Markôs 12

Bơhmutu Kơ Mơnuih Sat Wai Đang Boh Kơƀâu

(Mat 21:33-46; Luk 20:9-19)

1 # Êsai 5:1-2. Yêsu čơdơ̆ng yua tơlơi bơhmutu kiăng pơtô ƀing gơñu. “Sa čô mơnuih pla sa boh đang boh kơƀâu. Ñu bư̆ rơgong jum dar đang, klơi sa boh amăng luh pioh djet ia boh kơƀâu, pơdơ̆ng đĭ sa boh sang rơñan kiăng kơ gak wai, giơ̆ng anŭn ñu jao brơi ƀing arăng ngă čan đang ñu, laih anŭn ñu nao pơ čar pơkŏn. 2Tơl truh bơyan pĕ boh, ñu pơkiaŏ nao sa čô ding kơna ñu kiăng mă sa črăn boh kơmlai mơ̆ng ƀing ngă čan đang boh kơƀâu anŭn. 3Samơ̆ ƀing anŭn mă gơ̆, taih hĭ gơ̆, hăng pơpuh gơ̆ glaĭ tơngan soh. 4Ñu pơkiaŏ nao sa čô ding kơna pơkŏn dơ̆ng pơ ƀing anŭn. Ƀing anŭn taih pơrơka akŏ gơ̆ hăng hơtoh djraĭ gơ̆. 5Ñu pơkiaŏ nao sa čô pô pơkŏn dơ̆ng. Ƀing anŭn pơdjai hĭ gơ̆, laih anŭn ngă kar kaĭ kơ lu ƀing pơkŏn, đơđa gơñu taih amang, đơđa ƀing pơkŏn gơñu pơdjai hĭ. 6Pô đang anŭn kơnơ̆ng dŏ hmâo sa čô ană đah rơkơi pô ñu khăp hơeng. Hnal tuč, ñu pơkiaŏ nao gơ̆ pơ gơñu, hăng laĭ: ‘Sĭt gơñu či pơpŭ kơ ană đah rơkơi kâo.’ 7Samơ̆ ƀing ngă čan đang boh anŭn bơlaĭ tơdruă gơñu: ‘Anai yơh jing pô tŭ mă kong ngăn. Bơ bĕ ƀing ta pơdjai hĭ ñu, laih anŭn kong ngăn anŭn či lơ̆m kơ ƀing ta yơh.’ 8Tui anŭn gơñu mă pơdjai hĭ ană đah rơkơi anŭn, hăng glŏm hĭ drơi jan gơ̆ pơ gah rơngiao đang boh kơƀâu.

9Hơgĕt pô đang boh kơƀâu anŭn či ngă? Ñu či rai pơdjai hĭ ƀing ngă čan anŭn, hăng jao đang boh kơƀâu anŭn kơ ƀing pơkŏn. 10Ƀing gih ƀu hmâo lăng ôh hă Hră Ơi Adai Pơhiăp čih:

‘Boh pơtâo ƀing pơdơ̆ng sang hơngah lui laih,

Hmâo jing hĭ laih boh pơtâo phŭn akiăng sang.

11Anai jing tơlơi Khua Yang ngă,

Laih anŭn jing tơlơi yom pơphan ƀơi anăp mơta ƀing ta’?”#Adoh 118:22.

12Ƀing khua wai lăng Yuđa hơduah jơlan mă Yêsu, yua kơ gơñu thâo laih Yêsu pơhiăp tơlơi bơhmutu djơ̆ kơ gơñu, samơ̆ gơñu hwĭ kơ ƀing mơnuih lu, tui anŭn gơñu lui Yêsu hăng đuaĭ hĭ.

Tơlơi Tơña Kơ Tơlơi Duh Jia

(Mat 22:15-22; Luk 20:20-26)

13Ƀing khua wai lăng Yuđa pơkiaŏ nao đơđa ƀing Pharisi hăng ƀing mơnuih gah kơ Hêrôt pơ Yêsu kiăng ƀơč Yêsu amăng tơlơi Ñu pơhiăp. 14Gơñu rai laĭ kơ Yêsu: “Ơ Nai, gơmơi thâo Ih jing mơnuih sĭt klă, laih anŭn ƀu bơngơ̆t ôh hyư̆m tơlơi arăng pơmĭn, yua kơ ih ƀu lăng ôh kơ hơgĕt tơlơi arăng jing, samơ̆ pơtô jơlan Ơi Adai tui hăng tơlơi tơpă sĭt. Phiăn mơ̆ duh jia kơ Sêsar ƀôdah ƀu phiăn ôh? Ƀing ta či duh jia mơ̆ ƀôdah ƀu duh ôh?” 15Samơ̆ Yêsu thâo laih tơlơi plơ̆m ƀlor gơñu, tui anŭn Yêsu laĭ kơ gơñu: “Yua hơgĕt gih kiăng lông lăng Kâo? Ba rai sa sar prăk đơniê brơi Kâo lăng.”

