Markôs 11

Yêsu Mŭt Amăng Plei Yêrusalem

(Mat 21:1-11; Luk 19:28-40; Yô 12:12-19)

1Tơ gơñu nao giăm truh pơ plei Yêrusalem, jĕ plei Bêtphajê hăng plei Bêthani ƀơi čư̆ Ôliwơ, Yêsu pơkiaŏ nao dua čô ding kơna Ñu 2hăng laĭ kơ gơñu: “Nao bĕ pơ plei gah anăp ƀing gih. Tơ ƀing gih man či mŭt pơ anŭn ƀing gih ƀuh sa drơi ană aseh kle arăng hmâo akă laih ƀơi anŭn, aka hmâo mơnuih đĭ djơ̆ ôh. Kleh hăng dui ba pơ anai bĕ. 3Tơdah arăng tơña kơ gih: ‘Yua hơgĕt gih ngă tui anŭn?’ brơi gih laĭ glaĭ: ‘Khua Yang kiăng ñu, laih anŭn Ñu či ba glaĭ tañ mơtam.’”

4Ƀing gơñu nao hăng ƀuh sa drơi ană aseh kle arăng hmâo akă laih ƀơi jơlan gah rơngiao ƀơi anăp bah amăng sang; laih anŭn gơñu kleh hĭ. 5Ƀing dŏ ƀơi anŭn tơña gơñu: “Yua hơgĕt ƀing gih kleh hĭ ană aseh kle anŭn?”

6Laih anŭn gơñu laĭ glaĭ kơ ƀing anŭn tui hăng Khua Yang Yêsu hmâo pơtă laih. Tui anŭn arăng brơi gơñu nao yơh. 7Gơñu dui ba ană aseh kle anŭn pơ Yêsu, tap ao gơñu ƀơi rŏng gơ̆, laih anŭn Yêsu đĭ. 8Lu mơnuih lang ao gơñu ƀơi jơlan, ƀing pơkŏn tap than kơyâo gơñu hmâo koh mơ̆ng glai. 9#Adoh 118:25-26.Ƀing nao hlâo hăng ƀing tui klon ur kraih:

“Hôsana!

Ơi Adai hơơč mơyun yơh kơ Pô rai amăng anăn Khua Yang!

10 # Adoh 118:25,26. Ơi Adai hơơč mơyun kơ dêh čar pơtao Đawit ama ƀing ta či truh!

Hôsana, amăng Anih Hăng Glông Hloh kơ abih bang!”

11Yêsu mŭt amăng plei Yêrusalem hăng nao pơ sang Kơkuh Pơpŭ. Giơ̆ng kơ Ñu lăng abih bang mơnơ̆ng jum dar, yua kơ adai klam laih, Ñu nao pơ plei Bêthani hrŏm hăng pluh dua čô khua ding kơna.

Yêsu Hơtơ̆m Pah Kơ Phŭn Hra

(Mat 21:18-19)

12Hrơi tơdơi, tơ gơñu tơbiă laih mơ̆ng plei Bêthani, Yêsu rơpa. 13Ataih ƀiă mơ̆ng anŭn Ñu ƀuh sa phŭn hra hmâo lu hla. Ñu nao lăng mĭn dah ñu hmâo boh. Tơ Yêsu truh pơ anŭn, Ñu kơnơ̆ng ƀuh hla đôč, yua kơ hlăk anŭn aka truh bơyan boh hra ôh. 14Yêsu laĭ kơ phŭn hra anŭn: “Ƀu hmâo hlơi či ƀơ̆ng boh ih dơ̆ng tah!” Ƀing ding kơna Ñu leng kơ hmư̆ boh pơhiăp anŭn.

Yêsu Puh Pơđuaĭ Mơnuih Sĭ Mơdrô Amăng Sang Kơkuh Pơpŭ

(Mat 21:12-17; Luk 19:45-48; Yô 2:13-22)

15Gơñu truh pơ plei Yêrusalem, Yêsu mŭt amăng sang kơkuh pơpŭ hăng čơdơ̆ng puh pơđuaĭ ƀing sĭ mơdrô mơ̆ng sang anŭn. Ñu klư̆ kơƀang ƀing pơplih prăk hăng gre ƀing sĭ čĭm kơtrâo. 16Ñu ƀu brơi arăng ba mơnơ̆ng hơgĕt rơbat găn wăl sang kơkuh pơpŭ ôh. 17#Yêr 7:11.#Êsai 56:7.Laih anŭn Yêsu pơtô laĭ kơ ƀing gơñu: “Ƀu djơ̆ ôh hă hră Ơi Adai Pơhiăp hmâo čih laih: ‘Arăng či iâu sang Kâo jing sang iâu laĭ kơ abih bang djuai mơnuih’? Samơ̆ ƀing gih hmâo pơjing hĭ ñu jing par kơ ƀing mơnuih klĕ dŏp.”

