ko nə̀ viʼi ghoŋə nkamsə wum ədyʉ̀ soyn fòyn tsèn ghə̀ kiʼi viʼi ghòŋ nkamsə məwum bò ke ŋwʉʼ ə lye la gàʼa viʼi vyi a venə to no nkayn əsoyn viʼi fòyn tsen a vyi lo? 32Ghə̀ sətsèn yen la ghə̀ zì kò ghə̀ lə sòyn viʼi fòyn tsen a vyi ghə̀ a tɨmə ntɨm la və dyʉ̀ ə sensə fòyn tsen yì, vəwenə bù bu no kəghaf la yì kòŋə̀ əku no ghò ə vəwenə shɨtə kənyʉ̀ akyì. 33Kə le diʼ tò ndə̀ŋndəŋ ando no ndò à ghə̀ŋ ntìntìn faŋ ke moʼtə no məghò yì a ghə̀ kiʼi, kò ghə̀ ndiʼ ndzɨ̀mtə̀ bàm ghom.

Ndzɨ̀mtə̀sə bàm Yesò shì a sə mbu chiʼi kətʉ

(Mat 5.13; Mak 9.50)

34“Ghə̀ŋ kɨ la, fəmbvaŋ fə bòŋsə, alì mu fə sətsèn faŋ ke be lyìmə̀, ko kənyʉ̀ kə a ndiʼ a wù zì be nè nə̀ fəwenfə, fə be lyìmə̀. 35Kò fə be boŋ və nè tə̀ kənyʉ̀ kə tsenkə tsu à bwen tò la və chʉtə maʼà. A tofə no məndò ghə̀ tuʼù zhʉtə.”

Currently Selected:

Luk 14: bbkDBLnt

Highlight

Copy