16Gơñu ba rai kơ Yêsu sa sar prăk đơniê. Laih anŭn Yêsu laĭ kơ gơñu: “Rup hăng anăn hlơi anai?” Gơñu laĭ glaĭ: “Sêsar.” 17Yêsu laĭ kơ gơñu: “Ba glaĭ bĕ kơ Sêsar hơgĕt lơ̆m kơ Sêsar, laih anŭn ba glaĭ bĕ kơ Ơi Adai hơgĕt lơ̆m kơ Ơi Adai.” Gơñu dŏ kơtuă hling biă mă kơ tơlơi Yêsu pơhiăp anŭn.

Tơlơi Tơña Kơ Tơlơi Hơdip Glaĭ

(Mat 22:23-33; Luk 20:27-40)

18 # Bruă 23:8. Hmâo đơđa ƀing Sadusi rai pơ Yêsu, ƀing anŭn laĭ ƀu hmâo tơlơi hơdip glaĭ ôh. Gơñu tơña kơ Yêsu tui anai: 19“Ơ Nai, Môis hmâo čih brơi kơ gơmơi, tơdah sa čô mơnuih hmâo ayŏng dŏ bơnai, ñu djai hĭ pioh glaĭ bơnai ñu samơ̆ ƀu hmâo ană ôh, adơi ñu khŏm dŏ bơnai ñu kiăng hmâo ană djă pioh djuai kơ ayŏng ñu.#Mơñă 25:5. 20Hmâo tơjuh čô adơi ayŏng. Ayŏng tha dŏ bơnai, samơ̆ ñu djai hĭ ƀu hmâo ană ôh. 21Pô tal dua dŏ đah kơmơi anŭn, laih anŭn djai hĭ ƀu hmâo ană mơ̆n, wơ̆t adơi tal klâo ăt kar kaĭ mơ̆n. 22Tui anŭn abih tơjuh čô adơi ayŏng anŭn ƀu hmâo ană ôh. Hnal tuč đah kơmơi anŭn ăt djai mơ̆n. 23Tơ gơñu hơdip amăng hrơi hơdip glaĭ, ñu či jing bơnai kơ pô hlơi, yua kơ abih tơjuh čô anŭn leng kơ hmâo dŏ gơ̆ soh sel?”

24Yêsu laĭ kơ gơñu: “Ƀu djơ̆ ôh hă ƀing gih soh tơhwơl laih yua kơ ƀing gih ƀu thâo hluh ôh Hră Ơi Adai Pơhiăp, kŏn thâo hluh lơi tơlơi dưi mơyang Ơi Adai? 25Yua kơ tơ arăng hơdip glaĭ mơ̆ng ƀing djai, ƀing đah rơkơi ƀu či dŏ bơnai dơ̆ng ôh, ƀing đah kơmơi ăt ƀu či dŏ rơkơi dơ̆ng lơi; samơ̆ gơñu či jing kar hăng ƀing ling jang amăng adai. 26Bơ kơ tơlơi ƀing djai hơdip glaĭ, ƀing gih ƀu hmâo lăng ôh hă amăng hơdrôm hră Môis, anih pơhiăp djơ̆ kơ apui dŏ ƀơ̆ng pum drơi hyư̆m Tơlơi Ơi Adai laĭ kơ ñu: ‘Kâo jing Ơi Adai kơ Abraham, Ơi Adai kơ Isak laih anŭn Ơi Adai kơ Yakôp?’#Tơb 3:6. 27Ñu ƀu djơ̆ jing Ơi Adai kơ ƀing djai ôh, samơ̆ Ơi Adai kơ ƀing hơdip. Ƀing gih soh tơhwơl biă mă.”

Tơlơi Pơtă Yom Hloh

(Mat 22:34-40; Luk 10:25-28)

28 # Luk 10:25-28. Hmâo sa čô amăng ƀing nai pơtô tơlơi juăt rai hăng hmư̆ tơlơi gơñu pơrơjah hăng Yêsu, hăng hmư̆ tơlơi Yêsu laĭ glaĭ kơ ƀing Sadusi thâo djơ̆ biă mă, ñu tơña kơ Yêsu: “Tơlơi pơtă pă yom hloh kơ abih bang?”

29 # Mơñă 6:4-5. Yêsu laĭ glaĭ: “Tơlơi pơtă yom hloh kơ abih bang anŭn jing: ‘Hmư̆ bĕ, Ơ ƀing Israel! Khua Yang Ơi Adai ƀing ta jing Khua Yang hmâo kơnơ̆ng hasa đôč.#12:29 Khua Yang Ơi Adai ƀing ta jing Khua Yang kơnơ̆ng hmâo hasa đôč; ƀôdah pơblang: Khua Yang jing Ơi Adai ƀing ta, kơnơ̆ng Ñu đôč jing Khua Yang. 30Ih khŏm khăp kơ Khua yang Ơi Adai ih hăng abih pran jua, hăng abih bơngăt, hăng abih tơlơi pơmĭn, laih anŭn hăng abih tơlơi kơtang ih.’#12:30 Đơđa Hră Ơi Adai Pơhiăp so đưm thim: Anŭn jing tơlơi pơtă tal sa; tơlơi pơtă tal dua anai ăt kar hăng anŭn mơ̆n. 31Anai jing Tơlơi Pơtă tal dua: ‘Ih khŏm khăp kơ mơnuih jum dar ih kar hăng ih khăp kơ ih pô.’#Lêwi 19:18. Ƀu hmâo dơ̆ng tah tơlơi pơtă pơkŏn prŏng hloh kơ dua mơta tơlơi anai.”

