Yôhan 21

Yêsu Pơƀuh Ñu Pô Kơ Tơjuh Čô Khua Ƀing Ding Kơna

1Giơ̆ng kơ anŭn, Yêsu pơƀuh Ñu Pô dơ̆ng kơ ƀing ding kơna Ñu ƀơi hang ia rơsĭ Tibêrias. Tơlơi Ñu pơƀuh rai tui anai: 2Simôn Pêtrôs, Thômas arăng pơanăn pô arăng tơkeng kơmar, Natanel mơ̆ng plei Kana tring Galilê, ƀing ană đah rơkơi Sêbêdê, hăng dua čô ƀing khua ding kơna pơkŏn dŏ pơƀŭt glaĭ hrŏm hơbĭt. 3Simôn Pêtrôs laĭ hăng gơñu: “Kâo nao trah akan.” Gơñu laĭ glaĭ: “Gơmơi či nao hrŏm hơbĭt hăng ih mơ̆n.” Gơñu tơbiă nao trŭn amăng sŏng yơh, samơ̆ amăng mlam anŭn gơñu ƀu hmâo hơgĕt gĕt ôh.#Luk 5:5.

4Truh sêng brêng mơguah, Yêsu dŏ dơ̆ng ƀơi hang; samơ̆ ƀing khua ding kơna ƀu thâo krăn ôh anŭn jing Yêsu. 5Yêsu tơña kơ ƀing gơñu: “Ơ ƀing ană Kâo, ƀing gih ƀu hmâo akan ôh hă?” Gơñu laĭ glaĭ: “Ƀu hmâo ôh.” 6Yêsu laĭ kơ gơñu: “Dăng bĕ hơñual gah hơnuă kơ sŏng ƀing gih či hmâo akan yơh.” Tui anŭn gơñu dăng, djơ̆ akan lu biă mă tơl gơñu ƀu anăm dui đĭ ôh.#Luk 5:6. 7Ding kơna pô Yêsu khăp anŭn laĭ hăng Pêtrôs: “Khua Yang yơh anŭn!” Tơ Simôn Pêtrôs hmư̆ anŭn jing Khua Yang, ñu mă ao phyung buh sŏm drơi jan ñu, yua kơ ñu dŏ drơi mơhlŭn, laih anŭn kơdâo trŭn amăng ia. 8Samơ̆ ƀing khua ding kơna pơkŏn waih sŏng rai hrŏm hơbĭt, dui hơñual bă hăng akan, yua kơ gơñu ataih mơ̆ng hang kơnơ̆ng giăm sa rơtuh met đôč. 9Tơ gơñu đĭ pơ hang, gơñu ƀuh pơ anŭn hmâo apui hơdăng, ƀơi hăng ngŏ apui anŭn hmâo akan hăng ƀañ tơpŭng. 10Yêsu laĭ kơ gơñu: “Djă rai bĕ ƀiă akan ƀing gih phrâo mă anŭn pơ anai.” 11Tui anŭn Simôn Pêtrôs đĭ amăng sŏng hăng dui hơñual nao pơ hang, bă hăng sa rơtuh rơma pluh klâo drơi akan prŏng; wơ̆t dah akan lu kar hăng anŭn jal ƀu tơĭ ôh. 12Yêsu laĭ kơ gơñu: “Rai ƀơ̆ng bĕ.” Ƀu hmâo ôh sa čô amăng ƀing khua ding kơna khĭn tơña kơ Ñu: “Hlơi ih jing?” Yua kơ gơñu thâo sĭt anŭn jing Khua Yang. 13Yêsu nao, mă ƀañ tơpŭng brơi kơ gơñu, laih anŭn brơi wơ̆t akan mơ̆n. 14Anŭn jing tal klâo Yêsu pơƀuh Ñu pô kơ ƀing khua ding kơna Ñu, tơdơi kơ Ñu hơdip glaĭ mơ̆ng ƀing djai.

Yêsu Hăng Pêtrôs

15Giơ̆ng kơ gơñu ƀơ̆ng huă, Yêsu pơhiăp hăng Simôn Pêtrôs: “Ơ Simôn ană Yôhan,#21:15 Đơđa Hră Ơi Adai Pơhiăp so čih Yôhan jing Yônas. ih khăp kơ Kâo hloh kơ ƀing anai mơ̆?” Pêtrôs laĭ glaĭ: “Ơ Khua Yang, Ih thâo laih kâo khăp kơ Ih.”