18Ƀing khua ngă yang prŏng hăng ƀing nai pơtô tơlơi juăt hmư̆ tơlơi anŭn gơñu čơdơ̆ng hơduah jơlan pơdjai Yêsu. Gơñu hwĭ kơ Yêsu, yua kơ abih bang ƀing mơnuih lu hling hlang kơ tơlơi Ñu pơtô.

19Tơ adai klam laih, Yêsu hăng ƀing ding kơna Ñu tơbiă mơ̆ng plei prŏng.

Tơlơi Hrăm Mơ̆ng Phŭn Boh Hra

(Mat 21:20-22)

20Ưm mơguah tơdơi, tơdang gơñu găn ƀơi anŭn, gơñu ƀuh phŭn hra anŭn djai kro laih hlŏng truh pơ akha ñu. 21Pêtrôs hơdơr glaĭ hăng laĭ kơ Yêsu: “Ơ Nai, lăng adih, phŭn hra Ih hmâo hơtơ̆m pah anŭn kro yơh.”

22Yêsu laĭ glaĭ kơ gơñu: “Brơi ƀing gih hmâo tơlơi đaŏ kơ Ơi Adai bĕ. 23#Mat 17:20; I Kôr 13:2.Sĭt biă mă Kâo laĭ kơ ƀing gih, hlơi pô laĭ kơ čư̆ anai: ‘Đuaĭ bĕ ih laih anŭn kơdâo amăng ia rơsĭ,’ tơdah amăng pran jua ñu ƀu đing ôh, samơ̆ đaŏ kơ tơlơi ñu laĭ či truh, sĭt tơlơi anŭn či ngă brơi kơ ñu yơh. 24Yua kơ tơlơi anŭn Kâo laĭ kơ ƀing gih, hơgĕt tơlơi ƀing gih rơkâo tơdang iâu laĭ, đaŏ bĕ ƀing gih hmâo mă tŭ laih, ƀing gih či hmâo tơlơi anŭn yơh. 25#Mat 6:14-15.Laih anŭn tơdang gih dŏ dơ̆ng iâu laĭ, pap brơi bĕ hơgĕt tơlơi ƀing gih hmâo hăng arăng, kiăng kơ Ama ƀing gih, Pô dŏ amăng adai dưi pap brơi tơlơi soh ƀing gih kar kaĭ mơ̆n.”#11:25 Hmâo đơđa Hră Ơi Adai Pơhiăp so đưm thim jơlan 26: Tơdah ƀing gih ƀu pap brơi ôh, Ama ƀing gih amăng adai kŏn či pap brơi lơi tơlơi soh ƀing gih (Mat 6:15).

Tơña Kơ Tơlơi Dưi Yêsu

(Mat 21:23-27; Luk 20:1-8)

27Ƀing gơñu nao pơ plei Yêrusalem dơ̆ng. Tơdang Yêsu rơbat amăng sang Kơkuh Pơpŭ, ƀing khua ngă yang prŏng, ƀing nai pơtô tơlơi juăt, hăng ƀing kŏng tha nao pơ Ñu. 28Gơñu tơña kơ Yêsu: “Hăng tơlơi dưi hơgĕt Ih ngă hơdôm tơlơi anai? Hlơi pô brơi kơ Ih tơlơi dưi kiăng ngă hơdôm tơlơi anai?”

29Yêsu laĭ glaĭ: “Kâo či tơña kơ ƀing gih sa tơlơi; laĭ glaĭ bĕ kơ Kâo, laih anŭn Kâo či laĭ brơi kơ ƀing gih hăng tơlơi dưi hơgĕt Kâo ngă hơdôm tơlơi anai. 30Laĭ brơi Kâo bĕ, tơlơi Yôhan ngă ƀatem tơbiă rai mơ̆ng Ơi Adai ƀôdah mơ̆ng mơnuih?”

31Gơñu čơdơ̆ng pơrơjah tơdruă gơñu tui anai: “Tơdah ƀing ta laĭ: ‘Mơ̆ng Ơi Adai,’ ñu či laĭ: ‘Tui anŭn yua hơgĕt ƀing gih ƀu đaŏ kơ ñu lĕ?’ 32Samơ̆ tơdah ƀing ta laĭ: ‘Mơ̆ng mơnuih’?” — Gơñu hwĭ kơ ƀing ană plei, yua kơ abih bang mơnuih đaŏ sĭt kơ Yôhan jing sa čô pô laĭ lui hlâo. — 33Tui anŭn gơñu laĭ glaĭ kơ Yêsu: “Gơmơi ƀu thâo ôh.” Yêsu laĭ glaĭ gơñu: “Kâo ăt ƀu či laĭ brơi lơi kơ ƀing gih hăng hơgĕt tơlơi dưi Kâo ngă hơdôm tơlơi anai.”

Currently Selected:

Markôs 11: JRA2016

Highlight

Copy