32 # Mơñă 4:35; 6:4; Êsai 45:21. Nai pơtô tơlơi juăt anŭn laĭ hăng Yêsu: “Ơ Nai, djơ̆ yơh, ih laĭ djơ̆ biă mă Ơi Adai kơnơ̆ng jing hasa đôč, laih anŭn ƀu hmâo Pô pơkŏn dơ̆ng ôh. 33#Ôsê 6:6.Sĭt yơh, tơlơi khăp kơ Ñu hăng abih pran jua, hăng abih tơlơi thâo hluh, hăng abih tơlơi kơtang, laih anŭn khăp kơ mơnuih jum dar kar hăng ih khăp kơ ih pô, jing yom hloh kơ abih bang mơnơ̆ng ngă yang čuh hăng mơnơ̆ng ngă yang pơkŏn.”

34Tơ Yêsu ƀuh mơnuih anŭn laĭ glaĭ hăng tơlơi kơhnâo, Yêsu laĭ kơ ñu: “Ih ƀu ataih ôh hăng dêh čar pơtao Ơi Adai.” Giơ̆ng tơlơi anŭn ƀu hmâo dơ̆ng tah sa čô khĭn tơña kơ Ñu sa tơlơi.

Yang Krist Hăng Pơtao Đawit

(Mat 22:41-46; Luk 20:41-44)

35Tơdang Yêsu dŏ pơtô amăng sang Kơkuh Pơpŭ, Ñu laĭ: “Hyư̆m ƀing nai pơtô tơlơi juăt dưi laĭ Krist jing ană pơtao Đawit lĕ? 36Đawit pô hmâo tơlơi pơtrŭt mơ̆ng Yang Bơngăt Hiam laĭ tui anai:

‘Khua Yang laĭ kơ Khua Yang kâo,

Dŏ ber bĕ gah hơnuă Kâo,

Tơl Kâo dưm ƀing ayăt Ih ƀơi gah yŭ tơkai Ih.’#Adoh 110:1.

37Đawit pô iâu Ñu Khua Yang. Tui anŭn hyư̆m Ñu dưi jing ană đah rơkơi Đawit lĕ?” Ƀing mơnuih lu dŏ hmư̆ Yêsu hăng tơlơi hơ̆k mơak.

Yêsu Pơkơđiăng Kơ Bruă Khua Čih Hră

(Mat 23:1-36; Luk 20:45-47)

38Tơdang Yêsu dŏ pơtô, Ñu laĭ tui anai: “Răng bĕ kơ ƀing nai pơtô tơlơi juăt, jing ƀing khăp buh ao phyung rơbat hyu, hăng kiăng kơ arăng kơkuh kơ gơñu amăng sang sĭ mơdrô. 39Gơñu ruah anih yom hloh amăng sang bơjơnum hăng anih pơpŭ pơyom amăng tơlơi ƀơ̆ng huă. 40Gơñu plah sua mă sang ƀing đah kơmơi blao, hăng ngă mă iâu laĭ sui. Gơñu či tŭ tơlơi pơkơhmal kơtang hloh.”

Sa Čô Đah Kơmơi Blao Pơyơr

(Luk 21:1-4)

41Yêsu dŏ ber pơklă anăp hăng hip pơyơr prăk amăng sang Kơkuh Pơpŭ, lăng ƀing mơnuih lu pơyơr prăk amăng hip anŭn. Ƀing pơdrŏng pơyơr lu prăk. 42Hlăk anŭn hmâo sa čô đah kơmơi blao rai pơyơr dua su prăk anĕt, jing sa kak. 43Yêsu iâu ƀing ding kơna Ñu hăng laĭ kơ ƀing gơñu: “Sĭt biă mă Kâo laĭ kơ ƀing gih, đah kơmơi blao ƀun rin anai hmâo pơyơr laih amăng hip pơyơr prăk lu hloh kơ ƀing pơkŏn. 44Yua kơ abih bang gơñu pơyơr mơ̆ng prăk rơbeh gơñu đôč, samơ̆ đah kơmơi anŭn ƀun rin biă mă, hmâo pơyơr abih mơnơ̆ng ñu hmâo, jing mơnơ̆ng kiăng čem tơlơi hơdip ñu.”

Currently Selected:

Markôs 12: JRA2016

Highlight

Copy