Yêsu laĭ dơ̆ng: “Čem rong bĕ khul ană triu Kâo.” 16Yêsu pơhiăp hăng ñu tal dua: “Ơ Simôn ană Yôhan, ih khăp kơ Kâo mơ̆?”

Pêtrôs laĭ glaĭ: “Ơ Khua Yang, Ih thâo laih kâo khăp kơ Ih.”

Yêsu laĭ kơ ñu: “Wai lăng bĕ khul triu Kâo.” 17Yêsu pơhiăp hăng ñu tal klâo: “Ơ Simôn ană Yôhan, ih khăp kơ Kâo mơ̆?”

Pêtrôs rơngot yua kơ Yêsu tơña kơ ñu truh kơ klâo wơ̆t: “Ih khăp kơ Kâo mơ̆?” Tui anŭn Pêtrôs laĭ glaĭ: “Ơ Khua Yang, Ih thâo abih bang tơlơi, Ih thâo laih Kâo khăp kơ Ih.”

Yêsu laĭ kơ ñu: “Čem rong bĕ khul triu Kâo. 18Kâo laĭ sĭt biă mă kơ ih, tơdang ih hlăk dŏ tơdăm, ih hrăng mă hơdrăng kơiăng ih pô, hăng nao pơpă anih ih kiăng; samơ̆ tơ ih tha laih, ih či yơr tơngan, laih anŭn pô pơkŏn či hrăng brơi hơdrăng kơiăng kơ ih, hăng či dui ba ih pơ anih ih ƀu kiăng nao ôh.” 19Yêsu pơhiăp tơlơi anŭn kiăng laĭ nao hyư̆m jơlan Pêtrôs či djai kiăng ngă ư-ang kơ Ơi Adai. Giơ̆ng Yêsu pơhiăp tơlơi anŭn, Yêsu laĭ kơ Pêtrôs: “Đuaĭ tui Kâo bĕ.”

Yêsu Hăng Khua Ding Kơna Pơkŏn

20Pêtrôs wir glaĭ ƀuh ding kơna Yêsu khăp hlăk đuaĭ tui tơdơi, jing pô hmâo ah boh akŏ ƀơi tơda Yêsu amăng sa tơlơi ƀơ̆ng huă anŭn laih anŭn tơña kơ Yêsu: “Ơ Khua Yang, hlơi pô či pơblư̆ lui Ih?”#Yô 13:25. 21Tơ ƀuh pô anŭn, Pêtrôs tơña kơ Yêsu: “Ơ Khua Yang, bơ kơ pô anai hơgĕt tơlơi či truh kơ ñu lĕ?”

22Yêsu laĭ glaĭ: “Tơdah Kâo kiăng kơ ñu dŏ hơdip tơl Kâo rai dơ̆ng, hơgĕt tơlơi anŭn djơ̆ kơ ih? Gah kơ ih, đuaĭ tui Kâo bĕ!” 23Yua kơ anŭn, hmâo tơlơi hmư̆ hing tơ̆ng krah ƀing adơi ayŏng đaŏ kơ khua ding kơna anŭn ƀu či djai ôh; Yêsu ƀu laĭ ôh kơ khua ding kơna anŭn ƀu či djai, samơ̆ Ñu laĭ “Tơdah Kâo kiăng ñu dŏ hơdip tơl Kâo rai dơ̆ng, hơgĕt tơlơi anŭn djơ̆ kơ ih?”

24Ding kơna anŭn yơh jing pô ngă gơ̆ng jơlan, hăng hmâo čih laih abih tơlơi anai; laih anŭn ƀing ta thâo kơ tơlơi ñu ngă gơ̆ng jơlan jing sĭt.

25Yêsu hmâo ngă lu tơlơi pơkŏn dơ̆ng mơ̆n. Tơdah arăng čih abih bang tơlơi anŭn, kâo pơmĭn wơ̆t abih lŏn tơnah anai ăt ƀu dưi djŏp ôh anih pioh khul hơdrôm hră hmâo čih anŭn.

Currently Selected:

Yôhan 21: JRA2016

Highlight

Copy